1 Corintios 5 - Nuevo Testamento Tzeltal de Amatenango

Ya yichꞌ chapel te machꞌa spasoj mulile

¹ Pujkemix akꞌoplalik te ay jtulex te jaꞌexe te yinaminej te xchaꞌmeꞌe. Te mulil to lom tulan skꞌoplal. Ni maꞌyuk machꞌa jich spasoj te gente te ma snaꞌbeyik sba te Diose.

² Y te jaꞌexe ya atoy abaik te lek ayex ta akꞌopike. Jaꞌ lek te lauk awakꞌ yajtal awoꞌtanike. Te winik to te jich spasoje ya me skꞌan ya atenik lokꞌel ta awolilik.

³ Manchuk teme ma jteklejaluk ayon te ba ayexe, pero joyinejex ta koꞌtan. Y jich kꞌoem te ayon ta awolilik ta skuenta te Kajwalik Jesucristo. Jich la jchapix te machꞌa staoj smul te jich spasoje.

⁴ Kꞌalal ya atsob abaik te jaꞌexe, teꞌ ayon sok koꞌtan a te ba ayexe. Y jich te spoder te Kajwaltik Jesuse teꞌ ay ekꞌa te ba ayexe.

⁵ Jich te winik me to ya me awakꞌik entregal ta skꞌab pukuj, yuꞌun te stiꞌbalule ya me xlaj y te xchꞌulele ya me xkol te kꞌalal ya xtal te Kajwaltik Jesuse.

⁶ Te jaꞌxe ma me lekuk teme ya atoy abaik yuꞌun te tut ya apasike. Anaꞌojikix te jich ay ta alel: “Te chꞌin nax te levadurae ya spajutes spisil te matsꞌe” —xchi me.

⁷ Jich yuꞌun lokꞌesaik me te kꞌaꞌ levadura te ya yixlanexe. Yuꞌun jich me ya xkꞌoex te tutꞌil pan te pasbil ta achꞌ harina te maꞌyuk yichꞌoj levadura te ya xweꞌot ta kꞌin yuꞌun Pascuae. Yuꞌun jich me ayex te jaꞌexe. Porke te Cristo jaꞌ te chꞌin karnera a kꞌot yuꞌun te Pascuae, te stukel a cham te la yakꞌ sba ta majtanil kuꞌuntike.

⁸ Jich me ya skꞌan jpastik te kꞌin Pascua kuꞌuntike. Lekuk me te koꞌtantike y batsꞌi jichuk me, te tutꞌil pan te maꞌyuk yichꞌoj levadurae. Y ma me apasik sok te tut ma tsaꞌamuke y sok te tut ma tsaꞌamuk ya xjimawane, te jich kꞌoem tutꞌil kꞌaꞌ levadurae.

⁹ Te jun xan jkartae, la kalbeyex te ma spas ya awakꞌ abaik sok te machꞌa ya spas mulile.

¹⁰ Y ma yuꞌunuk ya kal te jkꞌaxel ya apit abaik sok spisil te machꞌatik ayik ta skuenta te balmilale: te jmulawiletike, sok te jbikꞌtal-oꞌtanetike, sok te jꞌeleketike, sok te ya xchꞌuunik lotil diosetike. Yuꞌun jaꞌ to ya xjuꞌ awuꞌunik a te ya xlokꞌex bael liꞌ ba balmilale.

¹¹ Te la jkꞌan la kalbeyexe jaꞌ te ma spas ya awakꞌ abaik sok ni jtuluk te hermano ya yal sbae teme jaꞌ te machꞌa ya xꞌantsiweje, o jaꞌ te jbikꞌtal-oꞌtane, o jaꞌ te xchꞌuunej lotil diose, o jaꞌ te ya xꞌixta-kꞌoptawane, o jaꞌ te jyakubele o jaꞌ te jꞌeleqꞌe. Te gente te jich aye, ni ma me ajoyinik ta weꞌel.

^12-13 Te joꞌone maꞌyuk ta jkuenta xchapel te machꞌatik ma xchꞌuunejuk te Diose, jaꞌ ya xchapot yuꞌun te Diose. Pero te jaꞌexe ay ta akuentaik xchapel te machꞌa ay ta awolilike. Jaꞌ yuꞌun, lokꞌesaik bael te jmulawil te ay ta awolilike.