Apocalipsis 15 - Nuevo Testamento Tzeltal de Amatenango

Te angeletik sok te jukeb slajibal wokoletike

¹ La kil ta chꞌulchan jun xan mukꞌul señail te yan ta ilele: Jaꞌ te jukeb angeletik te yichꞌoj jukeb slajibal tulan wokole, te jaꞌ ya stsakay a te jayeb kastigo ya yakꞌ te Diose.

² La kil xan te tut pajal yilel sok jun mar te xlemet sok te kapal sok kꞌajkꞌe. Te ba te mar te xlemete, teꞌ tekꞌajtik a te machꞌatik juꞌ yuꞌunik te maꞌ yichꞌik ta mukꞌ te chanbalam te xiꞌbentik sbae y sok te slokꞌol, y sok te snumeroil sbiile. Yichꞌojlan yarpaik te akꞌtalanbil yuꞌun Diose.

³ Ya skꞌayojinik te skꞌayoj jMoises te yaj-aꞌtel Dios y sok te skꞌayojil te Chꞌin Karnerae. La yalik: “Lom mukꞌ y kꞌax lom tsaꞌam ta spisil te tutiꞌ apasoje, Kajwaltik Dios te spisil ya xjuꞌ awuꞌune. Toj y batsꞌi jich te beetik awuꞌune, jaꞌat ajwalilat yuꞌun te nasionetike.

⁴ ¿Me ay machꞌa a te makꞌ ya xiꞌate, jaꞌat Kajwal? ¿Me ay machꞌa te ma xyalbeyat slekil akꞌoplale? Yuꞌun jaꞌat nax te lek ayate. Spisil nasionetik ya xlaj tal y ya yichꞌat ta mukꞌ, porke chikanix ta ilel te lek ya xchapawanate”, xchiik.

⁵ Ta patil te tutik to, la kil y la jta ta ilel jeꞌbil ta chꞌulchan te templo yuꞌun Dios, te teꞌ kꞌejbil a te mantaliletike.

⁶ Te ba templo yuꞌun Diose, teꞌ lokꞌik tal a te jukeb angeletik te yichꞌojlanik te jukkaj tulan wokoletike. Slapojlanik lino-pakꞌ te ben sak y xlemete, y aylan sinturonik pasbil ta oro y te snajtꞌile kꞌoem kꞌal ta stiꞌ yoꞌtanik.

⁷ Jkojt te ta xchankojtol te tut kuxajtike la yakꞌtalanbe ta juju-tul te juktul angeletik jun baso pasbil ta oro, nojel ta tulan kastigo te ya xtal ta stojol Dios te stalel kuxul sbajtel kꞌinale.

⁸ Y te temploe noj ta xchꞌailel yuꞌun te slekilal sok spoder te Diose. Y maꞌyuk machꞌa ya xjuꞌ ya xꞌoch bael teꞌa teme ma to lajemuk a te jukkaj tulan wokol te yichꞌojlan te jukeb angeletike.