San Juan 12 - Nuevo Testamento Tzeltal de Amatenango

Jtul ants la smalbe perpume ta yok te Jesuse

¹ Wakeꞌ xan kꞌaal skꞌan a te kꞌin Pascuae, te Jesuse bajt ta Betania te ba ay te jLazaro te chaꞌkuxesot te ba animaetike.

² Teꞌ xchapik weꞌelil a yuꞌun ya sjoyin sbaik sok ta weꞌel te Jesuse. Te xMartae jaꞌa makꞌlinwan. Jich euk te jLazaroe la sjoyin ta weꞌel ta mexa te Jesuse sok te sjoꞌtake.

³ Te xMariae la yichꞌ tal ol wan litro perpume te nardo sbiil te lom toyol stojole, y la smalbe ta yok te Jesuse. Te nax a la stakutesbe ta stsotsil sjol. Spisil te yut nae noj ta yikꞌ te perpumee.

⁴ Jich te Judas Iscariotee, te jaꞌ jnopojel yuꞌun te Jesuse sok te jaꞌ xnichꞌan te Simone sok jaꞌ te machꞌa la yakꞌ entregal ta patil te Kajwaltike, la yal:

⁵ —¿Tuꞌun te maꞌ chonilub te perpume to? Ya xlokꞌ tresientos denario takꞌin stojol te jichuke, yuꞌun ya yichꞌ koltayel a te meꞌbaꞌetike —xchi.

⁶ Pero te Judase ma jichuk xyal yuꞌun yajtaluk yoꞌtan te meꞌbaꞌetike, yuꞌun jaꞌ ay ta yoꞌtan te elekꞌe. Stukel jtesorero, sok kꞌayem ta yelkꞌanel te takꞌin ya stsobike.

⁷ Te Jesuse la yalbe: —¿Tut yes awuꞌun? Yuꞌun skꞌejojbonix xpoxil jtiꞌbalul te tut ora ya kichꞌ mukele.

⁸ Te meꞌbaꞌetike sil tiempo ajoyinejik stukel. Pero te joꞌone ma siluk tiempo te joyinejexe —xchi.

Chapbot skꞌoplal ta milel te jLazaroe

⁹ Ay bayal juriyoetik la yaꞌiyik te ay ta Betania te Jesuse, jicha laj bajtik teꞌa. Ma jaꞌuk nax a ba yilik te Jesuse, jaꞌa ba yilik euk te jLazaroe te chaꞌkusesot yuꞌun te Jesuse.

¹⁰ Jich te stataletik yuꞌun te saserdoteetike la xchapbeyik skꞌoplal ta milel euk te jLazaroe,

¹¹ porke stukel ta skaj te bayal juriyoetik ya spit sbaik lokꞌel te ba ayike yuꞌun xba xchꞌuunik te Jesuse.

Te Jesuse och bael ta Jerusalen

¹² Ta xchebal kꞌaal ay bayal genteetik te ya xlaj bajt ta Jerusalen yuꞌun te kꞌin Pascuae. La yaꞌibeyik sluwar te ya xtalix ta Jerusalen te Jesuse.

¹³ Jich a sbojtalanik tal skꞌab palmera-teꞌ y lokꞌ staik te Jesuse. Xꞌawlajanik ta yalel: —¡Ben tsaꞌam te machꞌa talemix ta stojol te Kajwaltike! ¡Ben tsaꞌam slekil! ¡Ben tsaꞌam slekil te Rey yuꞌun te Israele! —xchiik.

¹⁴ Te Jesuse la sta jkojt chꞌin buru y mo a, jich tutꞌil ya yal te Sjun Diose:

¹⁵ “Ma me xiꞌan, mukꞌul jtejklum Sion. Ila awil te Rey awuꞌunike, moem tal ta jkojt chꞌin buru”, xchi me.

¹⁶ Te jnopojeletik yuꞌune ta slijkibal nax maꞌ snaꞌbeyik sluwar te tutiꞌ yilik xkꞌot ta pasele. Pero ta patil te kꞌalal akꞌotix ta ilel slekilal a te Jesuse, tal ta yoꞌtanik te spisil te tuti kꞌot ta pasele, jaꞌ te tut tsꞌibabil jilel ta stojole.

¹⁷ Te genteetik te teꞌeyik sok a te Jesus te kꞌalal la yikꞌ tal lokꞌel te jLazaroe te ba mukꞌul y te la xchaꞌkuses tal te ba animaetike, jaꞌ a ba yalik te tutiꞌ yilike.

¹⁸ Jaꞌ yuꞌun te genteetik lokꞌ staik te Jesuse, porke la yaꞌibeyik sluwar te seña smilagro te la spase.

¹⁹ Pero te fariseoetike lijk yalbe sbaik: —Ila awilik, ma xjuꞌix kuꞌuntik skomel. Yuꞌun spisil a bajtikix sok te Jesuse —xchiik.

Ay griegoetik ya sleik te Jesuse

²⁰ Ay griegoetik kapal sok te machꞌatik baemik ta Jerusalen ta skejanel sbaik yuꞌun te kꞌine.

²¹ Te griegoetik to tijilajik tal te ba ay te jFelipee te talem ta Betsaida te jun jtejklum yuꞌun Galileae. Ba skꞌanbeyik pawor ta stojol: —Mam bankil, ya jkꞌan kiltik euk te Jesuse —xchiik.

²² Te Felipe ba yalbe te jꞌAndrese, y chebalik ba yalbeyik te Jesuse.

²³ Te Jesuse jich a yaltalanbe: —Kꞌotix yorail te ya xꞌakꞌot ta ilel slekilal te Nichꞌanile.

²⁴ Jamal ya kalbeyex, teme ay pꞌejuk sbakꞌ triwu teme makꞌ xtꞌuxaj koel sok makꞌ xkꞌaꞌ ta lume, sigue yal jpꞌej. Pero teme kꞌaꞌe, bayal ya yakꞌ sit.

²⁵ Te machꞌa ya xkuxutay te xkuxlejale, ya me xchꞌay. Pero te machꞌa makꞌ xkuxutay xkuxlejal liꞌ ba balmilale, ya xkuxuyin sbajtel kꞌinal stukel.

²⁶ Teme ay machꞌa ya skꞌan yakꞌ sba ta tuuntesel kuꞌune, a me stsꞌakliyon te ba ya xboone. Y te ba ya xkꞌoone, te ya xkꞌot ekꞌa te machꞌa ya xtuun kuꞌune. Te machꞌa ya yakꞌ sba ta tuuntesel kuꞌune kꞌanbil me yuꞌun te jTate.

Te Jesuse ya yal te tutꞌil ya xchame

²⁷ “Te ora to bayal ayon ta ajtal-oꞌtan. ¿Y tut ya kal? ¿Me ya wan kal: “jTat, koltayaon yuꞌun te wokol to”, me xchon wan? Pero puersa jaꞌ talemon yuꞌun.

²⁸ JTat akꞌa ta ilel te slekilal abiile —xchi te Jesuse. Jicha chiknaj jun kꞌop ta chꞌulchan. Jich a yal: —La kakꞌix ta ilel slekil te jbiile, y ya me kakꞌ xan ta ilel —xchi.

²⁹ Te gente te teꞌelan ae la yaꞌiyik sok la skuyik te jaꞌ chauk te kꞌopoje. Pero ay yan la yalik: —Chꞌul ángel wan a kꞌoponot yuꞌun —xchiik.

³⁰ Te Jesuse la yaltalanbe: —Ma joꞌukon ta jkaj te kꞌopoj te jTate; jaꞌex ta akajik.

³¹ Te ora to jaꞌix yorail te ya xꞌichꞌbot jkuenta smulik spisil te genteetike. Y te ora to yorailix te ya xchꞌojot lokꞌel te machꞌa ya spas mantal liꞌ ba balmilale.

³² Pero te kꞌalal ya kichꞌ jachel moel liꞌ ba lume, joꞌon mismo ya kikꞌ tal ta jtojol spisil te genteetike —xchi.

³³ Jaꞌ to jaꞌ a yakꞌ ta naꞌbeyel sluwar te tutꞌ ya xchame.

³⁴ Te gentee la yalik: —Kaꞌiyejtik te tut ya yal te mantaliletik te kuxul sbajtel qꞌuinal te Cristoe. ¿Tutꞌil kꞌoem yuꞌun te jich ya awal te puersa ya yichꞌ jojkꞌanele te Nichꞌanile? ¿Machꞌaa te Nichꞌanil ta akꞌope? —xchiik.

³⁵ Te Jesuse la yaltalanbe: —Ay to me ta awolilik te machꞌa sakuben kꞌinal yuꞌune. Pero ma jaluk xan kꞌaal te ya ajoyinike. Benanik me yuꞌun liꞌ to xan me ay te sakil kꞌinal ta atojolike. Yuꞌun ma me xchꞌayemuk awoꞌtanik ya staex te ijkꞌal kꞌinale. Porke te machꞌa ya xbeen ta ijkꞌal kꞌinale ma snaꞌ ba ya xbajt.

³⁶ Chꞌuunaik me te sakil kꞌinale yuꞌun liꞌ to xan me ay awuꞌunik to, yuꞌun jich me yuꞌun ya xkꞌoex te sakil kꞌinale —xchi te Jesuse. Ta patil kꞌalal laj yoꞌtan te yalel to, bajt te Jesuse. Ma yilik ba bajt.

Te juriyoetike maꞌ xchꞌuunik te Jesuse

³⁷ Manchuk me bayal señaetik smilagro a akꞌtalanbot yilik, pero ma xchꞌuunik te Jesuse,

³⁸ yuꞌun jich me ya xkꞌot ta pasel te tut stsꞌibaye jilel te jꞌalwanej Isaiase: “Kajwal, ¿me ay machꞌa xchꞌuunix te tut kalojbetik jile? ¿Me ay machꞌa aꞌbotix yil spoder te Kajwaltike?” xchi me.

³⁹ Jaꞌ yuꞌun maꞌ juꞌ yuꞌunik xchꞌuunel, yuꞌun jich stsꞌibayej jilel te jꞌIsaiase:

⁴⁰ “Dios a xchokutesbe sitik sok la stulantesbe yoꞌtanik, yuꞌun jich ma xyilik a, ni ma xyaꞌibe sluwar a te tut ya xꞌaltalanbote. Jich ma sujtes yoꞌtanik ta jtojol, y te joꞌone makꞌ jlekutes”, xchi me.

⁴¹ Te jꞌIsaiase jich a yal to, porke yilojbe slekil te Jesuse, sok jaꞌ mismo te la yalbe skꞌoplale.

⁴² Pero bayal juriyoetik la xchꞌuunik te Jesuse sok ay a xchꞌuunik euk te statal yuꞌunike. Pero ma xyal sbaik ta jamal yuꞌun ya xiꞌik te fariseoetik yuꞌun jich makꞌ xtenot lokꞌel a te ba sinagogae.

⁴³ Yuꞌun jaꞌ bayal skꞌoplal ta yoꞌtanik te jaꞌuk lek ya xꞌilot yuꞌun te genteetike, ma jaꞌuk tulan skꞌoplal ta yoꞌtanik teme lek ya xꞌilot yuꞌun te Diose.

Te skꞌop te Jesuse jaꞌ ya yakꞌ chiknajuk a te machꞌa ma tsaꞌamuke

⁴⁴ Te Jesuse tulan a kꞌopoj, jich a yal: —Te machꞌa ya xchꞌuunone ma joꞌukon nax te ya xchꞌuunone; jaꞌ ya xchꞌuun euk te jTat te la stikonon tale.

⁴⁵ Te machꞌa ya yilonixe, jaꞌa yilix euk te Machꞌa la stikonon tale.

⁴⁶ Joꞌon te sakil kꞌinal te talemon ta balmilale. Te machꞌa ya xchꞌuuunone makꞌ xjilix ta ijkꞌal kꞌinal.

⁴⁷ Pero te machꞌa ya yaꞌibon sluwar te jkꞌope, teme ma xchꞌuune, ma joꞌukon ya kal te ya xꞌakꞌot ta chꞌayel yuꞌune. Porke ma jaꞌuk talemon yuꞌun te ya kakꞌ bael ta chꞌayel te genteetike. Jaꞌ talemon yuꞌun te ya jkoltay.

⁴⁸ Te machꞌa ya spꞌajone y teme ma xyakꞌ ta jkuenta te jkꞌope, ay me machꞌa te ya xꞌakꞌot bael ta chꞌayel yuꞌune: Te jkꞌop te la kalixe jaꞌ ya xꞌakꞌot bael ta chꞌayel yuꞌun ta slajibal kꞌaal.

⁴⁹ Porke ma joꞌukon jkꞌop te ya kale, ja skꞌop te jTat te la stikonon tale. Jaꞌ yalojbon mantal te tut ya kale sok te tut ya kakꞌ ta nopele.

⁵⁰ Y jnaꞌojbe sluwar te smantal te jTate, jaꞌ te kuxlejal sbajtel kꞌinale. Jaꞌ yuꞌun te tut ya kale, ya kal te tut yalojbon tal ta mantal te jTate —xchi te Jesuse.