Kɔlɔsikailu 1 - Alla la Kitabu Seniman

¹ Nde Pɔli mɛn kɛni Isa Ɲenematɔmɔnin na talibidenba ri Alla sawo rɔ, nde ni an badenma Timote le ka bataki ɲin sɛbɛ,

² ka wa an nakelenɲɔɔ sɛnimanilu ma mɛnilu lemɛniyani Mɔɔ Ɲenematɔmɔnin ma Kɔlɔsi so kɔndɔ. An Fa Alla ye sɔli ni jususuma di ai ma.

Baraka bila Alla matara rɔ

³ An wa kɛ Alla matarala ai yɛ, an ye baraka bilala an Maari Isa Ɲenematɔmɔnin Fa Alla yɛ ai la ko rɔ waati bɛɛ,

⁴ ka a masɔrɔn an da ai la lemɛniya la ko mɛn ka bɛn Mɔɔ Ɲenematɔmɔnin Isa la ko ma a ni ai ka a la Alla la jama sɛniman kanin ɲa mɛn ma.

⁵ Wo le rɔ, ai la lemɛniya ni ai la kaninteya kun lɔni wo jii le ma, mɛn namarani ai yɛ harijeene rɔ. Ai ra wo jii lɔn, Kibaro Ɲuma ba tuɲa kuma sera ai ma tuma mɛn na.

⁶ Kibaro Ɲuma ɲin da na ai ma ikomin a natɔ dunuɲa bɛɛ ma ɲa mɛn ma. A ri jiri, ka siyaya. A ye wo ɲa fanan ma ai tɛma kɛbi ai ka Kibaro Ɲuma mɛn lon mɛn na, ai ka Alla la sɔli lɔn.

⁷ Epafirasi le ka ai karan, an diyana baaraden ɲɔɔn, mɛn kɛni ai yɛ Mɔɔ Ɲenematɔmɔnin na keladen sabarinin di.

⁸ Ale le ka a fɔ an yɛ, Alla la Nii Sɛniman ka kaninteya di ai ma ɲa mɛn ma.

⁹ Wo le ka a kɛ, kɛbi an ka wo mɛn lon mɛn na, an ye Alla matarala ai yɛ waati bɛɛ! An ye madiyali kɛla kosa ai ye dafa Alla sawo lɔn dɔ a ni lɔnnin ni hankilimaya bɛɛ Alla la Nii Sɛniman ye mɛn dila.

¹⁰ Wo rɔ, ai ri se taamala ikomin Maari ye a fɛ ɲa mɛn ma, ka a hɛnɛn ɲa bɛɛ ma. A ye jiri ai kɛwali ɲumailu rɔ ka jiriwa Alla lɔn dɔ.

¹¹ An ye Alla matarala ikɔ tuun kosa ai ye fanka ba sɔrɔn Alla la fanka nɔɔrɔ fɛ, ka se ai tunadiyala, ka ai muɲun fanan.

¹² Ai ye baraka bila Fa Alla yɛ sɛwa rɔ baa ale le ka a kɛ ai ka cɛ sɔrɔn mɛn ye kɛnɛ mansaya rɔ jama sɛniman yɛ.

¹³ Ale ra an kisi dibi fanka ma, ka wa an di a diyana dencɛ la mansaya rɔ

¹⁴ mɛn ka an kunka, ka an julumunilu kafari.

Mɔɔ Ɲenematɔmɔnin

¹⁵ Alla yenbali munuɲa le a ri. Ale le den fɔlɔ ri dalifen bɛɛ kun na.

¹⁶ Ka a masɔrɔn Alla ra fen bɛɛ dan ale baraka rɔ sankolo ni duukolo kan, fen mɛnilu ye yenna a ni mɛnilu tɛ yenna, mansayailu, kuntiilu, fankatiilu, ni faamailu. Fen bɛɛ danni ale le baraka rɔ ale yɛ.

¹⁷ A tɛrɛ ye ye yani fen bɛɛ ye dan. Fen bɛɛ mamira ale le bolo.

¹⁸ Ale le lemɛniya jama kun di mɛn kɛni ikomin a fari. Ale le habadan mɔɔ fɔlɔ wulinin di ka bɔ saya rɔ, kosa a ye kɛ ɲɛmɔɔ ri wo ko bɛɛ rɔ.

¹⁹ Ka a masɔrɔn a ra diya Alla yɛ a ye a kɛɲa dafani bɛɛ to Isa rɔ.

²⁰ A ra sɔn fanan, a ye woilu ni fen bɛɛ tɛmala rabɛn mɛn ye duu ni sankolo ma a la Mɔɔ Ɲenematɔmɔnin baraka rɔ. A jeli bɔra ka faa gbɔngbɔn jiri ma kosa a ye jususuma di an ma.

²¹ A damira, bɛnbaliya tɛrɛ ai ni Alla tɛma fewu! Ai ka ai jɛrɛ kɛ a juuilu ri ai miriyailu ni ai kɛwali juuilu fɛ.

²² Kɔni sisen, a ra ai tɛmala rabɛn a faribanku la saya fɛ, kosa a ye na ai lasɛninya ri a ɲakɔrɔ. Fɛ tɛ ai la butun, a tɛ ai maborila butun.

²³ Kɔni, fɔɔ ai ye to lemɛniya kan fewu, kosa ai kana mataa Kibaro Ɲuma jii la ai ka mɛn mɛn mɛn naseni dalifen bɛɛ ma a ni nde Pɔli kɛni mɛn na baaraden di.

Pɔli la baara

²⁴ Sisen, n sɛwani n na tɔrɔyailu rɔ ai la ko rɔ, baa wo tɔrɔya tɔ mɛnilu toni Ɲenematɔmɔnin na tɔrɔya la, n di wo dafa n faribanku rɔ lemɛniya jama yɛ mɛn kɛni a fari ri.

²⁵ Alla le ka n kɛ lemɛniya jama baaraden di, ko n ye Alla la kuma dafani lase ai ma.

²⁶ Gbundu le wo ri mɛn tɛrɛ dokonni waati taminniilu mɔɔ bɛɛ ma, kɔni sisen a ra a ɲa yiraka a la jama sɛniman na.

²⁷ Alla ra sɔn siyailu bɛɛ ye a la gbundu nanfulu mirima lɔn. Wo gbundu le ten: Mɔɔ Ɲenematɔmɔnin mɛn ye gbiliya jii ri, a ri to ai rɔ.

²⁸ An di Mɔɔ Ɲenematɔmɔnin na ko lase mɔɔ bɛɛ ma, an di ii kawandi, ka ii karan lɔnnin bɛɛ ma kosa an ye na mɔɔ bɛɛ dɛfanin di Mɔɔ Ɲenematɔmɔnin ma.

²⁹ N ye baarala gbɛlɛya rɔ wo ko le ma, ka n sebaya don a fanka ba rɔ mɛn ye baarala n dɔ fanka la.