1 Tesalonicenses 3 - Nuevo Testamento Tzeltal de Amatenango

¹ Jaꞌ yuꞌun te kꞌalal maꞌ kujch kuꞌun te ma xkaꞌiy te tutꞌil ayexe, la jnoptik te ya xjilon ta Atenas,

² y jaꞌ a jtikon te kermanotik jTimoteo, te jaꞌ jtul jꞌaꞌtel yuꞌun Dios te ay ta yalel te lek achꞌ kꞌop yuꞌun te Cristoe. La jtikon tal yuꞌun ya xtal yilex, y ya xtal yalbeyex xan lek te skꞌop Diose, y ya yaꞌbeyex spuersa te xchꞌuunel awoꞌtanike.

³ Yuꞌun jich ni jtuluk te jaꞌexe ya xchebaj yoꞌtan yuꞌun te tutꞌil ayex ta ilbajinel a. Yuꞌun jaꞌex mismo ya anaꞌik te puersa ya xkꞌax jwokoltik,

⁴ porke te kꞌalal joyinejtikex to aye, la kalbetikex te puersa ya xkꞌax jwokoltike. Y jich a kꞌot ta pasel, jich tutꞌil ya awilikix.

⁵ Jaꞌ yuꞌun, kꞌalal ma stsijk kuꞌun ta mas aye, la jtikon ta jojkꞌoyel tutꞌil ayex sok te tutꞌil ay te xchꞌuunel awoꞌtanike. Jaꞌ la jnaꞌ teme la achꞌuunik sujel yuꞌun te pukuje, sok te jowiluk nax ya xkꞌot te kaꞌteltike.

⁶ Pero te ora to te jTimoteoe sujtix tal kꞌalal Tesalónica, y yichꞌojbotik tal lek akꞌoplalik yuꞌun te xchꞌuunel awoꞌtanike y sok te slekil awoꞌtanike. La yalbotik te sil tiempo ya anaꞌotik sok slekil awoꞌtanik, y sok te awoꞌtanikuk ya akꞌan ya awilotik, jich tutꞌil te joꞌotik te ya jkꞌan kiltikexe.

⁷ Jaꞌ yuꞌun, kermanotak, aunke ayotik ta yolil te wokole sok te ilbajinele, la kichꞌtik xan spuersa koꞌtantik yuꞌun te la kaꞌiytik te jun awoꞌtanik achꞌuunejik te Diose.

⁸ Kꞌalal la kaꞌitik te jun awoꞌtanik ta skuenta te Kajwaltike, jich kuxuyinotik xan te joꞌotike.

⁹ Ta ora to ya skꞌan ya kalbetik bayal kola yal te Diose yuꞌun te jaꞌexe. Ben jun koꞌtantik awuꞌunik ta skuenta te Kajwaltik Diose.

¹⁰ Kꞌajkꞌal y ajkꞌubal ya kalbetik Dios te yauk yakꞌotik te ya xtal kiltikex ta sitike, sok te ya me jtsꞌakutestik te ay to xan ya skꞌan te xchꞌuunel awoꞌtanike.

¹¹ Jaꞌ mismo te Jtatik Dios y sok te Kajwaltik Jesuse te ya skoltayotik te ya xjuꞌ ya xtal kiltikexe.

¹² Y te Kajwaltike jaꞌ ya skꞌoltayex te bayal to xan kꞌux ya awaꞌiy abaik sok te ay skꞌuxul awoꞌtanik yuꞌun te yanetik ekꞌae. Jich tutꞌil joꞌotik te kꞌux ya kaꞌiytikex.

¹³ Jich me jun awoꞌtanik a, sok maꞌyuk amulik ta sit te Jtatik Diose kꞌalal ya sujt tal te Kajwaltik Jesuse sok spisil te machꞌatik yuꞌune. Jichuk.