2 Corintios 7 - Nuevo Testamento Tzeltal de Amatenango

¹ Jich yuꞌun, kermanotak te ben kꞌuxex ta koꞌtane, jaꞌ to jaꞌ te sjapojbotik Dios ta jtojoltik. Jaꞌ yuꞌun ya me skꞌan te ya sakutes jbajtik yuꞌun spisil te tut ya yijkꞌutesotik sok te jtiꞌbalultike sok te koꞌtantike. Y te tutꞌil ya skꞌan xiꞌel te Diose ya me skꞌan te jmel nax ya kakꞌ jbajtik ta skuentae.

La sujtes yoꞌtanik te corintoetike

² Kꞌux me xꞌawaꞌiyikon ta awoꞌtanik. Yuꞌun ma me ayuk machꞌa la kilbajintik. Ma me ayuk machꞌa la kixlantik y maꞌyuk machꞌa jloꞌlayejtik.

³ Ma yuꞌunuk ya kalbeyex te ay amulike. Ay kalojbeyexix te ayex ta koꞌtane. Yuꞌun jun nax kuxulotik y jun nax ya xchamotik.

⁴ Jamal koꞌtan ya xkꞌopojon ta atojolik, sok ben jun koꞌtan awuꞌunik. Aunke bayal jwokoltik, ben kakꞌoj puersa y ben bujtsꞌan kꞌinal ya kaꞌiy.

⁵ Jaꞌ to te julotik ta Macedoniae, maꞌyuk ba jtajtik te ya jkux koꞌtantike, yuꞌun bayukix a jtajtik jwokoltik. Bayuk nax a jtajtik kꞌop y sok xiꞌel ta koꞌtantik.

⁶ Pero Dios te ya yaꞌbe spuersa yoꞌtan te machꞌatik maꞌyuk spuersa yoꞌtane, la yaꞌbotik spuersa koꞌtantik te kꞌalal jul te jTitoe.

⁷ Y ma jaꞌuk nax te kꞌalal jul tale, sok te ben jun yoꞌtan tal te ay spuersa yoꞌtan ta akuentaik te jaꞌexe. La yalbotikix te ben sniꞌ xꞌawaꞌiyik te ya akꞌan ya awilotike. Y la yalbotikix te beno yajtal awoꞌtanik sok te ben ya anaꞌikone. Y ta spisil te jich aye mas a junub koꞌtan yuꞌun.

⁸ Porke manchuk me la kakꞌ yajtal awoꞌtanik yuꞌun te karta te la jtsꞌibabeyex, te ora to ma yajtalukix koꞌtan. Aunke okꞌon yuꞌun te nail toe yuꞌun la kil te la yakꞌ yajtal awoꞌtanik te karta jun-chebuk kꞌaale,

⁹ Te ora to ben jun koꞌtan awuꞌunik. Ma jaꞌuk yuꞌun te la yakꞌ yajtal awoꞌtanike; jaꞌ jun koꞌtan yuꞌun te jich la asujtes awoꞌtanik ta stojol Diose. Porke yuꞌun jich a skꞌan Dios te la yakꞌ yajtal awoꞌtanike. Jich ma joꞌukotik ta jkuentatik teme ay tut ya xchꞌay ta atojolike.

¹⁰ Porke te ajtal-oꞌtan te ya xtal ta skuenta Diose, jich me ya sujtes koꞌtantik yuꞌun a sok jich me ya xkolotik yuꞌun a. Jich maꞌyukix ajtal-oꞌtanil. Pero te ajtal-oꞌtan yuꞌun te balumilale, ya me yakꞌ lajel.

¹¹ Te jaꞌex atꞌej ta awoꞌtanik te ajtal-oꞌtan jich tutꞌil ya skꞌan Dios, jich la awilikix te lek a lokꞌex koel ae. Yuꞌun bayal la anop ta awoꞌtanik te tut ya awut abaik yuꞌun te kꞌope. La yakꞌ ilinanik, y jich a xiꞌex yuꞌun. Patil la akꞌan te ya awilikon, y juꞌ awuꞌunik te la awaꞌbeyik kastigo te machꞌa mulawene. Sok spisil la awakꞌik ta ilel te maꞌyuk tut la amulinik yuꞌun te kꞌop to.

¹² Jich yuꞌun te kꞌalal la jtsꞌibabeyex te kartae, ma jaꞌuk nax a jnaꞌ te machꞌa staoj smule, sok ni ma jaꞌuk te machꞌa kꞌax swokol yuꞌune. Yuꞌun jaꞌ mas lek yauk xchiknaj ta stojol Dios te ay yajtal awoꞌtanik yuꞌun te joꞌotike.

¹³ Jaꞌ sluwaril te junix koꞌtantike te tutꞌil junubenix awoꞌtanike. Ben kontentootik te la kiltikix te ben jun yoꞌtan te jTitoe, yuꞌun apisilik te jaꞌexe te la awaꞌbeyik ta achꞌ te spuersa yoꞌtane.

¹⁴ Joꞌon a kalbeyix te jTito te ben jun koꞌtan awuꞌunik te jaꞌexe. Ma jta kꞌexlal yuꞌun te tut kalojbeyexe. Yuꞌun batsꞌi jich spisil te tutiꞌ kalbetikexe sok batsꞌi jich euk te tutiꞌ kalbeytik te jTitoe te ben jun koꞌtantik awuꞌunik te jaꞌexe.

¹⁵ Y mas lom kꞌuxex ta yoꞌtan te kꞌalal ya snaꞌex ta apisilik te la achꞌuunik te tutiꞌ yalbeyexe, sok te la awikꞌik sok te la awakꞌik ta kuentae.

¹⁶ Ben kontentoonix awuꞌunik, jun koꞌtan ta akuentaik.