1 Tesalonicenses 5 - Nuevo Testamento Tzeltal de Amatenango

¹ Kermanotak, te tut ora sok te tut yilel stiempoil te ya xꞌkot ta pasele, ma puersauk te ya jtsiꞌbabeyex tale.

² Te jaꞌexe anaꞌojikix lek te tut kꞌaalil ya sujt tal te Kajwaltike, jich ya xtal tutꞌil jꞌelekꞌ te ya xtal ta ajkꞌubale.

³ Te kꞌalal ya yal te gentee: “Spisil ben bujtsꞌan kꞌinal, y maꞌyuk tut chikan”, teme xchiik, pero tsꞌin nax me ya xtal te slajelike. Jich tutꞌil ya xlijk swokol te ya xpajt yoꞌtan jtul ants te ay tut staoj sok te ma xjuꞌ ya xkol ta jich naxe.

⁴ Pero te jaꞌexe, kermanotak, maꞌyukex ta ijkꞌal kꞌinal, te yuꞌun chꞌayem awoꞌtanik te tut kꞌaalil te ya sujt tal te Kajwaltike, jich tutꞌil ya xtal te jꞌelekꞌe.

⁵ Apisilik te jaꞌexe sakil kꞌinalex yuꞌun te kꞌaale. Ma joꞌukotikix ta skuenta te ajkꞌubale ni te ijkꞌal kꞌinale.

⁶ Jaꞌ yuꞌun ma me wakꞌ wayukotik jich tutꞌil te yanetike. Ya skꞌan te kuxul koꞌtantik y pꞌij me ya skꞌan xꞌanotik.

⁷ Te machꞌatik ya xwayike, wayajtik me ta ajkꞌubal; y te machꞌatik ya xyakubike, ta ajkꞌubal te ya xyakubike.

⁸ Pero te joꞌotik te ayotik ta kꞌajkꞌaltike, ya skꞌan te siluk tiempo pꞌij ayotike. Ya skꞌan te jaꞌ ya jkoltay jbatik a ta skuenta te xchꞌuunel koꞌtantik y sok te skꞌuxul koꞌtantike. Y ya skꞌan ya jmak jbajtik jich tutꞌil jun kasko, jaꞌ te ay smukꞌul koꞌtanik yuꞌun te kolele.

⁹ Porke te Diose ma jaꞌuk ya yakꞌotik te ya kichꞌtik kastigoe. Jaꞌ ya yakꞌ te ya xkꞌo jtaik te kolel ta skuenta te Kajwaltik Jesucristoe.

¹⁰ Te Jesucristoe cham ta jkajtik yuꞌun teme kuxulotike o ya xchamotik. Jun nax me ya xkuxuyinotik sok stukel.

¹¹ Jaꞌ yuꞌun junutesbeya aba awoꞌtanik y aꞌbeya abaik spuersa awoꞌtanik jich tutꞌil te yipalexix ta spasele.

Te jPabloe la stsits te hermanoetike

¹² Kermanotak, awokolikuk akꞌaik me ta jkuenta te machꞌatik ya xꞌaꞌtejik te ba ayexe te ya stojutesex y ya stsitsex ta skuenta te Kajwaltike.

¹³ Ya skꞌan ya awichꞌik ta jkuenta, sok kꞌux me xꞌawaꞌiyik ta awoꞌtanik yuꞌun te yaꞌtel ya spasike. Junuk me awoꞌtan abaik.

¹⁴ Sok ya kalbeyex, kermanotak, ya me atsitsik te machꞌatik ma skꞌan xꞌaꞌtejike. Aꞌbeyaik yip yoꞌtanik te machꞌatik maꞌyuk yip yoꞌtanike. Koltayaik me te machꞌatik lom xcheben yoꞌtanike. Sok ayuk apasensia ta stojol spisilik.

¹⁵ Ila me abaik, ma me ayuk ni jtuluk te ya awaꞌbe stoj te tut ma lekuk te la spasbeyate. Sil tiempo jaꞌ me xꞌawoꞌtantayik te ya apasbey abaik te tut leke. Sok jich me xꞌapasbeyik ta spisil te yanetike.

¹⁶ Siluk me tiempo jun awoꞌtanik.

¹⁷ Ma me xꞌakom abaik ta skꞌoponel te Diose.

¹⁸ Albeyaik kola yal Dios yuꞌun ta spisil, porke jich ya skꞌan yoꞌtan stukel te Diose te tutꞌil achꞌuunejik te Cristo Jesuse.

¹⁹ Ma me xꞌakomik ta aꞌtel te Espiritue.

²⁰ Ma me xꞌapꞌajbeyik te skꞌopik te machꞌatik ya yalik te tut ya xꞌalbot yuꞌun te Diose.

²¹ Kuiadoukex me yuꞌun spisil kꞌopetik, sok akꞌa ta awoꞌtanik te tut leke.

²² Pita me abaik yuꞌun spisil ta jkaj te tut ma lekuke.

²³ Jaꞌ mismo te Dios yuꞌun te bujtsꞌan kꞌinale, jaꞌ me ya stojutesex te lek ya xꞌoex yuꞌune, y ya me skanantayex ta steklejal sok achꞌulelik sok awoꞌtanik sok atiꞌbalulik, skuenta ma me ayuk amulik a kꞌalal ya xtal te Kajwaltik Jesucristoe.

²⁴ Jun yoꞌtan te Machꞌa la yikꞌexe, y jich me ya xkꞌot ta pasel yuꞌun ta spisil to.

Spajtil-oꞌtanil y bendision ta slajibal

²⁵ Kermanotak, kꞌoponbotik me Dios euk.

²⁶ Albeyaik xkoltanuk ta spisil te hermanoetik sok sbujtsꞌ awoꞌtanik.

²⁷ Ya kalbeyex ta skuenta te Kajwaltike, te ya awilik te karta to sok spisil te hermanoetike.

²⁸ Te Kajwaltik Jesucristoe aꞌ yaꞌbeyex te slekil yoꞌtan ta atojolike. Jichuk.