Titas 3 - Asang Khongso New Testament

Khrihca Tuinuenh

¹ Ukkungnawk hoi akaatawn kungnawk ih lok to tahngai o moa anihcae to khangza han hoi tiboih pongah hmuen kahoih sak nabangah coengcoe ah oh o poe hanah nangmah ih kaminawk to thui pae let ah.

² Mi ih sethaih to thui o hmah, to-e longto hoi longto angdaeh amlung o aloa ampui batiah om oah, mi boih khaeah tuinom hoihhaih to amtuengsak o toemoe ah, tiah thui pae oah.

³ Kawmawtiah zanghnii ah loa aicae doeh amthu o, lok tahngai o ai moa lam tahmang o. Takngan huedoenghaih hoi nawmhaih cungri ih misong ah aicae mah oh o. Aicae ih hinghaih hae uthaih hoi khithaih iah aicae mah patoh o; aicae hae minawk mah ang hnukmaa o moa anihcae to aicae mah hnukmaa o toengh.

⁴ To-e aicae Pahlongkung Sithaw ih amlunghaih hoi tahmenhaih to amtueng nahoi aloa,

⁵ aicae hae anih mah ang pahlong boah. Ato loa hmuen kahoih sak ih pongah na ai moa ang palungnat pongah ni aicae hae ang pahlong. Cai Pakhra ranghoiah tapenhaih kangtha hoi hinghaih kangtha ka paekkung mah ang pasaeh pongah ni.

⁶ Aicae Pahlongkung Jesuh Khrih ranghoiah Sithaw mah Cai Pakhra to aicae nuiah zetpui ah angkruen moa,

⁷ a tahmenhaih ranghoiah Sithaw hoiah aicae angdaeh han hoi aicae mah oepdoeng o ih dungzan hinghaih to hnuk thaih hanah ni.

⁸ Hi lok hae loktang ni. Hi loknawk hae lokpui ah suek hanah kang koeh o. Sithaw ka taang kaminawk loa hmuen kahoih sak nabangah angmahcae ih atue to patoh han a oh. Ato loa mi boih hanah kahoih hoi atho ka om ni.

⁹ To-e tidoeh ka vang ai lok angaekhaih ihnawk, saezanawk tacawthaih ih ahmin cazin ka sawk parainawk, angzoehhaih ihnawk, hoi Tawklok kawng pongah angpanhaih ihnawk to yaetak ah. Tobatihnawk loa tidoeh kang coeng ai hoi atho ka om ai ni.

¹⁰ Ampraekhaih ka sah kami to tamsi koek ah vai hnetto acoehaih paek aloa topacoeng hoiloa tidoeh sah pae bae hmah lai ah.

¹¹ Tobatih kaminawk loa dawnhaih kahoih ainawk ni, tiah na panoek moa a zaehaih o ih mah anihcae ih pazaehaih ih to amtuengsak.

Lokpat Aboenghaih

¹² Artemas maw tiaibaloa Tukhikas maw, nang khaeah kang patoeh na-ah Nikopolis ah nangzoh hanah ka koeh, kawmawtiah toah to sik tue thung oh hanah kangcaeng.

¹³ Sih-ni Zenas hoi Apollo to kholong ah a caeh hoi na-ah kahoih dakah abom aloa anih hnit ih angtoenghaih boih to khen pae ah.

¹⁴ Aicae kaminawk to tok kahoih sak nabangah atue to patoh o na soe, anihcae hinghaih hanah angtoenghaih ih tangtang to hak thai hanah patuk pae oah. Anihcae loa azom ah om o romram hmah na soe.

¹⁵ Kai khaeah kaom kaminawk boih mah nang to ban ang sinh o. Taanghaih pongah aicae ampuinawk to ban na sin pae oah. Sithaw tahmenhaih loa nangcae boih khaeah oh na soe.