2 Tesalonicenses 1 - Nuevo Testamento Tzeltal de Amatenango

Spajtil-oꞌtanil

¹ Joꞌon jPabloon sok te Silvano y sok jTimoteo, la jtsꞌibayex te karta to, jaꞌex hermanoetik te ayex ta mukꞌul jtejklum Tesalónicae, te jun nax ayex ta skuenta te Jtatik Diose y sok te Kajwaltik Jesucristoe.

² Te Jtatik Dios sok te Kajwaltik Jesucristoe aꞌ yaꞌbeyex te slekil yoꞌtanike y sok te bujtsꞌan kꞌinal yuꞌunik ta atojolike.

Ichꞌel ta jkuenta te kꞌalal ya xtal te Cristoe

³ Kermanotak, sil tiempo ya skꞌan kalbetik kola yal Dios yuꞌun te jaꞌexe. Jaꞌ lek te jich ya jpastike porke te xchꞌuunel awoꞌtanike yipal ta mukꞌubel, y te xkꞌuxul awoꞌtanik te ay awuꞌunik ta juju-tule yipal ta mukꞌubel ta stojol te yanetike.

⁴ Jaꞌ yuꞌun te joꞌotike ben sniꞌ xkaꞌitik te ya kaltik akꞌoplalik ta stojol te juju-tijkꞌ hermanoetik yuꞌun Diose, te kujchem awuꞌunik spisil te tenele sok te ilbajinele ta skuenta te xchꞌuunel awoꞌtanike.

⁵ Jaꞌ to jaꞌ ya yakꞌ ta naꞌel a te toj ya xchapawan te Diose, yuꞌun te jaꞌexe ay awochelik a te ya xꞌochex te ba ay ta ajwalinele. Jaꞌ sluwar te ay awokolike.

⁶ Toj te Diose, y ya me yaꞌbe stoj sok wokol te machꞌatik ya yakꞌ kꞌaxuk awokolike.

⁷ Y te jaꞌexe ya me yaꞌbeyex a kux awoꞌtanik yuꞌun te awokolile, jich mismo te tutꞌil joꞌotik. Jaꞌ te tut kꞌaalil ya xchiknaj tal te Kajwaltik Jesuse sok te angeletik yuꞌune, te ay spoderike te xpumet sok kꞌajkꞌ te ya xtal ta chꞌulchane.

⁸ Yuꞌun ya xtal yaꞌbe kastigo te machꞌatik maꞌ snaꞌbeyik sba Dios ni maꞌ xyakꞌik ta jkuenta te skꞌoplal kolel yuꞌun te Kajwaltik Jesuse.

⁹ Jaꞌ me kastigo ya yichꞌik te lajel sbajtel kꞌinale. Y ya me yichꞌik chꞌojel lokꞌel ta jakal ta sit te Kajwaltike sok te ba ay te slekilal sok te podere.

¹⁰ Kꞌalal ya xtal te Kajwaltike, ya me xꞌakꞌot ta jkuenta yuꞌun spisil te machꞌatik yuꞌune, y toj jcham ya yaꞌiyik ta spisil te machꞌatik xchꞌuunejike. Jich tutꞌil te jaꞌex te la achꞌuunik te skꞌoplal la kalbeyexe.

¹¹ Jich yuꞌun te sil tiempo ya jkꞌoponbetikex te Diose. Jaꞌ ya jkꞌanbetik te Dios kuꞌuntike te lekuk ya yilex yuꞌun te la yikꞌex stukele. Y stukel ya yakꞌ kꞌotuk ta pasel sok spoder ta spisil te tut lek ya anopik te jaꞌexe, y sok te aꞌtel ya apasik yuꞌun te xchꞌuunel awoꞌtanike.

¹² Jich ta akuentaik te jaꞌexe te ya xꞌakꞌot ta jkuenta te Kajwaltik Jesucristoe. Y jich me lek akꞌoplalik yuꞌun euk ta skuenta te slekil yoꞌtan te Dios kuꞌuntike y sok te Kajwaltik Jesucristoe.