1 Corintios 1 - Nuevo Testamento Tzeltal de Amatenango

Spajtil yoꞌtanik te hermanoetik ta jtejklum Corinto

¹ Joꞌon jPabloon, te la yikꞌon ta aꞌtel te Diose ta skꞌanojel yoꞌtan. La yakꞌon ta apostolil yuꞌun te Jesucristoe. Joꞌon sok te hermano Sóstenese

² ya jtsꞌibabeyex te karta to jaꞌex te hermanoetik tsobilex yuꞌun Dios te ayex ta jtejklum Corintoe, te ikꞌtalanbilex yuꞌun te Diose ta skuenta Cristo Jesus. Dios la yikꞌex te lek ya xꞌanex te jtejklum yuꞌunex sok spisil ta bayuk te machꞌatik ya yalbeyikix kola yal te Kajwaltik Jesucristoe. Jaꞌ Kajwaltikix te joꞌotike y sok euk te yanetike.

³ Te jTatik Diose y sok te Kajwaltik Jesucristoe a me yaꞌbeyex slekil yoꞌtan y sok te bujtsꞌan kꞌinal yuꞌune.

Ay bendisionetik ta skuenta te Cristoe

⁴ Sil tiempo ya kalbe kola yal Dios ta atojolik, yuꞌun te slekil yoꞌtan Dios la yaꞌbeyex ta skuenta te Cristo Jesuse.

⁵ Yuꞌun ta skuenta te Cristo Jesuse, Dios a yaꞌbeyex bayal slekilal, jich tutꞌil te ya anaꞌik te lek ya xkꞌopojexe, sok spisil te tut ya anaꞌike.

⁶ Komo kꞌoemix ta awoꞌtanik te tutꞌ la awaꞌibeyik skꞌoplal te Cristoe.

⁷ Te tutꞌil jich aye maꞌyukix falta awuꞌunik te tutik ya yakꞌ te Diose. Jich me jun awoꞌtanik te yipalex ta smaliyel te tut kꞌaalil ya xchiknaj tal te Kajwaltik Jesucristoe.

⁸ Dios me ya yaꞌbeyex spuersa awoꞌtanik jaꞌ to kꞌalal ta slajibal kꞌaal. Jich ma me ayuk amulik te kꞌalal ya sujt tal te Kajwaltik Jesucristoe.

⁹ Te tut yaloj te Diose puersa ya skꞌoes ta pasel. Y jaꞌ te machꞌa la yikꞌexe te jun nax ya xkuxuyinex sok te Xnichꞌane, jaꞌ te Jesucristo te Kajwaltike.

Xatꞌoj sbaik te jtijk hermanoetike

¹⁰ Kermanotak, ta sbiil te Kajwaltik Jesucristoe, awokoliluk te yauk xꞌochex ta akuerdo sok te maꞌ xatꞌojuk abaike. Junuk me awoꞌtan abaik sok junuk nax me te tut ya anopike sok te tut ya awalike.

¹¹ Ya kalbeyex to kermanotak, porke la yalbelonix te machꞌatik ay yuꞌun te jCloee te lijkem kꞌop awuꞌunike.

¹² Jaꞌ te ay jtul-chebex te ya awalik: “Joꞌon ayon ta skuenta jPablo”, yan ya yal: “Joꞌon ayon ta skuenta Apolos”, yan ya yal: “Ayon ta skuenta jPedro”, yan ya yal: “Joꞌon ayon ta skuenta Cristo”, xchaex.

¹³ ¿Me yuꞌun chaꞌoxjajt lokꞌem a te Cristoe? ¿Me yuꞌun joꞌon a kichꞌ jojkꞌanel ta krus awuꞌunik? ¿O te la awichꞌik jaꞌ te jaꞌexe me jaꞌ ta jbiil?

¹⁴ Kola yal Dios te ma joꞌukon a kaꞌbeyex awichꞌik jaꞌ ni jtuluk te jaꞌexe. Jaꞌ nax a kaꞌbe yichꞌ jaꞌ te Crispoe sok te jGayoe.

¹⁵ Jich maꞌyuk machꞌa ya xjuꞌ ya yal te aꞌbot yichꞌ jaꞌ ta joꞌon jbiile.

¹⁶ Sok la kaꞌbe yichꞌ jaꞌ euk te machꞌatik ay yuꞌun te Estéfanase. Ma jnaꞌ teme ay to yan machꞌa a kaꞌbe yichꞌ jaꞌe.

¹⁷ Yuꞌun te Cristoe ma jaꞌuk a stikonon ta yakꞌel ichꞌ jaꞌ. Jaꞌ nax a stikonon ta yalel skꞌoplal te kolele. Y ma jaꞌuk ta spꞌijil genteetik te la kal lokꞌel ta jtiꞌe, yuꞌun ma lomuk nax ya xkꞌot a te cham ta krus te Cristoe.

Te Cristoe jaꞌ spoder y spꞌijil te Diose

¹⁸ Lom nax kꞌoem ta yoꞌtanik te machꞌatik chꞌayel ya xlaj bajtike te tutꞌ ay skꞌoplal te cham ta krus te Cristoe. Pero te skꞌoplal to jich kꞌoem ta koꞌtantik te jaꞌ spoder Dios yuꞌun te machꞌatik ya xkolotike.

¹⁹ Jich tutꞌil ya yal te Sjun Diose: “Ya me jimbey spꞌijil te machꞌatik pꞌijike, sok ya me jpꞌajbey te tut ya snaꞌik te machꞌatik bayal tut ya snaꞌike”, xchi me.

²⁰ ¿Baꞌay te machꞌa pꞌije? ¿Y baꞌay te maestro yuꞌun te mandariletike? ¿Y baꞌay te machꞌa ya snaꞌ yalel tutꞌil ay bael te balmilale? Dios a sujtesbeyix ta jowil nax te spꞌijil te tut ya snaꞌ liꞌ ba balmilal to.

²¹ Te Diose ta skuenta spꞌijil maꞌ yakꞌ sba ta naꞌel yuꞌun te machꞌatik ay ta skuenta te balmilale; maꞌ snaꞌbeyik sba ta skuenta te spꞌijilik naxe. Jaꞌ lek a yaꞌi te Diose te ya skoltay ta skuenta skꞌop te ya stikon ta alel ta stojol te machꞌatik ya xchꞌuunike, aunke te skꞌoplal to jowil nax kꞌoem ta yoꞌtanik.

²² Te juriyoetike ya skꞌan ya yilik jun seña milagro, y te griegoetike ya sleik spꞌijilik.

²³ Pero te joꞌotike jaꞌ ya kaltik te tutꞌil a milot ta krus te Cristoe. Jaꞌ to jaꞌ nax xcheꞌbantesel yoꞌtanik yuꞌun te juriyoetike, y te machꞌatik ma juriyouke, jowil nax kꞌoem ta yoꞌtanik.

²⁴ Pero te machꞌatik ikꞌbilik yuꞌun te Diose, me juriyoetik o griegoetik, jaꞌ kꞌoem ta yoꞌtanik te jaꞌ spoder Dios sok jaꞌ spꞌijil Dios te Cristoe.

²⁵ Yuꞌun te tutꞌil snopoj Dios te kuybil ta jowil naxe, jaꞌ mas ben pꞌij ke te spꞌijil gente naxe. Y te tutꞌil lom pekꞌ ya spas te Diose, jaꞌ mas tulan ke te spisil spuersa gentee.

²⁶ Kermanotak, ya skꞌan ya anaꞌik te tutꞌil yikꞌojex te Diose. Ma bayalukex te ay apꞌijilik ta sitik te gentee, y ma bayalukex te ay awaꞌtelik sok te aꞌbilex ta jkuenta yuꞌun te gentee.

²⁷ Yuꞌun jaꞌ tsabilik yuꞌun Dios te machꞌatik maꞌyuk spꞌijilike, yuꞌun jich me ya xꞌakꞌot ta kꞌexlal te machꞌatik ay spꞌijil skuyoj sbaik aye. Y jaꞌ atsaot te machꞌatik lom pekꞌik liꞌ ba balmilale, yuꞌun jich me ya xꞌakꞌot ta kꞌexlal te machꞌatik tulan skuyoj sbaik aye.

²⁸ Te Diose jaꞌ a stꞌuj te gente te lom pꞌajbile sok te machꞌatik maꞌyukik tut aye te ma aꞌbiluk ta jkuenta liꞌ ba balmilale, yuꞌun jich me ya slajinmbe skꞌoplal te machꞌatik aꞌbil ta jkuentae.

²⁹ Yuꞌun jich me ni jtul maꞌyuk machꞌa ya xjuꞌ mukꞌ ya yakꞌ sba ta skuenta te Diose.

³⁰ Pero mismo te Diose jun nax a stsobex sok te Cristo Jesuse. Y jich a spas te jaꞌ jpꞌijiltik a yaꞌbotik te Cristoe. Y ta skuenta te Cristoe jich kolemotikix yuꞌun te jmultike. Uꞌuninbilotikix yuꞌun Dios y jaꞌ la skoltayotikix.

³¹ Jaꞌ yuꞌun, jich ya yal te tsꞌbabil jilel ta Sjun te Diose: “Teme ay machꞌa ya skꞌan stulantes sbae, a me stulantes sba ta skuenta te Kajwaltike”, xchi me.