2 Tesalonicenses 3 - Nuevo Testamento Tzeltal de Amatenango

Kꞌoponbotik me Dios

¹ Ta slajibal, kermanotak, kꞌoponbotik me Dios te yakuk xkꞌot ta ora nax ta bayuk te skoplal te Kajwaltike, y yauk me xꞌichꞌot ta jkuenta yuꞌun te gentee, jich tutꞌil te kꞌot ta pasel te ba ayexe.

² Kꞌoponbotik me Dios te libre ya xjilotik yuꞌun te winketik te ma lekikuk y ma tsaꞌamuk yoꞌtanike. Porke ma spisiluk xchꞌuunejik Dios.

³ Pero te Kajwaltike jun yoꞌtan, y stukel ya yaꞌbeyex apuersaik y ya skoltayex te ba tut ma lekuke.

⁴ Ta skuenta te Kajwaltike, seguro ayotik te sil tiempo ya apasik te tut kalojbetikexe.

⁵ A me yaꞌbeyex anaꞌik te Kajwaltik te tutꞌil ay skꞌuxul yoꞌtan te Diose, sok te tutꞌil kujch yuꞌun swokol te Cristoe.

Te tutꞌil ya skꞌan te ya xꞌaꞌtejotike

⁶ Kermanotak, ya kalbeytikex ta skuenta te Kajwaltik Jesucristoe: Ma me ajoyinik te machꞌauk hermanoil te ma skꞌan xꞌaꞌteje y te ma jichuk ya spas te tutꞌil la jnojpestikexe.

⁷ Yuꞌun te jaꞌexe anaꞌojik tutꞌil ya skꞌan xkuxuyinex, jich tutꞌil la kakꞌtik awilike. Te joꞌotike ma yuꞌunuk ma aꞌtejotik te kꞌalal ayanotik te ba ayexe.

⁸ Ni maꞌyuk a weꞌotik ta majtanil nax. Aꞌtejotik y la jpastik puersa ta kꞌaal y ajkꞌubal yuꞌun jich maꞌyuk a kakꞌtik awokolik a te jaꞌexe.

⁹ Lek te lauk jkꞌanbetikex te ya akoltayotik te jaꞌexe, pero aꞌtejotik yuꞌun ya kakꞌtik awilik te jich ya apasik ekꞌae.

¹⁰ Te kꞌalal ayotik te ba ayexe, jich a kalbetikex to: “Te machꞌa ma skꞌan xꞌaꞌteje, jich me makꞌ xweꞌ”, xchiotik.

¹¹ Pero ay kaꞌiyejtikix te ay machꞌaex a te ma skꞌan ya xꞌaꞌtejexe, te maꞌyuk tut ya apasik, sok te maꞌyuk awochel awilel aye.

¹² Te machꞌatik jich aye, ya jpastik ta mantal y ya kalbetik ta skuenta te Kajwaltik Jesucristoe: Junuk yoꞌtanik a aꞌtejukik yuꞌun jich me ay tut ya staik sweꞌelik a.

¹³ Kermanotak, ma me lubanik ta spasel te tut leke.

¹⁴ Teme ay machꞌa ma xyakꞌ ta jkuenta te tutiꞌ kaltik ta karta to, ilaik me machꞌa a, y ma me junuk nax ya xꞌanex sok, yuꞌun jich me ya xkꞌexaw a.

¹⁵ Pero ma me akontrainik, sino ke tsitsaik me jich tutꞌil awermano.

Bendision ta slajibal

¹⁶ Y te Kajwaltik te ya yakꞌ bujtsꞌan kꞌinale, aꞌ yaꞌbeyex bujtsꞌan kꞌinal ta sil tiempo y ta spisil te tutꞌil ayexe. Akꞌa sjoyinex ta apisilik te Kajwaltike.

¹⁷ Joꞌon jPabloon ya jtsꞌibabeyex ta jkꞌab sok ta letra te spajtil awoꞌtanike. Jich ay te jtsꞌibaweje, jich ya jpas ta spisil te jkarta ya jpase.

¹⁸ Te Kajwaltik Jesucristoe a me yaꞌbeyex te slekil yoꞌtan ta apisilik te jaꞌexe. Jichuk.