1 Timoteo 1 - Nuevo Testamento Tzeltal de Amatenango

Spajtil-oꞌtanil

¹ Joꞌon jPabloon, apostolon yuꞌun te Jesucristoe. Tikonbilon ta smantal Dios te Koltawanej kuꞌuntike y te Kajwaltik Jesucristoe te jaꞌ yip koꞌtantike.

² Ya jtsꞌibabeyat te karta to, jTimoteo, te batsꞌi jnichꞌanat kꞌoem, te pajal nax jchꞌuunejtik te Diose. A me yaꞌbat te slekil yoꞌtan, te xkꞌuxul yoꞌtan y te bujtsꞌan kꞌinal te Dios Tatile y sok te Cristo Jesuse te jaꞌ Kajwaltike.

Makꞌ me skꞌan chꞌuunel te palso nojpesele

³ La kalbeyatix te kꞌalal boon ta estado yuꞌun Macedoniae te jaꞌ lek ya xjilat ta Efeso, yuꞌun ya me akom te machꞌa ya snojpeswan te tut ma jichuke,

⁴ te manchuk jaꞌuk nax ya xbajt ta yoꞌtanik te jontol kuento naxe, sok te tutik skuentoal te antiboetike te ma xlaj ta alele. Te tutik jich aye, jaꞌ nax ya yikꞌotik bael ta tijtonbajel, y ma jaꞌuk ya skoltayotik ta spasel te aꞌtel yakꞌojbotik te Dios yuꞌun te jchꞌuunejtike.

⁵ Te tut sluwar te jich la jpasat ta mantale, yuꞌun jaꞌ skꞌan te kꞌux ya kaꞌi jbajtik ta juju-tule. Jaꞌ te skꞌuxul-oꞌtanil te ya xchiknaj teme sakubenix te koꞌtantike, sok teme tojobenotike, y sok teme lek jchꞌuunejtik te Diose.

⁶ Yuꞌun ay machꞌatik te jejch a la jbajtix yuꞌune. Jowiyemix bael yuꞌun yalel jowil kꞌopetik.

⁷ Ya skꞌan ya yakꞌ sbaik ta maestro yuꞌun te smantal Diose, pero ma snaꞌbe sluwar te tut ya yalike, aunke ya skuyik te beno ya snaꞌik te tut ya yakꞌik ta nopele.

⁸ Jnaꞌojtik te lek te mantaliletike teme jaꞌ ya yichꞌ tuuntesel jich tutꞌil ya skꞌane.

⁹ Ya skꞌan ya jnaꞌtik te ma jaꞌuk yaꞌtel te mantaliletik te ya xchap te machꞌatik lek te tut ya spasike. Te mantaliletike jaꞌ ya yakꞌ kastigo yuꞌun te machꞌatik ma xchꞌuunik mantale, y sok te lom kꞌaxemike, sok te machꞌatik ma lekuke, y sok te jmulawiletike, y sok te machꞌatik ma xyakꞌ ta jkuenta te Diose, sok te ma skꞌanik te religione, sok te machꞌatik ya smil stat o smeꞌ, sok ta spisil te jmilawetike,

¹⁰ sok te machꞌatik ya sꞌantsiwejike, sok te pajal winiketik te ma lekuk tut ya spasik soke, sok te machꞌatik ya yelkꞌanik sok ya xchonik gentee, sok te jloꞌlawanejetike, y sok te machꞌatik palso te tut ya yalik ta testigoe, sok xan te machꞌatik ya spasik te tutik skontrainej te lekil nojpesele.

¹¹ Y te lekil nojpesel to, jaꞌ te tey ya jtatik a te ben tsaꞌam skꞌoplal yuꞌun te kolele, te jaꞌ a yaꞌbon kaꞌtelin te Diose te bayal slekilale.

La yal te tutꞌil a yichꞌ yaꞌtel te jPabloe

¹² Ya kalbe kola yal te Kajwaltik Jesucristoe te jaꞌ a yaꞌbon jpuersae, porke ya yil te jun koꞌtane, y la yaꞌbon kichꞌ kaꞌtel,

¹³ manchuk me snaꞌoj te la jtoyba-kꞌoptay ta nail toe, sok la jtentalan y la kikꞌtinlan. Pero te Diose la yaꞌbon slekil yoꞌtan ta jtojol, yuꞌun te joꞌon ma to jchꞌuunejuk aye, sok maꞌ jnaꞌ te tutꞌ ayon ta pasele.

¹⁴ Jich te Kajwaltike la yaꞌbon bayal te slekil yoꞌtan ta jtojol, y la yaꞌbon xchꞌuunel-oꞌtanil y sok te skꞌuxul-oꞌtanil te kichꞌojtik ta skuenta te jun nax ayotik sok te Cristo Jesuse.

¹⁵ Jaꞌ to batsꞌi jich, y spisil te genteetik ya skꞌan ya xchꞌuunik: Te Cristo Jesuse xtaluk ta balmilal yuꞌun tal skꞌoltay te jmulawiletike. Jich tutꞌil te joꞌone te kꞌax jich jmulawilon tutꞌil te yanetike.

¹⁶ Jaꞌ yuꞌun Dios la yaꞌbon bayal slekil yoꞌtan, skuenta yuꞌun jich me ya xchiknaj ta jtojol te ay bayal perdon ta yoꞌtan te Jesucristoe. Yuꞌun joꞌon seña ya yilik a te machꞌatik patil ya xchꞌuunik te Kajwaltike yuꞌun ya staik a te kuxlejal sbajtel kꞌinale.

¹⁷ ¡Jaꞌ aꞌ kakꞌtik ta akꞌel ta jkuenta sok aꞌ kaltik slekilal sil tiempo te Ajwalil yuꞌun sbajtel kꞌinale, te stalel ay, sok ma chikanuk ta ilel, y stukel nax Diose! Jichuk.

¹⁸ Jaꞌat jTimoteo, te jnichꞌanat ta koꞌtane, ya kaꞌbeyat ta akuenta te aꞌtel to, yuꞌun jich me ya xjuꞌ awuꞌun tsalaw ta skuenta te xchꞌuunel awoꞌtane y ta skuenta te toj awoꞌtane. Jich tutꞌil te nail yaloj te hermanoetik te la yalik te akꞌoplale ta skuenta te Diose.

¹⁹ Ay machꞌatik te ma xyakꞌik ta jkuenta te tut lek ta pasele. Chꞌayix xchꞌuunel yoꞌtanik yuꞌun.

²⁰ Jich a kꞌotix ta pasel ta skuenta te jHimeneo sok te jꞌAlejandroe, jaꞌ te machꞌatik la kakꞌix entregal ta skꞌab Satanas yuꞌun jich me ya xpꞌijubik a. Jich makꞌ yalikix te tutik ya stoyba-kꞌoptay a te Diose.