Hechos 8 - Nuevo Testamento Tzeltal de Amatenango

Te Saulo la yilbajinlan te hermanoetike

¹ Te Sauloe teꞌey ekꞌa, la yakꞌ sba ekꞌa te milot te jꞌEstebane. Te kꞌaal abi lijk ta jun gran tenel te hermanoetik te ayik ta Jerusalene. Spisilik a pujkejik bael te hermanoetik ta estadoetik yuꞌun Judea sok ta Samaria. Ja xanix a laj jil ta Jerusalen te apostoletike.

² Te machꞌatik ben jun yoꞌtan xchꞌuunejik te Diose la smukbeyik stiꞌbalul te jꞌEstebane y beno yokꞌetayik.

³ Te Sauloe ma laj yoꞌtan ta yilbajinel te hermanoetike. Ya xꞌoch kꞌael ta nanatik y ya xochtalan lokꞌel te winketik sok te antstike, y spisil ya xba yakꞌtalan ta prexo.

Alot te lek achꞌ kꞌop ta Samariae

⁴ Pero te machꞌatik lokꞌik bael ta anel ta Jerusalene lijk yalik te lekil achꞌ kꞌope chikan te ba laj bajte.

⁵ Te Felipee bajt ta mero jtejklum yuꞌun Samaria, y lijk yalbe skꞌoplal teꞌa te Cristoe.

⁶ Te gentee la stsobilan sbaik y spisilik la yaꞌiybeyik sluwar te tut a yal te Felipee, yuꞌun la yilik señaetik y milagroetik te la spase.

⁷ Ben bayal machꞌatik ay pukuj ta yoꞌtanik te lekuteslanote. Y te pukujetike xꞌawlajan ya xlaj lokꞌ bael ta stojolik. Sok ay bayal machꞌatik kꞌolbil xchial yok-skꞌab y sok koxoetik a laj lekub yuꞌun.

⁸ Jaꞌ yuꞌun te machꞌatik ayik ta jtejklume ben jun yoꞌtanik yuꞌun.

⁹ Pero ay jtul winik teꞌa Simon sbiil te snopoj uulil te nailtoe, sok te sloꞌlayej te gente yuꞌun Samariae yuꞌun ya yal te stukel ben tulane.

¹⁰ Spisilik chꞌin ta mukꞌ ya yaꞌiybeyik sluwar te tut ya yale, y ya yalik: —Jaꞌ to, jaꞌ te machꞌa yichꞌojbeyix tulan spoder Diose —xchiik yuꞌun.

¹¹ Y yakꞌojik ta jkuenta yuꞌun bayalix tiempo te sloꞌlaylanej yuꞌun te tut ma tsaꞌamuk snopoje.

¹² Pero te kꞌalal la xchꞌuunik te lekil achꞌ kꞌop te albot yuꞌun te Felipee te tutꞌil ay ta ajwalinel te Diose y sok te Jesucristoe, ta winketik sok ta antstik la yichꞌtalan jaꞌ.

¹³ Y jich euk te Simone la xchꞌuun y la yichꞌ jaꞌ y lijk sjoyin ta beel te Felipee. Lom yajtal yoꞌtan yuꞌun te la yil mukꞌul señatik y milagroetike.

¹⁴ Kꞌalal la yaꞌiybeyik sluwar te apostoletik te ayik ta Jerusalene te la xchꞌuunikix skꞌop Dios te samariaetike, la stikonik bael teꞌa te jPedroe sok Juane.

¹⁵ Kꞌalal laj kꞌot teꞌae, la skꞌoponbeyik Dios te hermanoetik ta Samariae yuꞌun ya xꞌaꞌbot yikꞌik te Chꞌul Espiritue.

¹⁶ Porke ma to xjul ta skuentaik ni jtuluk a te Chꞌul Espiritue, jip to nax a te la yichꞌik jaꞌ ta sbiil te Kajwaltik Jesuse.

¹⁷ Jich te jPedro sok te Juane la skajanlambe skꞌab ta sjolik, y jich a yikꞌtalanik ta yoꞌtanik te Chꞌul Espiritue.

¹⁸ Te Simone la yil te tal te Chꞌul Espíritu kꞌalal te apostoletik te skajanojbe skꞌab ta sjolik ae. La sjaptalanbe takꞌin

¹⁹ y la yaltalanbe: —Aꞌbikon euk te poder me to, yuꞌun te machꞌa ya jkajanbe jkꞌab ta sjole jich me ya yikꞌik euk te Chꞌul Espiritue —xchi.

²⁰ Jich te jPedroe la sjakꞌbe: —Pajal baan ta chꞌayel sok te atakꞌine, yuꞌun akuyoj te ay ta manel ta takꞌin te tut majtanil ya yakꞌ te Diose.

²¹ Te jaꞌate ni maꞌyuk ta akuenta spasel to, porke ta sit te Diose ma tojuk awoꞌtan.

²² Chꞌoja jilel te tut ma tsaꞌamuk ay ta awoꞌtane, y kꞌanbeya pawor te Diose te yauk spasbeyat perdon yuꞌun te tuti anopoj ta awoꞌtane.

²³ Porke chikan ya kil te nojel ta awoꞌtan te bikꞌtal-oꞌtanile, sok te jaꞌ xchukojat te tut ma tsaꞌamuke —xchi te jPedroe.

²⁴ Te Simone la sjakꞌ: —Kꞌoponbikon me Kajwaltik ta jtojol yuꞌun jich me makꞌ xkꞌot ta jtojol a te tut la awalbikone —xchi.

²⁵ Jich te apostoletike ta patil te laj yalik te skꞌoplal te skꞌop Diose, sujtik bael ta Jerusalen. Te kꞌalal yipalik kꞌael ta beel ae, ya yalik kꞌael te lekil achꞌ kꞌop te ba kolonyaetik yuꞌun Samariae.

Te Felipee sok te etiope-winike

²⁶ Te Felipe kꞌoponot yuꞌun jtul chꞌul ángel yuꞌun te Kajwaltike: —Jajchan y baan ta stojol sur ta sbeelel Jerusalen te koel ya xbajt ta jtejklum Gazae —xchi. Te be to ya xkꞌax ta jojchol tꞌantꞌan luwar.

²⁷ Te Felipee jajch bael y bajt, y te ba bee la sta jtul winik te talem ta Etiopiae. Eunuko te winike, tulan yaꞌtel yichꞌoj ta skanantaybeyel skꞌulejal te Candace sbiil te ants te rey yuꞌun te etiopiaetike. Te winike xkꞌotuk ta Jerusalen te xkꞌo skejan sba tal ta stojol Diose.

²⁸ Sujtelix ay bael ta slumal a, nakal kꞌael ta skarreta. Yipal kꞌael ta yilel te sjun Isaiase te jꞌalwanej yuꞌun Dios.

²⁹ Te Felipee albot yuꞌun te Chꞌul Espiritue: —Tijilajan bael te ba karretae y joyina bael —xchi.

³⁰ Te kꞌalal tijilaj bael te Felipee la yaꞌi te yipal kꞌael ta yilel te sjun Isaias te etiope-winike. Jich a sjojkꞌobe: —¿Me ya anaꞌbe sluwaril te tut yipalat ta yilele? —xyut.

³¹ Te etiope-winike la sjakꞌbe: —¿Tutꞌil kꞌan jnaꞌbe sluwar te maꞌyuk machꞌa ya yalbon sluware? —xchi. Sok la yalbe te Felipee te yauk xmo sjoyin ta nakleje.

³² Te ba yipal kꞌael ta yilel te Sjun Diose jaꞌ te jich ya yale: “Ikꞌot bael ta milel jich tutꞌil jkojt karnera te ba ya xmilote. Jicha kꞌot tutꞌil jkojt chꞌin yal karnera te makꞌ xꞌokꞌ te kꞌalal ya xjoxbot stsotsile, jich ma kꞌopoj euk.

³³ La yichꞌ ilbajinel y maꞌ chapot. ¿Machꞌa kꞌan snaꞌ yalel te stsꞌumbale? Porke ora lajinbot yora ta balmilal”, te xchie.

³⁴ Te etiope-winike la yalbe te Felipe: —Awokoluk albon: ¿Machꞌa skꞌoplal a yalbe te jꞌalwaneje? ¿Me stukel mismo skꞌoplal, o ay yan machꞌa skꞌoplal a yalbe? —xchi.

³⁵ Jich te Felipee jaꞌ mismo a lijk yalbe tut ay sluwar te Sjun Dios te yipal ta yilel te etiope-winike, jaꞌ lijk yalbe sluwar te lekil achꞌ kꞌop yuꞌun te Jesuse.

³⁶ Te kꞌalal yipalik kꞌael ta beel ae, ay jaꞌ a staik te tiꞌbe. Te etiope-winike la yal: —Ay jaꞌ liye. ¿Me ma spas te ya kichꞌ jaꞌe? —xchi.

³⁷ Te Felipe la yalbe: —Teme spꞌejel awoꞌtan ya achꞌuune, ya spas ya awichꞌ te jaꞌe —xchi. Y te winike la sjakꞌ: —Ya jchꞌuun te jaꞌ Xnichꞌan Dios te Jesucristoe —xchi.

³⁸ Jich a yal mantal te ya xkom te skarretae. Te Felipee sok te winike laj ko bael ta ba jaꞌe, y la yaꞌbe ichꞌjaꞌ.

³⁹ Te kꞌalal lokꞌik tal ta jaꞌe, te Espíritu yuꞌun te Kajwaltike ora nax a yikꞌ bael te Felipee, y te etiope-winike ma staꞌix ta ilel a. Pero lijk xan bael ta beel, ben jun kꞌael yoꞌtan.

⁴⁰ Te Felipee kꞌo to chiknajuk ta jtejklum Azoto y kꞌax ta jujun jtejklum te ba la yal kꞌael te lekil achꞌ kꞌope asta kꞌot ta jtejklum Cesarea.