Yunusa 2 - Alla la Kitabu Seniman

Nabi Junusa ka Alla matara kɔɔji kɔrɔ

¹ Awa, Allabatala ka jɛɛ ba do lana mɛn ka Nabi Junusa lakunun. Nabi Junusa ka tele sawa ni su sawa kɛ jɛɛ kɔndɔ.

² Ka a to jɛɛ kɔndɔ, Nabi Junusa ka a Maari Allabatala tara.

³ A ka a fɔ ko: «Allabatala, ka n to tɔrɔya ba rɔ, n ka i matara. I ka n jabi. Ka n to lakira rɔ saya rɔ, n kulera dɛmɛnni ko rɔ. I ka n namɛn.

⁴ I ka n nafili kɔɔji rɔ, fɔɔ kɔɔji dun ba kɔrɔ. Kɔɔji ka n naminin fan bɛɛ rɔ. I ka kɔɔji kuru ba mɛnilu lana, woilu bɛɛ lara n kan.

⁵ N tɛrɛ ye a fɔla n jɛrɛ ma ko i ra n gbɛn ka n bɔ i ɲakɔrɔ. Kɔni n lani a la n di i la bon sɛniman yen ikɔ tuun.

⁶ Kɔɔji ka n natunun ka n na ɲenemaya masilan. N jiira fɔɔ kɔɔji dun ba kɔrɔ. Kɔɔjikɔrɔ binilu mɔrɔnmɔrɔnni tɛrɛ n kun ma.

⁷ N jiira fɔɔ koyinkɛilu sen kɔrɔ kɔɔji kɔrɔ. N sera suilu la jamana rɔ. A da bɛɛ sɔɔra n ma kadawu. Kɔni ile, n Maari Allabatala, i ka n kɛndɛ layɛlɛ lakira kɔndɔ.

⁸ N Maari Allabatala, ka a to dɔɔni n tun di sa, n miriya sera i ma. I ka n na matarali kan namɛn i la bon sɛniman kɔndɔ.

⁹ Mɔɔ mɛnilu ye batofen ɲatɔnɔntanilu batola, woilu ri bɔnɔ i la kaninteya rɔ.

¹⁰ Kɔni nde ri kalaman bɔ i yɛ ka i tando, ka saraka di i ma. N ka dakan mɛn ta i yɛ, n di wo mafa. Allabatala, ile kelen pe le ri se mɔɔ kisila.»

¹¹ Awa, Allabatala kumara jɛɛ ba yɛ. Wo rɔ, jɛɛ ba ka Nabi Junusa labɔ gbere ma.