Apocalipsis 11 - Nuevo Testamento Tzeltal de Amatenango

Te chaꞌtul testigoetike

¹ La yaꞌbikon jun bara teꞌ yuꞌun spꞌisil, pajal yilel sok jchꞌix jalal, y la yalbikon: —Jajchan y lijk pꞌisa te templo yuꞌun te Diose y sok te altare, y ajtaya te machꞌatik ya skejan sbaik teꞌ aye.

² Pero ma me apꞌis stukel te yamakꞌul te temploe, porke jaꞌa aꞌbotix ta skuenta te machꞌatik ma xchꞌuunejuk te Diose. Jaꞌ te machꞌatik ya xba sjuꞌik ta tekꞌel te chꞌul mukꞌul jtejklum te ya xjalaj oxeb jaꞌbil sok olile.

³ Y joꞌon ya jtikon bael cheb testigoetik sok skꞌuꞌ-spakꞌik te ay xchꞌixale te ya xkꞌopojik mil dosientos sesenta kꞌaal ta joꞌon jkuenta.

⁴ Te cheb testigoetik to jaꞌ te chaꞌwol oliba teꞌe y sok te chaꞌchꞌix yawil kꞌajkꞌ te ay ta stojol Kajwaltik ta balmilale.

⁵ Teme ay machꞌa ya skꞌan ya yixlane, ya me xlokꞌ kꞌajkꞌ ta stiꞌik te ya xchꞌik a te skontraike. Jich me ya xcham machꞌauk a te ya skꞌan ta yixlane.

⁶ Te testigoetik to ay spoderik yuꞌun ya stsꞌus te chꞌulchane yuꞌun makꞌ yakꞌix jaꞌal a te jayeb kꞌaal te ya yalbeyik skꞌoplal te Diose. Y sok ay spoderik yuꞌun ya skꞌajtatesik ta chꞌichꞌ te jaꞌe, y yuꞌun ya yaꞌbe kꞌaxuk swokol ta balmilal ta spisil ta jkaj wokoletik, chikan jayebuk buelta ya skꞌan ya yakꞌike.

⁷ Pero te kꞌalal lajix yoꞌtanik ta yalel a te skꞌoplale, te chanbalam te xiꞌbentik sba ta ilel ya xlokꞌ tal ta chꞌen yuꞌun ya xtal smak. Ya me stsalotik yuꞌun sok ya me xmilotik yuꞌun.

⁸ Te stiꞌbalulik tixajtik me ya xjil ta kayailtik te ba mukꞌul jtejklum te ba jijpanot ta krus te Yajwalike. Jaꞌ te mukꞌul jtejklum Sodoma sbiil, sok Egipto sbiil ta alel.

⁹ Y ta oxeb kꞌaal sok olil te gente te yanetik slumalike, sok te yanetik stsꞌumbalike, y te yanetik skꞌopike, y yanetik nasionetike ya me yilbeyik te stiꞌbalulik y ma xyakꞌik ta mukel.

¹⁰ Te machꞌatik kuxajtik ta balmilale lom kontentoik yuꞌun te chamike. Batsꞌi lom kontentoik, talel bael ya yaꞌbe sbaik smajtanik yuꞌun. Porke lom bayal a kꞌax swokolik yuꞌun te chꞌatul jꞌalwanejetike.

¹¹ Pero ta yoxebal kꞌaal sok olil Dios ya xchaꞌkuses, y ya xtejkꞌaj xan jajchel. Spisilik te machꞌatik ya yilike bayal ya xꞌoch xiꞌel ta yoꞌtanik.

¹² Jich te cheb testigoetike ya me yaꞌiyik jun tulan kꞌop ta chꞌulchan te jicha altalanbot yuꞌune: “¡Moanik tal liye!” xchi. Jich ya xmoik bael ta chꞌulchan sok tokal y te skontraike ya me yilik.

¹³ Y mismo tiempo ya xtal tulan jikichab, y ta skaj te jikichabe ya xjem koel xejtꞌ ta slajunxejtꞌel te mukꞌul jtejklume, y siete mil ta jtul gente ya xcham. Te machꞌatik kuxajtik to jilele, ben xlaj xiꞌik sok ya la yalbeyik slekilal te Dios te ay ta chꞌulchane.

¹⁴ Jich ya xkꞌax te xchebal tulan wokole. Pero ya xtalix te yoxebale.

Te sjukebal kornetae

¹⁵ Te sjukebal ángele la yokꞌesin te skornetae. Y la kaꞌiy tulan kꞌop ta chꞌulchan, te jich la yalike: “Te machꞌa ay ta skuenta te ya xꞌoch ta ajwalil ta sba te balmilale jaꞌ japubil yuꞌun te Kajwaltike y sok te Cristo yuꞌune. Y ya xꞌoch ta ajwalil ta sbajtel kꞌinal”, xchiik.

¹⁶ Te beintikuatro ta jtul te machꞌatik lom mamalikixe te nakꞌajtik te ba ay snaktajibik ta stojol te Diose, la skejan sbaik kꞌalal ta lum y la yichꞌik ta mukꞌ te Diose.

¹⁷ Jich a yalik: “Ya kalbetikat kola awal, Kajwaltik Dios te spisil ya xjuꞌ awuꞌune. Atalel ayat ta namey sok ta ora to. Porke la awakꞌix ta ilel te lom bayal apoder y la awichꞌix awaꞌtel ta ajwalil.

¹⁸ Te nasionetike ilinemik. Pero la staix skꞌaalel te ya awaꞌbe kastigoe, sok yorailix te ya awichꞌ jkuenta te machꞌatik chamenike. Sok ya awakꞌtalanbe smajtan te awaj-aꞌteltak: jaꞌ te jꞌalwanejetike, sok te machꞌatik ayik ta jtejklum awuꞌune, y sok te machꞌatik ya yakꞌ ta jkuenta te abiile, chikan me chꞌin ta mukꞌ. Sok ya ajim te machꞌatik ya yixlan te balmilale”, xchiik.

¹⁹ Jich a jeꞌ te templo yuꞌun Dios te ay ta chꞌulchane, y te ba temploe chikan ta ilel te xkaxaul te trate yaloje. Y tal sansewal, xixixet, xpumumet, jun tulan jikichab, y jun tulan bat.