Judas 1 - Nuevo Testamento Tzeltal de Amatenango

Spajtil-oꞌtanil

¹ Joꞌon Judason, yaj-aꞌtelon te Jesucristoe y sok jaꞌ jbankil te Jacoboe. La jtsꞌibay te karta to jaꞌ yuꞌun te machꞌatik kꞌuxutaybil yuꞌun te Jtatik Dios sok te ikꞌtalanbilix yuꞌune, sok jaꞌ te machꞌatik kanantaylanbilix yuꞌun te Jesucristoe.

² Te jaꞌexe ichꞌaik xan bayal te slekil yoꞌtan sok te bujtsꞌan kꞌinal y sok te xkꞌuxul yoꞌtane.

Te machꞌatik ya yakꞌik ta nopel te lotil kꞌop

³ Kermanotak te kꞌuxex ta koꞌtane, ben jun koꞌtan a jkꞌan a jtsꞌibabeyex te tutꞌil ay te kolele te pajal ayix kuꞌuntike. Pero te ora to ya kil te tut puersa ya skꞌan pasel te kartae, yuꞌun ya kalbeyex te ya apasik puersa sok te xchꞌuunel awoꞌtanike te jmel nax aꞌbilotikix sok te machꞌatik ayix ta skuenta te Diose.

⁴ Yuꞌun ay mukul la yochintayex jtul cheb genteetik te ya sloꞌlayexe. Jaꞌ te machꞌatik namey ay jilel skꞌoplal ta Sjun Dios yuꞌun te chꞌayel ya xlaj bajte. Jaꞌ genteetik te ma lekikuke. Syanutesejik te tutꞌil ay slekil yoꞌtan te Kajwaltik Dios, yuꞌun ya yalik te jich ay ta pasel spisil te tut ma tsaꞌamuke. Sok ma xyakꞌik ta jkuenta te úniko Ajwalil kuꞌuntik, ja te Kajwaltik Jesucristoe.

⁵ Aunke te jaꞌexe anaꞌojikix, ya jkꞌan ya kakꞌ xan anaꞌik to: Te Kajwaltike, ta patil te la slokꞌes tal ta Egipto te jtejklum Israele, la slajin te machꞌatik ma xchꞌuunike.

⁶ Y sok te angeletik te ma yakꞌik ta jkuenta te yaꞌtel aꞌbilike, sino ke la sjilesik te sluwarik ba ayike, jmel nax chuktalanbil ta ijkꞌal kꞌinal yuꞌun te tut ora ya sta skꞌaalel te ichꞌel ta jkuenta yuꞌun te Diose.

⁷ Jich mismo sok te angeletik abi, jich mismo te Sodoma y Gomora y sok te jtejklum tijajtik ay ae. Jaꞌ a akꞌot ta lajel yuꞌun te tut ma tojuk a spasike te kꞌayik ta spasel mulil ta stiꞌbalulik te sjoy sbaik ta winikile. Jaꞌ yuꞌun la sta swokolik ta kastigo ta kꞌajkꞌ sbajtel kꞌinal, y jaꞌ ejemplo a jil yuꞌun ta spisil genteetik.

⁸ Pero jich euk te winketike abi. Wayuchejel nax kꞌoem te xkuxlejalike, yixlanejik te stiꞌbalulike. Ya spꞌajik te ay yaꞌtel te Kajwaltike, y ya yixta-kꞌoptayik te stataletik yuꞌun te angeletike.

⁹ Mismo te statal ángel Miguel, te kꞌalal tulan akꞌopoj te la yut sba sok pukuj ta skuenta te stiꞌbalul jMoisese, maꞌ kꞌax skꞌop te Miguele, sok ma la yalbe te chꞌayel ya xbajt te pukuje. Sino ke jaꞌ nax te la yalbe: “Te Kajwaltik ya yaꞌbat kastigo”, te xchie.

¹⁰ Pero te winketik to ma lekuk skꞌoplal ya yalbeyik te tutik ma snaꞌbe sluware. Y te tutik ya snaꞌik spasel ta skuenta stiꞌbalulike, jachik tutꞌil te chanbalametik te ma snaꞌ kꞌinale. Jich ya spasik yuꞌun chꞌayel ya xlaj bajt yuꞌun.

¹¹ ¡Oꞌol me sbaik! Porke jaꞌ stamojbeyik sbe te jCaine. Ta skaj nax sganar takꞌin te ya xlaj chꞌay baele, jachꞌik tutꞌil te jBalaame. Y jich tutꞌil te jCore, ya xlaj cham yuꞌun te xkꞌaxemule.

¹² Jaꞌ nax ya yakꞌex ta kꞌexlal te tutꞌil sjoyinejex ta spasel te kꞌin te skuenta xkꞌuxul awoꞌtan abaike. Yuꞌun te stukelik te lom jun yoꞌtanik ya xweꞌ-xꞌuchꞌaike, ni maꞌ xꞌakꞌawan ta jkuenta te tut sluwar te kꞌine. Jaꞌ jkananetik te stukel nax mismo ya skanantay sbaike. Jachik tutꞌil tokaletik te maꞌyuk yaꞌlel te ya xtal xbajt yuꞌun te ikꞌe. Pajal sok teꞌetik te ma sitin ta yoraile. Chaꞌmel chamen y bulbil kꞌalal ta yisim.

¹³ Pajal sok yaꞌlel mar, te xwilawet ya xtal te kapal sok sbul te ya xchꞌojot tal lokꞌele. Pajal sok ekꞌetik te chꞌayem te ba ya xbajte y ya xchꞌayik bael ta jmel nax te ba ay ta mas to ijk te kꞌinale.

¹⁴ Sok euk te jꞌEnoke, te ja sjukkajal stsꞌumbal ta patil te jAdane, la yal ta skuenta Dios te skꞌoplal te gente abi: “La kil te Kajwaltike te sjoyinej tal ta jmil y ta jmil te angeletik yuꞌune.

¹⁵ Yuꞌun ya xtal yichꞌ jkuenta ta spisil gente. Y ya xtal yaꞌbe kastigo spisil te machꞌatik te maꞌ akꞌot ta jkuenta yuꞌune, sok yuꞌun spisil te tut ma lekuk a spasik yuꞌun te ma tojuk te yoꞌtanike, y sok ta spisil te tutik kꞌopetik te ma lekuk te yalojikix te mulawiletik to ta skontrainel te Diose”, te xchie.

¹⁶ Ta spisil ma junuk yoꞌtanik yuꞌun, spisil ya yixta-kꞌoptayik, y jaꞌ nax ya sleik te ya staik te tut jaꞌ nax ya skꞌupinik stukelik. Sok toybajel ya xkꞌopojik. Teme ay tut ya yalbeyik lek skꞌoplal yuꞌun te yanetike, yuꞌun jaꞌ nax ya skꞌan yoꞌtanik te ay tut ya staik ae.

Stsitselik te hermanoetike

¹⁷ Pero te jaꞌexe, kermanotak te kꞌuxex ta koꞌtane, naꞌaik me te tut la yalik te apostoletik yuꞌun te Kajwaltik Jesucristoe.

¹⁸ Jich la yaltalanbeyex jilel: “Ta slajibal kꞌaal ay me gente ya xlaj iktiwan, te jich aylan sok te tut ma lekuk ya skꞌan yoꞌtanike”, te xchie.

¹⁹ Jaꞌ bi jaꞌ te machꞌatik ya yakꞌik dibisione. Jaꞌ nax ya sleik te tut ya skꞌan stiꞌbalulike, y maꞌyuk yikꞌojik te Espíritu yuꞌun te Diose.

²⁰ Pero te jaꞌexe, kermanotak te kꞌuxex ta koꞌtane, junuk me awoꞌtanik yuꞌun te chꞌul kꞌop achꞌuunejike. Kꞌoponaik Dios ta skuenta te Chꞌul Espiritue.

²¹ Akꞌa abaik ta kanantayel ta skuenta xkꞌuxul yoꞌtan te Diose. Y maliyaik te tut kꞌaalil te ya yaꞌbotik te kuxlejal sbajtel kꞌinale te Kajwaltik Jesucristo, ta skuenta slekil yoꞌtan.

²² Junutesbeya yoꞌtanik te machꞌatik ya xꞌaꞌabiyan yoꞌtanike.

²³ Te yane koltayaik me, lokꞌesaik bael te ba ay te kꞌajkꞌe. Y xpichꞌuk me awoꞌtanik te yanetike, aunke ila me abaik yuꞌun. Y pꞌajaik asta te skꞌuꞌ spakꞌik te machꞌatik ma lekuk xkuxlejalike.

Ay ta chꞌuunel te Diose

^24-25 Te úniko Dios te jKoltawanej kuꞌuntike ta skuenta te Kajwaltik Jesucristoe, ay spoder yuꞌun te ya skꞌanantayex te jaꞌexe, makꞌ yakꞌ xyalex ta mulil ae, yuꞌun jich me ya yikꞌex ochel te ba aye. Ben jun awoꞌtanik te maꞌyuk amulik te ya xkꞌoex ta stojol te ba ay te slekilale. Te stukele ay slekilal, sok ben mukꞌ, sok ay spoder, sok yichꞌoj yaꞌtel, jaꞌ to ta slijkibal to, y te ora to, y ta sbajtel kꞌinal. Jichuk.