Hechos 1 - Nuevo Testamento Tzeltal de Amatenango

Jesus a yal te ya xtal te Chꞌul Espiritue

¹ Jaꞌat Teófilo, te ben lek awoꞌtane, te primero jun te la jpasbeyate la jtsꞌibaj teꞌa spisil te tuti spas te Jesuse y tuti nojpeswan kꞌalal ta slijkibal

² jaꞌ to te kꞌalal ikꞌot moel ta chꞌulchane. Te kꞌalal ma to xbajt ta chꞌulchan ae, la stꞌuj te apostoletike. Ta skuenta te Chꞌul Espiritue la spas jilel ta mantal te tut ya skꞌan spasike.

³ Y ta patil, te kꞌaxix tal yuꞌun a te milele, la yakꞌ sba ta ilel ta stekꞌlejal. Klaro a yakꞌtalan ta ilel te tutꞌil kuxulixe. Kuarenta kꞌaal a yakꞌ sba ta ilel ta stojolik. Y la yaltalanbe sluwar te tutꞌil ay ta ajwalinel te Diose.

⁴ Te kꞌalal sjoyinej to a te apostoletike, te Jesuse la yaltalanbe te ma to xlokꞌik bael te ba Jerusalene. La yaltalanbe: —Maliyaik te tut yaloj te Jtat te tut ya yaꞌbeyexe, jich te tuti kalbeyexe.

⁵ Jich te Juane la yaꞌbe yichꞌ jaꞌ te gente ta jaꞌ nax. Pero ma jalukix kꞌaal te jaꞌexe te ya yaꞌbelex awichꞌik te Chꞌul Espiritue —xchi te Jesuse.

Te Jesuse mo bael ta chꞌulchan

⁶ Ta machꞌatik stsoboj sbaik sok te Jesuse la sjojkꞌobeyik: —Kajwal, ¿me yorailix te ya awakꞌ mantalejukotik liꞌ ba jlumaltik israele? —xyutik.

⁷ Te Jesuse la sjakꞌtalanbe: —Te jaꞌexe maꞌyuk ta akuentaik te tut ora sok te tut kꞌaalile. Jaꞌ ay ta skuenta stukel te Tatile te tut ya yakꞌ ta pasele.

⁸ Pero te kꞌalal ya xtal te Chꞌul Espíritu te ya xjul ta akuentaike ya me awichꞌik apoderik. Jich me testigo ya xkꞌoex kuꞌun ta Jerusalen, sok spisil ta estado yuꞌun Judea, sok ta estado yuꞌun Samaria, y sok ta spisil te balmilale —xchi.

⁹ Te kꞌalal laj yoꞌtan ta yalel to, yipalik to ta yilel a, te Jesuse mo bael ta chꞌulchan. Pixot bael ta tokal y maꞌ yilbeyikix sit a.

¹⁰ Yipalik to ta skꞌeluyel tutꞌil a mo bael ta chꞌulchan a te Jesuse, chiknaj ta stsꞌeelik cheb winketik. Ben sak te skꞌuꞌ-spakꞌike.

¹¹ Altalanbot yuꞌun: —Galileo winketik, ¿tuꞌun te sigue ya akꞌeluyik moel te chꞌulchane? Jaꞌ mismo te Jesus te anin ta awolilike te ikꞌotix moel ta chꞌulchane, jich me ya xchaꞌtal xan te tutꞌil la awilik a bajt ta chꞌulchane —xchiik te winketike.

Tꞌujot te jMatias yuꞌun jaꞌ sjelol te Judase

¹² Jich a sjilesik te Wits Olivailtik sbiile, sujtik bael ta Jerusalen te apostoletike. Te nopol nax ay soke, jich snajtꞌil a beenik bael te tutꞌil ya spas xbeenik ta skꞌaalel kuxo-oꞌtane.

¹³ Te kꞌalal laj kꞌot te ba jtejklume, moik bael ta xchaꞌkajal na te baꞌ olanemike. Jaꞌ te jPedro, sok te Juane, te Jacoboe, te jꞌAndrese, sok te Filipee, te jTomase, te jBartolomee, te jMateoe, sok te Jacobo te jaꞌ xnichꞌan Alfeoe, sok te Simon te ay ta skuenta te jkananistae, sok te Judas te yijtsꞌin Jacoboe.

¹⁴ Spisilik ya stsobilan sbaik ta skꞌoponel Dios sok te yijtsꞌinab te Jesuse, sok te xMaria te smeꞌe, y sok te yan xan antstike.

¹⁵ Jaꞌ skꞌaalel a te la stsob sbaik te hermanoetik te ay wan siento beinte ta jtul. Te jPedroe tejkꞌaj y la yaltalanbe:

¹⁶ —Kermanotak, puersa me ya xkꞌot ta pasel te tut tsꞌibabil jilel ta skuenta te Chꞌul Espíritu te tut la yal te jDavide. Jaꞌ te la yalbe skꞌoplal te Judas te la yikꞌ tal te machꞌatik a xchuk bael te Jesuse.

¹⁷ Te Judase, te la joyin jbajtik soke sok te pajal a kichꞌ kaꞌteltik soke,

¹⁸ tojot yuꞌun te tut ma tsaꞌamuk a spase. Te takꞌin a aꞌbote, manot lum a. Teꞌ tꞌuxaj ta koel a, tsapal a jul ta lum te sjole, tꞌom te xchꞌujte, y chepkꞌoj lokꞌel spisil te sbikile.

¹⁹ Te kꞌalal la yaꞌiyik te machꞌatik ayik ta Jerusalene, la yaꞌbeyik sbiilin te luware: Acéldama sbiil a kꞌot. “Stenlej Chꞌich” xchi kꞌoem te sbiile.

²⁰ Porke ta Sjun Salmoetik ya yal: “Te snae ya me xkajtaj jilel ta jojchol luwar, ma me ayuk machꞌa ya xꞌanin teꞌa”, xchi me. Sok ya yal xan: “Yan me machꞌa ya yichꞌbe jilel te yaꞌtele”, xchi me.

²¹ Ay winketik te la joyin bajtik sok sil tiempo te kꞌalal joy bajtik sok a te Kajwaltik Jesuse

²² jaꞌ to te kꞌalal aꞌbot yichꞌ jaꞌ yuꞌun te Juane asta jaꞌ to te mo bael ta chꞌulchane. Ja yuꞌun puersa ya skꞌan ya yichꞌ tꞌujel jtuluk te machꞌa joy bajtik soke, yuꞌun jun nax me ya kaltik te tutꞌil a chaꞌkux te Jesuse —xchi te jPedroe.

²³ Jich chaꞌtul a sbiiltesik: jaꞌ te Jose te Barsabas xꞌalbote sok Justo ya xꞌalbot xan, y sok euk te jMatiase.

²⁴ Jich a skꞌoponik Dios yuꞌun: —Kajwal, te jaꞌate awilojlanojbe yoꞌtanik spisil te genteetike. Aꞌbotik kiltik machꞌa a te ta xchebalik te atꞌujoje,

²⁵ yuꞌun jaꞌ ya yichꞌ yaꞌtel ta apostolil. Yuꞌun te Judase chꞌay yuꞌun te smule, te kꞌalal bajt te ba luwar te ba la skꞌan a bajte —xchiik ta skꞌoponel te Diose.

²⁶ Jich a yilik te machꞌa suerte te ya xkꞌote y jaꞌa kꞌot ta skuenta te jMatiase. Mismo tiempo a la sjoyin sba sok te buluchtul apostoletike.