1 Tesalonicenses 2 - Nuevo Testamento Tzeltal de Amatenango

Te yaꞌtel jPablo ta Tesalónicae

¹ Jaꞌex mismo, kermanotak, anaꞌojik te ma jowiluk nax te kꞌo kiltikex tale.

² Anaꞌojikix te nail to la jtatik utel y ilbajinel ta jtejklum Filipose. Pero Dios a skoltayotik ta yalel te ba ayex te skꞌoplal te kolel ta spisil jpuersa, aunke la kichꞌtik bayal kontrainel yuꞌun.

³ Porke ma jowiluk nax te tut yipalotik ta yalele. Ni ma jaꞌuk a kaltik te tut ma lekuk, sok ma jaꞌuk jnopojtik te ay machꞌa ya jloꞌlaytik ae.

⁴ Dios lek a yilotik y la yaꞌbotik ta jkuentatik ta yalel te skꞌoplal kolele, jich tutꞌil te ya kaltike. Ma jaꞌuk ya jkꞌantik te lek ya yilotik te gentee; jaꞌ ya jkꞌantik te lek ya yilotik te Diose te jaꞌ ya snaꞌbotik tutꞌil ay te koꞌtantike.

⁵ Jich tutꞌil anaꞌojik te ma lauk jmontikex ta ben tsaꞌam kꞌopetike. Ni ma lauk jletik tut ya kaltik skuenta yuꞌun ya jtatik takꞌin yuꞌune. Jaꞌ testigo kuꞌuntik te Diose.

⁶ Sok ma jaꞌuk a jletik te ay machꞌa ya yakꞌotik ta jkuentae, ni te jaꞌexe ni te yanetike. Aunke me ya xjuꞌ te ya awakꞌotik ta jkuenta te tutꞌil ay kaꞌteltik ta apostolil yuꞌun te Cristoe.

⁷ Te nail toe, jich a kꞌootik tutꞌil untiketik ta awolilik. Sok jich tutꞌil meꞌil te ya stsꞌijtes y ya skꞌanantay te batsꞌi yuntikile.

⁸ Jich lek a jkꞌuxutaytikex te jaꞌexe. Ben jun koꞌtantik a kaꞌbetikex te ma jaꞌuk nax te lek achꞌ kꞌop yuꞌun te Diose, sino ke asta te jkuxlejaltike. Yuꞌun ben kꞌuxex ta koꞌtantik.

⁹ Kermanotak, te jaꞌexe naꞌaik me te tutꞌil a aꞌtejotik y la jpastik puersa yuꞌun jich la jta jkuxlejaltik a. Aꞌtejotik ta kꞌajkꞌal y ajkꞌubal, yuꞌun maꞌ jkꞌantik te la kakꞌtik awokolik te jaꞌexe te la kalbeyex skꞌoplal te Diose.

¹⁰ Jaꞌex testigoex yuꞌun, y jaꞌ testigo euk te Diose, te tutꞌil maꞌyuk mulil ta koꞌtantik y toj a anotik, sok maꞌyuk ba jta jmultik ta atojolik.

¹¹ Sok anaꞌojik te la kaꞌbetikex spuersa awoꞌtanik y la junutesbeyex awoꞌtanik ta juju-tulex te jaꞌexe, jich tutꞌil ya spas jtul tatil sok te yuntikile.

¹² La kalbetikex te jich me xꞌapasik te tutꞌil ya skꞌan ya spas te machꞌatik yuꞌun te Diose, te la yikꞌex skuenta yuꞌun ya xkꞌoex ta ba ay ta ajwalinel y sok te ba ay te slekilale.

¹³ Jaꞌ yuꞌun sil tiempo ya kalbetik kola yal Dios yuꞌun te kꞌalal la awaꞌiyik te skꞌoplal Dios te la kalbetikixe, la achꞌuunik te jaꞌ skꞌop te Diose, sok ma jaꞌuk skꞌop nax te winketike. Y batsꞌi jich te jaꞌ skꞌop te Diose, te yipalix ta aꞌtel ta akuentaik te jayebex te achꞌuunejike.

¹⁴ Kermanotak, kꞌalal kꞌax awokolik yuꞌun tenel ta skꞌab te alumalike, jich mismo a kꞌot ta pasel ta stojol te hermanoetik yuꞌun Dios te aylan ta Judea te jaꞌ yuꞌunix te Cristo Jesuse. Yuꞌun jich a yichꞌik tenel euk yuꞌun te slumal juriyoetike.

¹⁵ Te juriyoetik to jaꞌ a smilik te Kajwaltik Jesuse, jich tutꞌil te nail to te la smilik te jꞌalwanejetike, y la stenotik lokꞌel ekꞌa te joꞌotike. Ma lekuk ya xꞌilot yuꞌun te Diose, y skontrainejik spisil te gentee.

¹⁶ Yuꞌun te kꞌalal kꞌan kalbetik te machꞌatik ma juriyouk yuꞌun jich me ya xkolik ekꞌa, maꞌ yaꞌbotik jpastik. Jich yanyan yipal ta bayalejel te smulike. Pero te ora to julix ta stojolik te tulan kastigo yuꞌun Dios.

Te jPabloe ya skꞌan xba yil xan te Tesalónicaetik

¹⁷ Kermanotak, te kꞌalal kꞌax cheꞌoxeb kꞌaal te lokꞌonix tel ta awolilike, aunke makꞌ ya kiltikex, sil tiempo ayex ta koꞌtantik, y spꞌejel koꞌtan la jkꞌan te ya xba kiltikexe.

¹⁸ Kꞌan talukotik, joꞌon te jPabloone, bayal buelta a kꞌan jpas te ya xtalone, pero te pukuje la skomotik.

¹⁹ Porke ¿tut a te yip koꞌtantike sok te sbujtsꞌ koꞌtantike sok te jkoronatik kꞌoem te ben jun koꞌtanik yuꞌune? Jaꞌukex mismo, te kꞌalal ya sujt tal te Kajwaltik Jesucristoe.

²⁰ Jaꞌex te ben kontentootik awuꞌunike y sok bayal sbujtsꞌ koꞌtantik awuꞌunik.