Colosenses 3 - Nuevo Testamento Tzeltal de Amatenango

¹ Jaꞌ yuꞌun, ya ke te jaꞌexe te chaꞌkusesbilexix sok te Cristoe, leaik te tutik skuenta te chꞌulchane, te ba nakal te Cristo ta sbatsꞌil skꞌab te Diose.

² Nopaik me te tutik skuenta te chꞌulchane, ma jaꞌuk te tutik skuenta te balmilale.

³ Yuꞌun te jaꞌexe chamex, y te ora to tey mukul ay te akuxlejalik sok Cristo ta stojol Diose.

⁴ Jaꞌ akuxlejalik te Cristoe. Te kꞌalal stukel ya xchiknaj tale, te jaꞌexe jich me ya xchiknajex tal ta skuenta, sok ya me xkꞌot ta akuentaik te slekilale.

Te kꞌaꞌ kuxlejale y te achꞌ kuxlejale

⁵ Lajinbeyaik skꞌoplal spisil te tutik skuenta te balmilal te ay ta atojolike. Ma me xꞌapasik antsiwejel ni ma me xꞌapasik te tut ma lekuke. Ni ma me xꞌapasik te tut ma tsaꞌamuk ya skꞌan atiꞌbalulike, ni jaꞌuk te ay tut ya skꞌupin awoꞌtanike, sok ma me yuꞌuninbeyex awoꞌtanik te kꞌulejalile, te jaꞌ pajal sok te xchꞌuunel lotil diose.

⁶ Te tutik to, jaꞌ te ya xtal tulan kastigo yuꞌun Dios ta skuenta te machꞌatik ma xchꞌuunike.

⁷ Jaꞌ te tutik la apasik ekꞌa te nail akuxlejalike.

⁸ Pero te ora to, jilesaik spisil to: te iliꞌbae, te kꞌajkꞌubele, te tut ma lekuke, te ixtaꞌkꞌoptawaneje, y te kꞌopetik ma lek ta alele.

⁹ Ma me ale abaik ta lot. Yuꞌun la ajilesikix te akꞌaꞌ kuxlejalike y sok te tutik la apasik te nail toe.

¹⁰ Y awichꞌojikix te achꞌ kuxlejal, te yanyan ta achꞌubel jaꞌ to teme pajal a kꞌoex sok te Diose te la spasex, yuꞌun jich ya xkꞌo anaꞌbeyik sba ta lek.

¹¹ Jich maꞌyukix skꞌoplal me juriyo o ma juriyouke, me yichꞌoj sirkunsision o ma yichꞌojuk, me jyanlum, o ma tsaꞌamuk ta genteil, me ay ta mosoil o libre ay. Te tut tulan skꞌoplale jaꞌ te Cristo, te jaꞌ yuꞌun ta spisil y ay ta skuenta spisil.

¹² Dios skꞌanojex te jaꞌexe, y la stꞌujex yuꞌun jtejklum ya xkꞌoex yuꞌun, sok kꞌuxex ta yoꞌtan. Jich yuꞌun akꞌaik ta ilel te ay xkꞌuxul awoꞌtanike sok te ay slekil awoꞌtanike. Chꞌin me xꞌawakꞌ abaik y kꞌunuk me awoꞌtanik, y kujchuk me awuꞌunik.

¹³ Yauk me xkujch awuꞌunik ta juju-tul, y aꞌbeya abaik perdon teme ay tut ma lekuk la apasbe abaik. Jich tutꞌil te Kajwaltike la yaꞌbeyex perdon, aꞌbeya abaik perdon euk te jaꞌexe.

¹⁴ Jaꞌ tulan skꞌoplal te ya awakꞌik ta ilel te ay skꞌuxul awoꞌtanike, te ya yakꞌex ta jun nax.

¹⁵ Y te bujtsꞌan kꞌinal yuꞌun te Cristoe jaꞌ me ya stojobtesbeyex te awoꞌtanike. Porke la yikꞌex Dios skuenta yuꞌun jun nax ya xkꞌoexe. Y albeyaik kola yal Dios yuꞌun spisil.

¹⁶ Siluk tiempo ayuk ta awoꞌtanik te skꞌoplal te Cristoe. Sok spꞌijil awoꞌtanik tsitsa abaik y aꞌbeya abaik spuersa awoꞌtanik ta juju-tul. Sok awoꞌtanik kꞌayojinaik te Diose ta salmoetik sok kꞌayojetik sok yanetik kꞌayoj ta skuenta Espíritu.

¹⁷ Y spisil te tut ya apasike o ya awalike, pasaik ta skuenta te Kajwaltik Jesuse. Sok albeyaik kola yal Dios te Tatil ta skuenta te Jesuse.

Tut ya skꞌan ya spasik te machꞌatik xchꞌuunejik Diose

¹⁸ Antstik, chꞌuunbeyaik smantal te amamlalike, yuꞌun jich ya skꞌan yuꞌun te achꞌuunejikix te Kajwaltike.

¹⁹ Mamlaliletik, kꞌuxutayaik me te awinamike. Ma me awelutayik ta kꞌop.

²⁰ Alnichꞌanetik chꞌuunbeyaik spisil smantal te ameꞌ atatike, porke jaꞌ to jaꞌ lek ya yil te Kajwaltike.

²¹ Meꞌil-tatiletik ma me awilintesik te awuntikilike, yuꞌun jich makꞌ xchebaj yoꞌtantik a.

²² Mosoiletik, chꞌuunbeyaik ta spisil smantal te machꞌatik awajwalik liꞌ ba balmilale. Ma jaꞌuk nax te kꞌalal ya yilex te lek ya xꞌaꞌtejex ta stojole, sino ke junuk awoꞌtanik ta stojol. Xiꞌaik me te Diose.

²³ Spisil te tut ya apasike, junuk awoꞌtanik xꞌapasik. Jichuk me kꞌoem te ayex ta abatinel yuꞌun te Kajwaltike, y ma jaꞌuk yuꞌun te winketike. Yuꞌun anaꞌojik te majtanil yuꞌun te Kajwaltike te ya yakꞌbeyex ta patile.

²⁴ Porke te jaꞌexe, jaꞌ ya xtuunex yuꞌun te Cristoe, te batsꞌi jaꞌ awajwalike.

²⁵ Pero te machꞌa ma lek tut ya spase, jich mismo ma lekuk te tut ya xꞌakꞌbot yuꞌune. Porke te Diose pajal nax ya yil te gentee.