Hechos 4 - Nuevo Testamento Tzeltal de Amatenango

Te jPedro sok te Juane ikꞌot bael ta stojol jꞌuꞌeletik

¹ Yipal to ta kꞌop a te jPedro sok te Juane ta stojol te genteetike kꞌalal laj kꞌot te saserdoteetik sok te statal yuꞌun te jkanan-temploe y sok te saduseoetike.

² Ben ilinemik porke te jPedroe sok te Juane ya snojpeslan te gente yuꞌun te jtejklume, yuꞌun ya yalik te chaꞌkuxel yuꞌun te animaetike jaꞌ yakꞌoj jilel ta ilel te tutꞌil chaꞌkux tal teꞌa te Jesuse.

³ Malix kꞌaal a la stsakik bael y la yotsesik ta prexo, jaꞌ to ta xchebal kꞌaal a.

⁴ Pero bayal te machꞌatik la xchꞌuunik te tuti altalanbot yuꞌun te jPedro sok te Juane. Y pꞌol te hermanoetike, jip ajtabil a te winketike ay wan sinko mil ta jtul.

⁵ Ta xchebal kꞌaal la stsob sbaik ta Jerusalen te stataletik yuꞌun te juriyoetike sok te moletike sok te maestroetik yuꞌun te mantaliletike.

⁶ Teꞌey ekꞌa te statal saserdote Anase sok te jCaifase sok te Juane sok te jꞌAlejandroe, sok spisil te machꞌa stsꞌumbal sbaik sok te statal saserdotee.

⁷ La yalik mantal te ya yikꞌik lokꞌel te jPedro sok te Juane, la stejkꞌanik ta yolilik, y lijk sjojkꞌobeyik: —¿Machꞌa yakꞌojbeyex orden, o machꞌa ta sbiil te tutik ya apasike? —xchiik.

⁸ Te jPedroe nojel ta yoꞌtan te Chꞌul Espiritue la sjakꞌtalanbe: —Stataletik yuꞌun te jtejklume y moletik,

⁹ te jaꞌexe ya ajojkꞌobotik te tut lek a juꞌ ta pasel yuꞌun te jchamele, yuꞌun ya ajojkꞌoyik te tuti lekube.

¹⁰ Lek ay, ya kaltik ta jamal ta atojolik, yuꞌun jich ya snaꞌik a spisil te jtejklum israele. Te winik te liꞌiyix ta atojolike, ta skuenta te Jesucristo te talem ta Nazarete jich lekubenix. Jaꞌ mismo te jaꞌex la ajojkꞌanik ta kruse, y te Dios a chaꞌkusesot tal yuꞌun te ba ay te animaetike.

¹¹ Jaꞌ to jaꞌ te Jesus “te ton te pꞌajbil yuꞌun te jꞌalbañiletike, pero jaꞌ sujtemix ta yipajib xchikin na”, te xchi skꞌoplale.

¹² Maꞌyuk yan machꞌa ay kolel ta skuenta, porke maꞌyuk yan machꞌa ya xkolotik yuꞌun. Maꞌyuk yan biilil ta balumilal te ya xjuꞌ xkolotik yuꞌune —xchi te jPedroe.

¹³ Kꞌalal ya yil te jꞌuꞌeletik te makꞌ ya xiꞌ te jPedro sok te Juane, y la snaꞌik te maꞌyuk estudio yuꞌunike sok te maꞌyuk tut ya snaꞌike, lom yan a yaꞌiyik yuꞌun, y la snaꞌik te jaꞌ te la sjoyinik te Jesuse.

¹⁴ Te tutꞌil te tekꞌel ta sitik a te winik te lekubenixe, jich ma snaꞌik tuti yalikix a.

¹⁵ Jich a stikonik lokꞌel te ba tsobolik te jPedro sok te Juane, y talel bael a lijk yaꞌbiyanik jilel.

¹⁶ La yalik: —¿Tut ya jpastik yuꞌun te winketik to? Spisil te genteetik yuꞌun te Jerusalene snaꞌojik te spasoj te seña milagroe, y ma xjuꞌ kuꞌuntik te ya kaltik te ma jichuke.

¹⁷ Pero yuꞌun ma sigueuk ya xpujk a te kꞌop to, jaꞌ lek tulan ya kalbetik mantal yuꞌun liꞌ nax kꞌalal to makꞌ yalbeyikix skꞌoplal sbiil a te Jesuse —xchiik ta snopel.

¹⁸ Jicha ba yikꞌik xan tal ochel y tulan a yalbeyik te makꞌ yakꞌikix ta nopel a te skꞌoplal sbiil te Jesuse.

¹⁹ Pero te jPedro sok te Juane la sjakꞌtalanbe: —Nopaik ta lek awaꞌiy te jaꞌexe: ¿me jaꞌ lek ya jchꞌuuntik te tut ya awalike, o jaꞌ lek ta stojol Dios ya jchꞌuuntik te tut yal te Diose?

²⁰ Te joꞌotike ma xjuꞌ ya jkom jbatik ta yalel te tut kilojtike sok te tut kaꞌiyejtike —xchiik.

²¹ Te jꞌuꞌeletike tulan a yalbeyik, y la skolesik bael. Yuꞌun ma stabeyik te tut ya yaꞌbeyik kastigo yuꞌune. Porke spisil te gentee ya yalbeyik kola yal Dios yuꞌun te tut kꞌoem ta pasele.

²² Te winik te lekub yuꞌun te seña milagroe kꞌaxemix kuarenta jaꞌbil te yaꞌbilale.

Te hermanoetike la skꞌanbeyik Dios te ayuk spuersa yoꞌtanike

²³ Te jPedro sok te Juane kolikix bael a ba stsob sbaik sok te sjoꞌtake. Kꞌo yaltalanbe spisil te tuti altalanbot yuꞌun te statal saserdoteetike y sok te moletike.

²⁴ Kꞌalal laj yaꞌiyike spisilik, jun nax a skꞌoponik Dios. La yalik: —Kajwal, jaꞌat la apas te chꞌulchan sok te balmilale y sok te mare y spisil te tutik aye.

²⁵ Te jaꞌate la awal ta skuenta te Chꞌul Espiritue ta stiꞌ te awaj-aꞌtel jDavide: “¿Tut yuꞌun te ya xlijk kꞌop yuꞌun te jtejklumetike? ¿Sok tut yuꞌun te ya snopik te jowil naxe?

²⁶ Te reyetik sok te gobiernoetik ta balmilale tulan ya stejkan sbaik. Ya snopik ta jun nax sok te stataletike te ya skontrainik te Kajwaltik Diose sok te Cristo te tsabil yuꞌune”, xchi me.

²⁷ Jichix a spas te Herodese sok te Poncio Pilatoe. La stsob sbaik liꞌ ba jtejklum to sok te jyanlumetik y sok te israeletike, la skontrainik te achꞌul awaj-aꞌtel Jesus te jaꞌ Cristo te tsabil awuꞌune.

²⁸ Jich a spasik spisil te tut chapal awuꞌun ta primeroe te puersa jich ya xkꞌot ta pasele.

²⁹ Te ora to Kajwal, ilawil te tut tulan a yalbotike, y aꞌbotik me spuersa koꞌtantik ta yalel achꞌul kꞌop joꞌotik te awaj-aꞌtelotike, ma me awakꞌ xiꞌukotik.

³⁰ Sok ta skuentauk apoder aꞌ koluk jchameletik y aꞌ pasuk seña milagroetik ta sbiil te achꞌul awaj-aꞌtel Jesuse —xchiik.

³¹ Te kꞌalal laj yoꞌtanik ta skꞌoponel te Diose, nijkꞌ te luwar ba stsoboj sbaike. Y spisil a noj ta yoꞌtanik te Chꞌul Espiritue, y jamal a lijk yalik te skꞌop Diose.

Spisil te stutik yuꞌunike komon a tuun yuꞌunik

³² Spisil te hermanoetike te lom bayalikixe jun nax te tut ya snopike y jun nax te xchꞌulelike. Maꞌyuk machꞌa yal te stukel yuꞌun te stutik yuꞌune, sinoke jun nax yuꞌunik ta spisilik.

³³ Te apostoletike sigue ay spuersa yoꞌtanik ta yalel te tutꞌil a chaꞌkux tal te Kajwaltik Jesuse. Y Dios bayal a akꞌtalanbot bendision yuꞌun.

³⁴ Y maꞌyuk machꞌa ay swokol ta yolilik, porke te machꞌa ay slume o snae la xchontalanik, y te takꞌine

³⁵ la yakꞌbeyik ta skꞌab te apostoletike. Jich a spukik te takꞌine chikan te tut nesesidad yuꞌun ta juju-tul te hermanoetike.

³⁶ Jich tutꞌil te jtul levita winik te Jose sbiil, te ay slumal ta Chipre te joybil ta mare, jaꞌ te machꞌa aꞌbot sbiilin Bernabe yuꞌun te apostoletike (ja te “ya sjunutesbotik koꞌtantik” xchi kꞌoem te sbiile).

³⁷ Te winik to ay slum te la xchone, y te stojole la yichꞌ tal, la yaꞌbe ta skꞌab te apostoletike.