1 Juan 1 - Nuevo Testamento Tzeltal de Amatenango

Te Machꞌa Kꞌop yuꞌun Kuxlejale

¹ Te tut ya jtsꞌibabetikex a, jaꞌ skꞌoplal te Machꞌa ayix a desde slijkibale, te kaꞌiyejtik te skꞌope y te kilojtik ta sitike. Porke la kiltik y la jpiktik ta jkꞌabtik. Ja xyal te Machꞌa Kꞌop yuꞌun te Kuxlejale.

² Kꞌo chiknajuk te Jꞌakꞌkuxlejale, y joꞌotik a kiltik, y joꞌotik a kalbetik skꞌoplal. Jaꞌ ya kalbetikex skꞌoplal te Machꞌa ya yakꞌ te kuxlejal sbajtel kꞌinale, jaꞌ te jun nax ay sok te Tatile, sok te la yakꞌ sba ta ilel ta jtojoltike.

³ Ya kalbetikex te tut kilojtik y kaꞌiyejtike, yuꞌun te jaꞌexe junuk nax me ya xkꞌootik, jachik tutꞌil jun nax ayotik sok te Dios Tatile y sok te Xnichꞌane, jaꞌ te Jesucristoe.

⁴ Te tutik to la jtsꞌibatik yuꞌun tsꞌakal me ya awichꞌik a te bujtsꞌan kꞌinale.

Jaꞌ sakil kꞌinal te Diose

⁵ Te tut la snojpesotik te Jesucristoe, jaꞌ ya kalbetikex te jaꞌexe. La yalbotik te jaꞌ sakil kꞌinal te Diose, sok maꞌyuk ijkꞌal kꞌinal ta skuenta stukel.

⁶ Teme ya kaltik te jun nax ayotik sok te Diose, y mismo tiempo ayotik ta ijkꞌal kꞌinal, jaꞌ nax ya jloꞌlay jbajtik ta jkꞌoptik y sok te tut ya jpastike.

⁷ Pero teme ayotik ta sakil kꞌinale, jich tutꞌil ay ta sakil kꞌinal te Diose, jich jun nax ayotik ta jpisiltik. Sok te xchꞌichꞌel te Xnichꞌan Diose, jaꞌ te Jesucristoe, ya spokbotik spisil te jmultike.

⁸ Teme ya kaltik te maꞌyuk jmultike, joꞌotike nax mismo ya jloꞌlayej jbajtik y te tut batsꞌi jiche maꞌyuk ta jtojoltik.

⁹ Pero teme ya kaltik ta jamal te jmultike, ya xjuꞌ ya xchꞌuun koꞌtantik te jaꞌ ya yaꞌbotik te Diose te tut stojil aye: jaꞌ ya yaꞌbotik perdon yuꞌun te jmultike y ya spokbotik spisil te tut ma lekuke.

¹⁰ Teme ya kaltik te maꞌyuk jtaoj jmultike, jaꞌ ya jlebetik lot te Diose y ma jchꞌuunejtikuk te batsꞌi jich te skꞌope.