2 Pedro 3 - Nuevo Testamento Tzeltal de Amatenango

Te tutꞌil ya xchꞌatal te Kajwaltike

¹ Kermanotak te kꞌuxex ta koꞌtane, jaꞌ to jaꞌ xchebal karta te la jtsꞌibabeyexe. Ta xchebal jich a skꞌan koꞌtan te la jtsitsex, yuꞌun jich me xꞌanaꞌik te tut stojile.

² Naꞌaik me te tut la yalik te nail toe te chꞌul jꞌalwanejetike, y sok te smantal te Kajwaltik, te jKoltawanej kuꞌuntike, te la snojpesex te apostoletike.

³ Naꞌaik me nailuk te tutꞌil ay sluwaril to: Ta slajibal kꞌaal ya me xtal genteetik te jaꞌ nax ya spasik te tut ma lekuke te ya skꞌan yoꞌtan ya spasike, y te ya yiktinik te tut yaloj te Diose.

⁴ Ya me yalik: “¿Baꞌay te tut albilex te ya xchaꞌtal xan te Cristoe? Laj chamix bael te jmeꞌ-jtatike, y sigue jich ay bael spisil pajal sok te kꞌalal pas te balmilale”, xchiik me.

⁵ Te gente abi ma xyakꞌik ta jkuenta te tutꞌil nameyix a chiknaj te chꞌulchane. Sok te ta skꞌop nax te Diose chiknaj te balmilale ta yolil jaꞌ y ta skuenta te jaꞌe.

⁶ Sok ta skuenta te jaꞌ, la slajin te balmilal te nojel jaꞌe.

⁷ Pero te chꞌulchane y sok te balmilal te chikan ora to, chapalix yuꞌun ya xlaj ta kꞌajkꞌ, yuꞌun jaꞌ mismo smantal te Diose. Jaꞌ ya xlaj ta kꞌajkꞌ te tut ora ya sta skꞌaalel te ya yichꞌ chapel te machꞌatik ma lekikuke sok te ya xꞌakꞌtalanot bael ta chꞌayele.

⁸ Sok xan, kermanotak te kꞌuxex ta koꞌtane, ma me xchꞌay ta awoꞌtanik yuꞌun te Kajwaltike te jun kꞌaale jachik kꞌoem yuꞌun te jmil jaꞌbile, y te jmil jaꞌbile jachik kꞌoem te tutꞌil jun kꞌaale.

⁹ Ma yuꞌunuk yokelaluk ya yakꞌ kꞌouk ta pasel te Kajwaltik te tut yaloje, jich tutꞌil te ay machꞌatik jich skuyojike, sino ke jun yoꞌtan ya smaliyex te jaꞌexe. Yuꞌun ma skꞌan teme ay machꞌa chꞌayel ya xbajte, sino ke jaꞌ ya skꞌan te spisil ya sujtes yoꞌtanik ta stojol Diose.

¹⁰ Pero te tut kꞌaalil ya xtal te Kajwaltike, ya xtal jichuk jꞌelekꞌ ta ajkꞌubal. Jich ora ya xlaj te chꞌulchane, te xiꞌxiꞌtik ta aꞌiyele. Te tutik pasbile ya me xlaj ta kꞌajkꞌ, y te balmilale sok spisil te tutik ay ae ya me xlaj ta chikꞌel.

¹¹ Te tutꞌil la awaꞌiyikix te spisil jich ya yichꞌ lajinele, ya skꞌan te mas to xan lek ya xkuxuyinex sok te ya achꞌuunik te Diose.

¹² Maliyaik te tut kꞌaalil ya xtal te Diose, y pasaik me te tut ya yakꞌ te ya xtal yuꞌun ta orae. Te kꞌaal abi, te chꞌulchane ya me xlajinot ta kꞌajk, y te tutik pasbil ae ya me xꞌul ta kꞌajkꞌ.

¹³ Pero te joꞌotike ya jmalitik te yachꞌil chꞌulchan sok te yachꞌil balmilal te Dios yaloj te ya spase, te maꞌyukix mulil teꞌ ae.

¹⁴ Jaꞌ yuꞌun, kermanotak, te kꞌuxex ta koꞌtane, te yipalex to ta smaliyel te tutik to, pasaik spisil te ya xjuꞌ awuꞌunik yuꞌun jun me awoꞌtanik ya xjul staex a te Diose. Ma me ijkꞌubenukex ni ma me ayuk amulik.

¹⁵ Naꞌbeyaik me sluwar te jun yoꞌtan ya xmaliwan te Kajwaltike te yuꞌun ya yaꞌbotik te jkoleltike. Jich tutꞌil te la stsꞌibabeyex te kermanotik jPablo te kꞌux ta koꞌtantike. Chikan te spꞌijil a aꞌbot yuꞌun te Diose.

¹⁶ Ta juju-lejch te skartae jich a yal ekꞌa to, aunke ay tut lom wokol ta naꞌbeyel sluwar. Te machꞌatik ma snaꞌik kꞌinale y sok te machꞌatik maꞌyuk spuersa xchꞌuunel yoꞌtane ya me xyanej yuꞌunik, jachik tutꞌil ya syanutesik te yanetik xan te ay ta Sjun Diose. Jaꞌ yuꞌun te chꞌayel ya xlaj bajtike.

¹⁷ Jaꞌ yuꞌun, kermanotak te kꞌuxex ta koꞌtane, ya ke nail to ya anaꞌik te tutik to, ila me abaik, yuꞌun ma me sjochex bael ta loꞌlayel te machꞌatik ma lekikuke, ni ma me chꞌayanik te jun awoꞌtanike.

¹⁸ Pero naꞌbeyaik sba lek te Kajwaltik Jesucristo te jKoltawanej kuꞌuntike. Y mukꞌubanik xan sok te slekil yoꞌtane. Ben tsaꞌam slekil stukel te ora to y sok ta sbajtel kꞌinal. Jichuk.