2 Juan 1 - Nuevo Testamento Tzeltal de Amatenango

Te tut batsꞌi jiche y sok te xkꞌuxul-oꞌtanile

¹ Joꞌon te ansianoone, ya jtsꞌibay te karta to ta stojol te ants te tsabil yuꞌun te Diose, y sok te machꞌatik ayik ta skuentae. Batsꞌi kꞌuxex ta koꞌtan. Y ma joꞌukon nax, sino ke jich kꞌuxex ta yoꞌtanik euk ta spisil te machꞌatik te snaꞌojikix te tut batsꞌi jiche.

² Kꞌuxex ta koꞌtan te jaꞌexe ta skꞌaj te tut batsꞌi jiche te ayix ta koꞌtantike y sil tiempo ay ta jtojoltik.

³ Te Dios te Tatile sok te Jesucristo te jaꞌ Xnichꞌan te Tatile, a me yaꞌbeyex te slekilal ta atojolik te jaꞌexe, sok a me xkꞌuxutayex, sok a me yaꞌbeyex te bujtsꞌan kꞌinale, sok te batsꞌi jiche, y sok te xkꞌuxul yoꞌtane.

⁴ Bayal sbujtsꞌ koꞌtan yuꞌun te jich a jul jtajtalan te awuntikil te jich xchꞌuunejik te tut batsꞌi jiche, jachik tutꞌil spasojotik ta mantal te Jtatik Diose.

⁵ Te ora to, awokoluk hermana, ya skꞌan te talel baeluk kꞌux ya kaꞌiy jbajtik ta koꞌtantike. Te jich a jtsꞌibabeyat to ma achꞌ mantaluk, sino ke jaꞌ mismo te kichꞌojtik desde ta slijkibale.

⁶ Ya xchiknaj te xkꞌuxul koꞌtantik teme ya jchꞌuuntik spasel te tut ya yal te mantaliletik yuꞌun te Diose. Y te mantaliletike, jachik tutꞌil te awaꞌiyejikix desde ta slijkibal to tale, jaꞌ te ya xchiknaj ta akuxlejalik te xkꞌuxul awoꞌtanike.

Te jloꞌlawanejetike

⁷ Yipalik ta beel ta balmilal bayal jloꞌlawanejetik te ya yalik te ma la yichꞌ stiꞌbalul te Jesucristo jachik tutꞌil winik te batsꞌi jiche. Te machꞌa jich ya yale, jaꞌ jloꞌlawanej y skontrainej te Cristoe.

⁸ Ila me abaik te jaꞌexe yuꞌun ma me jowiluk ya xchꞌay te awꞌatelike, sino ke jaꞌ te tsꞌakal ya awichꞌik te amajtanike.

⁹ Machꞌauk a te ya syanutes bael ta mas te nojpesel yuꞌun te Cristoe, maꞌyuk ta skuenta te Diose. Pero te machꞌa jmel nax a snop te nojpesel yuꞌun te Cristoe, ay ta skuenta te Tatile y jich euk te Nichꞌanile.

¹⁰ Teme ay machꞌa ya xba yulutayex tal te jaꞌexe y teme ma jaꞌuk yichꞌoj te nojpesel to, ma me awikꞌ ta ana ni ma me apatbe yoꞌtan.

¹¹ Porke te machꞌa ya spatbe yoꞌtane, ya me sjoyin ta spasel te tut ma lekuke.

Kꞌopetik ta slajibal

¹² Bayal tut ya jkꞌan kalbeyex te jaꞌexe, pero ma jkꞌan ya jpas ta karta. Yuꞌun ay ta koꞌtan te ya xtal kilexe, y ya jkꞌoponex ta atekꞌlejalik. Yuꞌun jich me tsꞌakal a kichꞌtik te bujtsꞌan kꞌinale.

¹³ Te machꞌatik yuntikil te awermana te jaꞌ tsabil ekꞌae, la stikonbeyex spajtil awoꞌtanik euk.