Kɔlɔsikailu 4 - Alla la Kitabu Seniman

¹ Jɔn tiilu, ko mɛn bɛnni, mɛn telenni, ai ye wo kɛ ai la jɔnilu yɛ. Ai ye a lɔn ko ai tii ye sankolo rɔ fanan.

Lalililu

² Ai ye ai raja Alla matara ma, ka a to ai ɲana, ka baraka bila a yɛ.

³ Ai ye Alla matara an yɛ fanan, kosa Alla ye an na kuma lasɔnɔya kosa n ye se Mɔɔ Ɲenematɔmɔnin na gbundu ko lasela, n ye kaso la mɛn na ko rɔ.

⁴ Ai ye a madiya, n ye a fɔ a gbɛ rɔ ikomin a bɛnni n ma ɲa mɛn ma.

⁵ Ai ye taama hankilimaya rɔ lemɛniyabaliilu fan fɛ, ai ye fɛrɛ ɲinin waatiilu ma.

⁶ Ai la kuma ye kɛ sɔli kuma bɛrɛ le ri. Ai ye a lɔn ai ye mɔɔ bɛɛ jabila a ɲuma la ɲa mɛn ma.

Foli labanilu

⁷ An diyana badenma Tisiki le ri n na ko bɛɛ fɔ ai yɛ. Maari la baaraden ɲɔɔn lemɛniyani le a ri mɛn ye baarala Maari yɛ ikomin nde.

⁸ N ye a lawala ai ma kun ɲin de la kosa ai ye an kɛɲa lɔn, ka ai lalemɛniya.

⁹ An diyana badenma, lemɛniya mɔɔ, Onesimɔ mɛn bɔni ai tɛma, n ye a lawala ai ma. Ko mɛn taminni yan, ii ri wo bɛɛ ɲafɔ ai yɛ.

¹⁰ N kasolabila ɲɔɔn Arisitariki ye ai fola a ni Marika, Barinabasi dɔɔni. Ai tɛrɛ ra jamariilu mɛn mɛn na ko rɔ, ni a nara ai wara, ai ye a lasɛnɛ ɲa ɲumala.

¹¹ Isa, mɛn fanan ye tɔɔla Jusitusu, wo fanan ye ai fola. Yahudiyailu tɛma woilu le dɔrɔn ye baarala n fɛ Alla la Mansaya la ko rɔ, woilu le kɛni n nii nasɛwa mɔɔilu ri.

¹² Ai la mɔɔ do ye ai fola, Epafirasi, Isa Ɲenematɔmɔnin na baaraden. A ye kɛlɛ kɛla ai yɛ Alla matara rɔ waati bɛɛ, kosa ai rajanin di to, ka sabati, ka to hankili latɛɛ rɔ ka dafa Alla sawo bɛɛ rɔ.

¹³ N ye wo sereya bɔla a yɛ, a ka baara gbɛlɛn kɛ ai la ko rɔ kosɛbɛ a ni Layodisekailu ni Herapolisikailu.

¹⁴ An diyana mɔɔ, Luka dandalila, a ni Demasi ye ai fola.

¹⁵ Ai ye badenmailu fo an yɛ mɛnilu ye Layodise, a ni Nimifa ni lemɛniya jama mɛn ye ladɛn kɛla a la bon kɔndɔ.

¹⁶ Ai wa bataki ɲin karan ai wara, ai ye a kɛ a ye karan Layodisekailu la lemɛniya jama yɛ. Mɛn fanan ye bɔla Layodise, ai ye wo fanan karan.

¹⁷ Ai ye a fɔ Arikipe yɛ ko: «I ka baara mɛn sɔrɔn Maari la, a kɛ i hankili la, ka a lakanbali.»

¹⁸ Nde Pɔli le ka foli laban ɲin sɛbɛ n bolo la: Ai ye ai hankili to n na kaso labila ko. Alla la sɔli ye to ai fɛ.