1 Tesalonicenses 4 - Nuevo Testamento Tzeltal de Amatenango

Te tut lek ya yil Dios yuꞌun te jkuxlejaltike

¹ Te ora to, kermanotak, awokolikuk ya kalbetikex ta skuenta te Kajwaltike, jich me ya apasik xan tutꞌil te yipalexix ta spasele. Ja te tutꞌil joꞌotik a jnopestikex te jich ya apasike, skuenta yuꞌun lek ya yilex a te Diose.

² Te jꞌaexe anaꞌojik te pꞌijutesel la kaꞌbetikex, joꞌotik te ay kaꞌteltik yuꞌun te Kajwaltik Jesuse.

³ Te tut ya skꞌan te Diose jaꞌ te maꞌyuk amulik ya xkuxuyinex ta skuentae, sok te ma me ayuk machꞌa ya sꞌantsiweje.

⁴ Y ta juju-tulex toj ya skꞌan xꞌanex sok te batsꞌi awinamike, sok ay me ta akꞌel ta jkuenta awuꞌun.

⁵ Ma me jaꞌuk nax ta skuenta skꞌanojel atiꞌbalul te ya awikꞌ awinamin te antse, jich tutꞌil te genteetik te ma snaꞌbeyik sba te Diose.

⁶ Ma me ayuk machꞌa ay tut ya spasbe te ya sloꞌlay a te yermanoe. Porke te Kajwaltike tulan me ya yaꞌbe kastigo yuꞌun spisil to, jich tutꞌil la kalbeyexix.

⁷ Yuꞌun ma jaꞌuk a yikꞌotik Dios yuꞌun ya jpastik te tut ma tsaꞌamuke. Jaꞌ ya skꞌan te ben tsaꞌam ya xꞌanotik ta skuentae.

⁸ Jich yuꞌun, te machꞌa ya spꞌaj te nojpesel to, ma jaꞌuk ya spꞌaj jtul winik, sino ke jaꞌ ya spꞌaj te Diose, te jaꞌ la yaꞌbeyex te Chꞌul Espíritu yuꞌune.

⁹ Ma puersaukix te ya jtsꞌibabeyex te ayuk xkꞌuxul awoꞌtanik sok te awermano abaike, porke te Diose la yaꞌbeyex anopikix te kꞌux ya awaꞌiy abaik ta juju-tule.

¹⁰ Yuꞌun jich ya apasik te jaꞌexe sok spisil hermanoetik te aylan ta spisil Macedoniae. Pero awokolikuk, kermanotak, a me bayalejuk ta mas te skꞌuxul awoꞌtanike.

¹¹ Oꞌtantayaik te jun awoꞌtanik ya xkuxuyinex sok pasaik me te tut ay ta akuentaik spasele. Aꞌtejanik ta akꞌabik jich tutꞌil te la kalbetikexe,

¹² yuꞌun jich me ya yakꞌex ta jkuenta a te yanetike, sok jich ma me ayukix tut palta awuꞌunik a.

Te tutꞌil ya sujt tal te Kajwaltike

¹³ Kermanotak, ya jkꞌantik te ya anaꞌik te tut ya xkꞌot ta pasel yuꞌun te machꞌatik chamenike, skuenta yuꞌun ma me lom tristeukex te jaꞌexe, jich tutꞌil te yanetik te maꞌyuk tut smukꞌulinej yoꞌtanike.

¹⁴ Jich tutꞌil te jchꞌuunejtik te cham te Jesuse y chaꞌkux tale, jich jchꞌuunejtik te Dios ya xchꞌakuses tal sok Jesus te machꞌatik xchꞌuunej Dios a chamike.

¹⁵ Jaꞌ yuꞌun la kalbetikex te jaꞌexe jich tutꞌil la yakꞌ ta nopel te Kajwaltike: Te joꞌotik, te machꞌatik kuxulotik to jilele jaꞌ to teme tal te Kajwaltike, ma joꞌukotik ya xnalajotik yuꞌun te machꞌatik chamenike.

¹⁶ Porke ya me kaꞌitik jun tulan kꞌop ta mantal, sok skꞌop te statal angeletik, y sok te yokꞌel korneta yuꞌun te Diose. Y jaꞌ ya xkoj tal ta chꞌulchan te Kajwaltike. Y te machꞌatik xchꞌuunej Cristo a chame, primero ya xchꞌakuxik tal.

¹⁷ Ta patil te joꞌotik te kuxulotike ya me yikꞌotik bael euk jun nax sok te yanetik ta tokal, yuꞌun ya xkꞌo jta jbajtik sok te Kajwaltik teꞌ ta yolil chꞌulchane. Y jich me ya joyintik te Kajwaltik ta sbajtel kꞌinale.

¹⁸ Aꞌbeya abaik spuersa awoꞌtanik ta juju-tulex sok te kꞌopetik to.