Hechos 3 - Nuevo Testamento Tzeltal de Amatenango

Jtul koxo a lekub

¹ Ay jun kꞌaal te jPedroe sok te Juane laj bajt ta templo las tres mal kꞌaal a, jaꞌ yorail a te skꞌoponel Diose.

² Te ba temploe teꞌe jtul koxo-winik a te jich a ayine. Jujun kꞌaal ya xꞌikꞌot bael te ba ti puerta te Ben Tsaꞌam sbiil xꞌalbote, yuꞌun ya xkꞌanbaj te ba ya xꞌoch bael te machꞌatik ya xꞌochik ta temploe.

³ Te koxo-winike la yil te jPedro sok te Juane, te ya xlaj ochix bael a te ba temploe. La skꞌan smajtan takꞌin.

⁴ Te jPedro sok te Juane la yalbeyik: —Kꞌeluyaotik —xyutik.

⁵ Te koxo-winike la xchꞌunan sba yuꞌun la skuy te ay tut ya xꞌaꞌbote.

⁶ Pero te jPedroe la yalbey: —Maꞌyuk plata ni oro kuꞌun. Pero te tut ay kuꞌune ya kaꞌbeyat. Ta skuenta te Jesucristo ta Nazarete jajchan y benan —xchi te jPedroe.

⁷ Te tutꞌil jich a yale, te jPedroe la xchechbe te sbatsꞌil kꞌabe y la xjach. Ora nax la yichꞌ spuersa xchebal te yoke sok te snuk yoke.

⁸ Te koxo-winike ora nax tejkꞌaj jajchel, y lijk bael ta beel. Te nax a sjoyinejik ochel ta templo. Yipal ta beel sok ta wilel, sok yipal ta yalbeyel kola yal te Diose.

⁹ Spisil te machꞌatik la yilik te ya xbeen kꞌael sok te yipal ta yalbeyel kola yal te Diose.

¹⁰ La snaꞌbeyik sba te jaꞌ te machꞌa ya xnajkaj ta kꞌambajel ta tiꞌ templo, te Ben Tsaꞌam ya xꞌalbote. Lom yan a yilik te tuti kꞌot ta pasele.

Kꞌopoj te jPedro te ba yamakꞌ te Salomon ya xꞌalbote

¹¹ Te koxo-winik te lekubenixe ma skoles te jPedro sok te Juane. Sok ay yajtal yoꞌtanik spisil te gentee. Xyalajan tal lokꞌel te ba temploe, laj tal te ba yamakꞌ te Salomone te ba ay te winik sok te jPedro y te Juane.

¹² Kꞌalal jich a yil te jPedroe, lijk yaltalanbe: —Jaꞌex israeletik, ¿tuꞌun te toj cham la awaꞌiyike? ¿Tuꞌun te lek ya akꞌelubotik jsitike? ¿Meꞌn ya akuyik te joꞌotik aꞌ jlekutestik te winik to, o ya akuyik te la kakꞌtik benuk ta jpodertike, o jaꞌ ta skuenta te lek jchꞌuunejtik te Diose?

¹³ Te Dios yuꞌun te jꞌAbrahame sok te jꞌIsaake sok te Jacobe, te Dios yuꞌun te antibo ameꞌ-atatike yakꞌojix ta akꞌel ta jkuenta ta mas te yaj-aꞌtele, jaꞌ te Jesuse, jaꞌ te machꞌa la awakꞌik entregal ta stojol te jꞌuꞌeletike. Jaꞌ te machꞌa kꞌan skoles te jPilatoe, pero te jaꞌexe ma la akꞌanik.

¹⁴ Ma la akꞌanik te ya xkol te machꞌa lek y toje; te jaꞌexe jaꞌ la akꞌanbeyik skolel te machꞌa beno smule.

¹⁵ Y jich la amilik te machꞌa ya yikꞌotik bael ta kuxlejale. Pero Dios a xchaꞌkuses tal te ba ay te animaetike, y joꞌotik testigootik yuꞌun.

¹⁶ Te tutꞌil ayix spuersa yok te winik to te ya awilik te ya anaꞌbeyik sbae, jaꞌ ta xchꞌuunel-oꞌtanil ta skuenta te Jesuse. Te xchꞌuunel-oꞌtanil ta skuenta te Jesuse jaꞌ te batsꞌi la slekutesix te winike te tutꞌil tekꞌelix ta asitike.

¹⁷ La jnaꞌix kermanotak te jaꞌex sok te statal awuꞌunik la amilik te Jesuse yuꞌun ma la anaꞌbeyik sluwar te tut la apasike.

¹⁸ Pero jaꞌ a spas kumplir te tut yaloj te Dios ta skuenta spisil te jꞌalwanejetik yuꞌune, te puersa ya xkꞌax swokol te Cristo yuꞌune.

¹⁹ Jaꞌ yuꞌun sujtesa awoꞌtanik ta stojol Dios te jaꞌexe y sujtesa awoꞌtanik yuꞌun te amulike. Jich me ya xchꞌaybeyex te amulike. Jich me ya sta yorail yuꞌun te Kajwaltik te ya slekutesexe,

²⁰ sok te ya stikombeyex tal te Jesus te jaꞌ te Cristo te tsabil yuꞌun Dios ta primeroe.

²¹ Ya skꞌan te ya to xꞌanin ta chꞌulchan te Jesucristo jaꞌ to teme la sta yorail yuꞌun Dios te ya xchap ta achꞌ spisil te tutik aye, jich tutꞌil te la yal ta skuenta te chꞌul jꞌalwanejetik te kꞌaxik ta balmilal te nameye.

²² Te jMoisese la yalbe te antibo jmeꞌ-jtatike: “Te Kajwaltik Diose ya me yaꞌbeyex tal jtul jꞌalwanej te ya xchiknaj ta awolilik jich tutꞌil te la xchiknateson te joꞌone. Chꞌuunbeyaik me spisil te tut ya yalbeyexe,

²³ porke spisil te machꞌa ma xyaꞌbe ta jkuenta te skꞌope, ya me xtenot lokꞌel yuꞌun te ba jtejklume.

²⁴ “Y spisil te jꞌalwanejetike jaꞌ to kꞌalal ta Samuel sok te yan jꞌalwanejetike jich a yalbeyik tal skꞌoplal te tut yipalix ta kꞌoel ta pasele.

²⁵ Joꞌotik kuꞌuntik te tut yaloj Dios ta skuenta te jꞌalwanejetike, y jaꞌ kuꞌuntik euk te tut yaloj Dios te trate sok te antibo jmeꞌ-jtatike. Yuꞌun te Diose la yalbey te jꞌAbrahame: “Spisil te nasionetik yuꞌun te balmilale ya me yichꞌ bendision ta skaj te atsꞌumbale”, xchi me.

²⁶ Te kꞌalal la xchaꞌkuses tal Xnichꞌan te Diose, primero a stikombeyex tal yuꞌun tal yaꞌbeyex bendision, yuꞌun jich me ya asujtes awoꞌtanik yuꞌun te amulike —xchi te jPedro.