2 Tesalonicenses 2 - Nuevo Testamento Tzeltal de Amatenango

Ya me xchiknaj te mulawil winike

¹ Te ora to, kermanotak, te tutꞌil ya xchaꞌtal te Kajwaltik Jesucristoe, y te jun nax ya stsobelotik ta skuentae, awokolikuk,

² ma me pasiluk ya xyanej te tut ya achꞌuunike. Ni ma me ayuk machꞌa ya yal te kꞌaxix skꞌaalel te ya xchaꞌtal te Kajwaltike, o teme jich ya yal ta karta kuybil ta kuꞌune.

³ Ma me awakꞌ abaik ta loꞌlayel. Yuꞌun puersa nail ya xkꞌot ta pasel te ay ipal jchꞌuunjeletik te ya xjajch skontrainik te Diose. Sok ya xchiknaj te mulawil winik te ya xbajt ta chꞌayele.

⁴ Jaꞌ te machꞌa to jaꞌ ya xlijk skontrain spisil te tutik skuenta te Diose sok spisil te tut chꞌuuntaybile. Y ya xkꞌo snajkan sba ta naktajibal ta templo yuꞌun te Diose, sok ya me yal sba te stukel Diose.

⁵ ¿Me yuꞌun ma anaꞌojikuk te joꞌon la kalbeyex to te kꞌalal joyinejex to aye?

⁶ Y te ora to te jaꞌexe anaꞌojik tut a te kombil to yuꞌune, yuꞌun ma to ya xchiknaj jaꞌ to teme ya sta stiempoile.

⁷ Jajchemix ta pasel ta mukul bayal te tut ma tsaꞌamuke, jaꞌ xanix palta te ya xlokꞌesot ta yolil te machꞌa skomoj te ora to.

⁸ Jich me ya xchiknaj te machꞌa ma lekuke, te jꞌa ya xmilot ta yikꞌal nax stiꞌ te Kajwaltik Jesuse. Ya xlajinot te kꞌalal ya sujt tal te Kajwaltike sok spisil te xojobile.

⁹ Te tutꞌil ya xtal te machꞌa ma lekuke, jaꞌ me ya xkoltayot yuꞌun te pukuje. Ya me xtal yakꞌ ta ilel bayal spoder y sok seña milagroetik te skuenta loꞌlayele.

¹⁰ Y ya me xtuun yuꞌun spisil ta jkaj te tut ma lekuke yuꞌun ya sloꞌlay te machꞌatik ya xbajtik ta chꞌayele, porke maꞌ skꞌan ya xchꞌuunik te tut batsꞌi jich te ya yakꞌ te kolele.

¹¹ Jaꞌ yuꞌun, Dios la yakꞌ te ya xloꞌlayotik yuꞌun te tut ma lekuke y te jaꞌ ya xchꞌuunik te loꞌlayele.

¹² Jich me ya xbajtik ta chꞌayel spisil te machꞌatik maꞌ skꞌan xchꞌuunik te tut batsꞌi jiche, sino ke jaꞌ ben sniꞌ xyaꞌiyik te tut ma lekuke.

Tsabilik yuꞌun te ya xkolike

¹³ Pero te joꞌotike sil tiempo ya skꞌan kalbetik kola yal Dios ta akuentaik, kermanotak te ben kꞌuxex ta koꞌtan ta skuenta te Kajwaltike. Porke Dios a stsaex yuꞌun jich me nail ya kꞌo ataik te kolel ta skuenta te Espíritu ya slekutesexe, sok ta skuenta te tut batsꞌi jich te la achꞌuunikixe.

¹⁴ Jaꞌ yuꞌun to, Dios la yikꞌex ta skuenta te skꞌoplal kolel te joꞌotik a kaltike. Yuꞌun jich me ya xkꞌo awichꞌik te slekilal te Kajwaltik Jesucristoe.

¹⁵ Jich yuꞌun, kermanotak, junuk me awoꞌtanik sil tiempo. Y ma me achꞌay ta awoꞌtanik te nojpesel te la kaꞌbetikex ta jteklejaltike o ta kartae.

¹⁶ Te Kajwaltik Jesucristoe y sok te Jtatik Dios te kꞌuxotik ta yoꞌtane y te la yaꞌbotik smukꞌul koꞌtantik sbajtel Kꞌinal y sok te ya jmaliytik te slekilale,

¹⁷ ya me yaꞌbeyex sbujts awoꞌtanik sok spuersa awoꞌtanik. Jich me lek ya xkꞌot spisil te tut ya awalike sok te ya apasike.