Efesios 5 - Nuevo Testamento Tzeltal de Amatenango

Tutꞌil ya skꞌan xkuxuyin te machꞌatik yal-xnichꞌan te Diose

¹ Jaꞌex te yal-xnichꞌanex Dios te lek skꞌanojexe, nopaik te tutꞌil ay stukele.

² Sokuk me xkꞌuxul awoꞌtanik xꞌanex, jich mismo tutꞌil Cristo la xkꞌuxutayotike y te la yakꞌ sba ta lajel ta jkajtik te joꞌotike, jich tutꞌil smajtan Dios y te majtanil te lom tsaꞌam yikꞌ ta stojol te Diose.

³ Jaꞌex te yuꞌunexix te Diose ma me spas ni ma xjuꞌ ya awalik te antsiwejele. Ni yanetik xan ta jkaj te tut ma lekuke sok te skꞌupin-oꞌtanile.

⁴ Sok ma xꞌawalikix te bol kꞌopetike sok te tut puru lote te ma xtuune. Mas jaꞌ lek albeyaik kola yal te Diose.

⁵ Yuꞌun anaꞌojikix te machꞌa ya spas te antsiwejele o ya spas te tutik skuenta balmilale, o te tut ya skꞌupin-oꞌtanile, te jaꞌ pajal sok te xchꞌuunel te lotil diosetike, ma xjuꞌ ya xkꞌot te ba ay ta ajwalil te Cristoe y sok te Diose.

⁶ Ma me machꞌa wakꞌ sloꞌlayex te kꞌopetik te jowil naxe. Porke ta skaj te muliletik to te ya xtal te kastigo yuꞌun Dios ta skuenta te machꞌatik ma xchꞌuunbeyik te smantale.

⁷ Te jaꞌexe ma me ajoyin abaik sok ta spasel.

⁸ Porke te ay tal kꞌaale ayex ta ijkꞌal kꞌinal, pero te ora to, yuꞌun te jun nax ayexix sok te Kajwaltike, ayexix ta sakil kꞌinal, jich me xꞌanex tutꞌil te machꞌatik ayix ta skuenta te sakil kꞌinale.

⁹ Yuꞌun te sakil kꞌinale jaꞌ ya yakꞌ xlokꞌ spisil te ay slekil-oꞌtanile sok tut stojil aye sok te tut batsꞌi jiche.

¹⁰ Nopaik spasel te tut lek ya yil te Kajwaltike.

¹¹ Ma me ajoyin abaik ta spasel te tutik lom nax ya spasik te machꞌatik yuꞌun te yijkꞌal kꞌinale. Jaꞌ lek albeyaik ta jamal.

¹² Yuꞌun asta ya xkꞌexawotik ta yalel te tut ya spasik ta mukule.

¹³ Pero te kꞌalal spisil ya xchiknaj ta sakil kꞌinal te tut nakꞌale, chikan ta jamal ya xjil.

¹⁴ Porke te sakil kꞌinale ya yakꞌ ta ilel spisil. Jaꞌ yuꞌun jich ya xꞌalot: “Kuxa awoꞌtan jaꞌat te wayalate. Jajchan tal te ba ay te animaetike, y Cristo ya yakꞌ sakubuk kꞌinal ta atojol”, xchi me.

¹⁵ Jaꞌ yuꞌun, ila me abaik ta lek te tutꞌ ayexe. Ma me jichuk nax xꞌanex tutꞌil machꞌatik maꞌyuk tut snaꞌik. Pꞌijanik me.

¹⁶ Tuuntesaik lek te tiempoe. Porke te jujun kꞌaale ay me tut ma lekuk a.

¹⁷ Jaꞌ yuꞌun, ma me yuꞌunuk ma pꞌijukex. Nopaik me te tut skꞌan yoꞌtan te Kajwaltike.

¹⁸ Ma me yakubanik, yuꞌun jaꞌ me ya yikꞌex bael ta sleel amulik. Jaꞌuk me nojel ta awoꞌtanik te Chꞌul Espiritue.

¹⁹ Alaik ta juju-tul salmoetik sok kꞌayojetik sok yanetik kꞌayoj ta skuenta Espíritu. Kꞌayojinaik y albeyaik slekilal ta spꞌejel awoꞌtanik te Kajwaltike.

²⁰ Y albeyaik sil tiempo kola yal Dios te Tatil yuꞌun spisil te tutik ay ta skuenta te Kajwaltik Jesucristoe.

Te xkuxlejal ta yutil sna te machꞌa xchꞌuunejix Diose

²¹ Chꞌuunbeya aba amantalik ta juju-tul te tutꞌil axiꞌojik te Diose.

²² Antstik, chꞌuunbeya smantal te amamlalike, jich tutꞌil achꞌuunejbeyik smantal te Kajwaltike.

²³ Porke te mamlalile jaꞌ jolol yuꞌun te yiname jich tutꞌil te Cristo jaꞌ jolol yuꞌun te juju-tijkꞌ hermanoetike. Te Cristoe jaꞌ jkoltawanej yuꞌun te juju-tijkꞌ hermanoetike, te jaꞌ stiꞌbalul kꞌoeme.

²⁴ Y jich tutꞌil te hermanoetik te jaꞌ xchꞌuunejbe smantal te Cristoe, jich euk te antstik te ay smamlalike ya skꞌan te spisil ya xchꞌuunbe smantal te smamlalike.

²⁵ Mamlaliletik, kꞌuxutayaik me lek te awinamike jich tutꞌil Cristo te lek xkuxutayej te hermanoetik y te la yakꞌ xkuxlejal yuꞌunike.

²⁶ Jich a spas yuꞌun jich ya yichꞌ lekutesel ta skuenta te skꞌop y sok ta skuenta te ichꞌjaꞌe.

²⁷ Yuꞌun jich me ya xkꞌaxik ta stojol jich tutꞌil jtijkꞌ hermanoetik te ben tsaꞌam slekilike. Te maꞌyukix yijkꞌal sok maꞌyuk ixtaꞌajem sok maꞌyuk tut chikan, yuꞌun yichꞌojix lekutesel y tojobenix.

²⁸ Jich tutꞌil te mamlalile ya xkꞌuxutay te stiꞌbalule, jich ya skꞌan xkꞌuxutay ekꞌa te yiname. Te machꞌa ya xkꞌuxutay te yiname, stukel mismo ya xkꞌuxutay sba.

²⁹ Porke maꞌyuk machꞌa ya spꞌaj te stiꞌbalule. Ya smaklin sok ya skanantay, jich tutꞌil Cristo te ya spasbe te hermanoetike.

³⁰ Porke jaꞌ stiꞌbalul kꞌoem y joꞌotik stiꞌbalulotik kꞌoem ekꞌa.

³¹ Jich tutꞌil ya yal te Sjun Diose: “Jaꞌ yuꞌun te winike ya sjiles te smeꞌ-state yuꞌun jun nax ya xkꞌot sok te yiname, y ta xchebalik jun nax ya xkꞌot”, xchi me.

³² Jaꞌ to ben tulan skꞌoplal te mukul aye. Pero te joꞌone ya kal te jaꞌ skꞌoplal Cristo y sok te hermanoetike.

³³ Jaꞌ yuꞌun ta juju-tulex te jaꞌexe, kꞌuxutaya me te awinamike jich tutꞌil kꞌux ya awaꞌiy aba atukele. Y jich te antse, a me yakꞌ ta jkuenta te smamlale.