Efesios 2 - Nuevo Testamento Tzeltal de Amatenango

Kolemotikix ta skuenta skꞌuxul yoꞌtan te Diose

¹ Ta nail to te jaꞌexe chamenex kꞌoem ta skaj te kꞌayemex ta pasel tutik ma tsaꞌamuke y sok te muliletike,

² yuꞌun jaꞌ atamojik te tut skuenta te balmilal to, y jaꞌ la apasbeyik te tut ya skꞌan yoꞌtan te espíritu te ya xmantalaje te ikꞌ nax aye, sok te jaꞌ ya yaꞌbe spuersa yoꞌtan te machꞌatik ya xkꞌaxintaybeyik smantal te Diose.

³ Y jich ayotik ta jpisilik ekꞌa te ay kꞌaale. Jaꞌ jtamojtik te tut ya skꞌan te jtiꞌbalultike, y jaꞌ la jpastik te tutik nax ya skꞌan te jmulawil tiꞌbalultike y sok te tutik ya jnoptike. Ta skaj te jich ayotike tey ya jtatik kastigo yuꞌun te Diose, jich tutꞌil te yanetike.

⁴ Pero te Diose lom bayal slekil yoꞌtan y bayal a skꞌanotik ta yoꞌtan.

⁵ La yaꞌbotik jkuxlejaltik jun nax sok te Cristoe te kꞌalal jich to chamenotik ta skaj te jmultike. Ta skuenta nax slekil yoꞌtan Dios te la yaꞌbeyex te kolele.

⁶ Dios a xchaꞌkusesotik jun nax sok te Cristo Jesuse, y jun nax la snajkanotik sok ta chꞌulchan.

⁷ Jich me ya xchiknaj ta ilel ta patil bael te lom bayal skꞌuxul yoꞌtan yakꞌojbotike, sok ay slekil yoꞌtan ta jtojoltik ta skuenta te Cristo Jesuse.

⁸ Yuꞌun ta slekil yoꞌtan Dios te kolemexix ta skuenta xchꞌuunel awoꞌtanike. Ma yuꞌunuk jaꞌukex mismo te la aleik te akolelike, yuꞌun jaꞌ majtanil ya yakꞌ te Diose.

⁹ Ma yuꞌunuk kolemexix yuꞌun te awaꞌtelike. Jich maꞌyuk machꞌa ya xjuꞌ te mukꞌ ya yakꞌ sbae.

¹⁰ Yuꞌun jaꞌ te Dios te machꞌa la spasotike. Stukel a xchiknatesotik ta skuenta te Cristo Jesuse, yuꞌun ya jpastik te lekil aꞌtele, jich tutꞌil xchapoj te nail toe yuꞌun jich me ya kaꞌtelintik spasel.

Te bujtsꞌan kꞌinal kichꞌojtik ta skuenta te Cristoe

¹¹ Jich yuꞌun te jaꞌexe te ma juriyoukexe, ay machꞌatik ya yalbeyex te ma awichꞌojikuk te sirkunsisione. Te juriyoetik te ya yaꞌbeyik sirkunsision ta stiꞌbalul te winike, jich mismo sbiilinejik te yichꞌojik sirkunsisione.

¹² Naꞌaik me te ay kꞌaal maꞌyukex ta skuenta te Cristoe. Parte ayex sok te nasion yuꞌun Israele, y maꞌyuk awochelik a te trateetik sjapꞌoj te Diose. Jich nax kuxulex ta balmilal. Maꞌyuk Dios awuꞌunik y ni maꞌyuk tut ya amaliyik.

¹³ Pero te ora to, jun nax ayexix sok te Cristo Jesuse ta skuenta xchꞌichꞌel te stukel a smale. Te jaꞌex te nail toe ben jakal ayex, pero la stijilteselexix.

¹⁴ Te Cristoe stukel ya yaꞌbotik bujtsꞌan kꞌinal, yuꞌun jun nax a yakꞌojtikix ta jun nax jtejklum, me juriyo o ma juriyouk. La sjim te pajkꞌ te xatꞌoj jbajtik yuꞌun te jkontrainej jbajtike.

¹⁵ Ta stiꞌbalul te Cristoe la slajinbe skꞌoplal te mantaliletik te ya yakꞌ jpastik spisil te tut ya yale. Y jich a spas ta jun nax yachꞌil jtejklum te xchebal jtejklume. Jun nax a kꞌot ta skuenta, sok jich a yakꞌ bujtsꞌan kꞌinal.

¹⁶ Te tutꞌil a cham ta krus te Cristoe, la slajinbe skꞌoplal te tutꞌil kontra la yil sbaik ta xchebal te jtejklume. Y la yakꞌtalan ta bujtsꞌan kꞌinal yuꞌunik sok Dios, y jich a spasbe te jun nax a yakꞌe.

¹⁷ Te Cristoe yichꞌoj tal lekil achꞌ kꞌop yuꞌun bujtsꞌan kꞌinal ta spisil, jaꞌ te jaꞌexe te jakal ayex ta stojol Dios sok te machꞌatik tijajtik aye.

¹⁸ Yuꞌun ta skuenta te Cristoe, jpisiltik ta xchebal jtejklum ya xjuꞌ xtijilajotik ta stojol te Tatile ta skuenta jun nax te Espiritue.

¹⁹ Jaꞌ yuꞌun te jaꞌexe ma jyanlumukexix sok ma jakaluk ay te alumalike. Pajal alumal abaikix sok te jtejklum yuꞌun Dios sok pajal xnichꞌanexix te Diose.

²⁰ Te jaꞌexe jich kꞌoemex tutꞌil jun mukꞌul na te lijkesbil yiptajib yuꞌun, jaꞌ te apostoletike y sok te jꞌalwanejetike. Y te Jesucristoe ja stonil te xchikin nae.

²¹ Jun nax ayex sok te Cristoe. Jich kꞌoemex tutꞌil jun mukꞌul na te yipal ta jajchele, asta ya xkꞌoex ta jun templo te chꞌultesbile sok te jun nax ay sok te Kajwaltike.

²² Jich euk te jaꞌexe, te jun nax ayex sok te Cristoe, jich ya awichꞌik tsꞌakel moel jich tutꞌil jun templo te ba ya xꞌanin te Diose ta skuenta te Espíritu yuꞌune.