Luka 23 - Asang Khongso New Testament

Pilat Hma-ah Jesuh Ahoih O

¹ Anihcae boih mah angthawk o moa Jesuh to Pilat hma-ah ahoih o.

² Anihcae mah zae a net o moa, “Hi kami mah kaicae kaminawk hae a caeh haih pazae, Rom Sangpahrang khaeah tamut paek han aiah a thuih pae moa angmah hoi angmah to sangpahrang Messiah ni, tiah a thuih,” tiah a naa o.

³ Pilat mah, “Nang loa Judah kaminawk ih sangpahrang?” tiah a duengh. Jesuh mah, “Na thuih ih batiah ka oh,” tiah pathim pae.

⁴ Topacoengah Pilat mah qaihma kacoetanawk hoi mipuinawk khaeah, “Hi kami hae zaehaih tidoeh ka hnuh ai,” tiah a naa pae.

⁵ To-e anihcae mah kana aep aep ah, “A patukhaih ih hoiah Judea prae bum boih ah kaminawk salak thungah lokpunghaih to a sak. Galili hoitoah amtong moa vaihi hiah a phak boah,” tiah a naa o.

Herod Khaeah Jesuh Patoeh O

⁶ Ato to Pilat mah a thaih na-ah, “Hi kami hae Galili kami maw?” tiah a duengh.

⁷ Jesuh loa Herod mah a uk ih prae thungih kami ni tito panoek na-ah Herod khaeah to a patoeh; tona tue thuemah Herod doeh Jerusalem ah a oh.

⁸ Herod mah Jesuh to a hnuk na-ah palung anghoe phi, kawmawtiah anih ih kawng to a thaih toemoe boah moa hnuk han koeh ih to akraa parai boah. Jesuh mah dawnraihaih hmuen maemaeto sak ih to hnuk han a oepdoeng.

⁹ Topongah Herod mah Jesuh to lok zetpui a duengh, to-e Jesuh mah pathim pae ai.

¹⁰ Qaihma kacoetanawk hoi Tawklok patukkungnawk to a hma-ah tacawt o moa Jesuh to kana paraiah zae a net o.

¹¹ Herod hoi angmah ih risanawk mah Jesuh to pacaekhlaek o moa tidoeh tamu suem aiah tamhnuih tamsak lok a sak o haih; moa kahni kahoih to angkhuksak o moa Pilat khaeah patoeh o let.

¹² Tona ni ah Herod hoi Pilat loa ampui kahoih ah angcoeng hoi; ato ai nahlanah loa misa ah oh hoi.

Jesuh Hum Hanah Lok Takroek O

¹³ Pilat mah qaihma kacoetanawk, pahoikungnawk hoi mipui to a kawk cu moa,

¹⁴ anihcae khaeah, “Hi kami hae kai khaeah nanghoih o moa kaminawk to a caeh haih pazae, tiah na thuih o. Vaihi nangcae hma-ah hiah lok ka duengh lipaci boih boah, nangcae mah zae na net o haih ih batiah a sak ih zaehaih ih tita doeh ka hnuh ai.

¹⁵ Herod mah doeh a zaehaih to hnuh ai toeng, topongah kai khaeah ang patoeh let. Hi kami mah a duekhaih han khoekto a sak ih hmuen tidoeh om ai.

¹⁶ Topongah ka boh moa ka prawt let han,” tiah a naa.

¹⁷ (Takantak Poi oh kruekah Pilat mah thongkrah longto a prawt pae toemtoem.)

¹⁸ Pilat ih lok to a thaih o na-ah mipuinawk loa, “Anih to hum ah! Barabbas to na prawt pae oah!” tiah a hangh o bukbuk.

¹⁹ (Barabbas loa vangpui thungah lokpunghaih ka omsakkung hoi kami hum pongah thongim ah pakhrak o.)

²⁰ Pilat loa Jesuh to prawt han a koeh, topongah mipui khaeah lok a thuih let bae.

²¹ To-e anihcae loa, “Kraws ah takhing ah! Kraws ah takhing ah!” tiah a hangh o let toengtoeng bae.

²² Pilat loa vai thum roekto a thuih bae moa, “Ti zaehaih ih to maw a sak? Duekhaih han khoekto ka krah a sak ih zaehaih tidoeh ka hnuh ai roeroe. Ka boh moa ka prawt let han,” tiah a naa.

²³ To-e anihcae loa ta-aw ka taem khawk ah a hangh o moa Jesuh to kraws ah takhing han oh roeroe, tiah a hangh o aep aep pongah hnukkhuem aloa a hangh o haih ih mah a pazawk.

²⁴ Topongah a hnik o ih batih toengah Jesuh to hum hanah lok a takroek.

²⁵ Mipui mah a koeh o ih, lokpunghaih tacawtsak pong hoi kami hum pongah thongim ah pakhrak o ih kami to Pilat mah a prawt pae; topacoengah Jesuh to angmahcae koeh o ih batih toengah sak hanah anihcae ban thungah a paek.

Kraws Ah Jesuh Takhing O

²⁶ Risanawk mah Jesuh to ahoih o moa a caeh o haih li nathuemah vangca hoitoah vangpui ah kangzo Sairin vang ih kami longto ahmin Simon to angqum o. Anih to a naeh o, kraws to aputsak o moa Jesuh hnukah to a baangsak o.

²⁷ Kami paroeai mah ahnuk ah bang o; tonawk thungah saoek kang tum moa anih hanah ka qah haih tuek nongpui thoemto a oh.

²⁸ Jesuh mah anihcae bangah angqoi moa, “Jerusalem nongpuinawk, kai hanah na qah o haih hmah; nangmahcae han hoi na caanawk han to mah qah o haih lat ah.

²⁹ Kawmawtiah ‘Caanawk ka tawn vaih ai, naukta ka za vaih ai hoi naukta tahnutui panaek vaih ai nongpuinawk loa natanmaw tahamhoih o’ ti ih atue to na pha tih.

³⁰ Ato tue loa kaminawk mah maesangnawk khaeah, ‘Kaicae nuiah na krahthuih rup ah,’ tihoi maenawk khaeah, ‘Kaicae na etthuih man ah,’ tiah na thuih o ih atue ah om tih.

³¹ Kawmawtiah thing a hing na-ah mataeng hibatih hmuennawk to sak ah oh nahaeloa angqo na-ah taoe loa kawbangmaw om tih?” a naa.

³² Jesuh hoiah nawnto hum hanah kami kazae longhnetto doeh a caeh o haih toengh.

³³ “Luhuh,” naa pae o ih ahmuenh to a phak o na-ah ato hmuenh ah Jesuh to kraws ah takhing o moa kami kazae longhnetto hnit doeh a bantang bangah longto, banqoi bangah longto takhing o toeng.

³⁴ Jesuh mah, “Pa, anihcae zaehaih tahmen pae ah. A sak o ih to panoek o ai,” tiah a naa. A khukbuenhnawk to qoihcung azuhaih hoiah amzet o.

³⁵ Mipuinawk loa toah angdoet moa a khet o li na-ah Judah kami pahoikungnawk mah, “Mi kalahnawk loa pahlong; Sithaw mah qoih ih Messiah ah a oh nahaeloa angmah hoi angmah to amhlong na soe,” tiah padaeng o.

³⁶ Risanawk mah doeh pahnuih o haih; a caeh o thuih moa atho tamsi misurtui kathaaw to a paek o moa,

³⁷ “Judah Sangpahrang ah na oh nahaeloa nangmah to amhlong khae,” tiah a naa o.

³⁸ A lu ranui ah, “Hi kami loa Judah Sangpahrang ni,” tiah tarik ih ca to a bet o.

³⁹ Toah bangh o ih kami kazae longto mah, “Nang loa Messiah na ai maw? Nangmah hoi nangmah to amhlong aloa kai hnit doeh pahlong toeng khae,” tiah padaenghaih hoiah a naa.

⁴⁰ To-e longto mah loa a zoeh, “Sithaw na zi ai maw? Nang loa anih batiah raekhaih kangvan to na hak.

⁴¹ To-e aihnit ih raekhaih ih loa kahmaan ni, kawmawtiah aihnit loa a sak hoi ih pongah hak hankoi ka krah to a hak hoi; to-e anih loa zaehaih tidoeh sah ai,” tiah a naa.

⁴² Jesuh khaeah, “Jesuh, Sangpahrang batiah nangzoh na-ah kai na pahnet hmah,” tiah a naa.

⁴³ Jesuh mah anih khaeah, “Lok kamaih: Vaihni ah kai hoiah nawnto Paradis ah na om tih,” tiah a naa.

Jesuh Duekhaih

⁴⁴ Athun nitue hlaihnetto thuemtham ah ni to a ving moa a vinghaih mah prae bum boih to nitue thumto karoekto a khuk.

⁴⁵ Tempal thungah kahnizang ih to hnetto ah angsih rak.

⁴⁶ Jesuh loa khoeh puiah a hangh moa, “Pa, ka pakhra hae na ban thungah kang tahlang,” tiah a thuih moa a paqam.

⁴⁷ Risa angraeng mah totiah ka om to a hnuk na-ah Sithaw to saphaw moa, “Hi kami loa kami kahoih tangtang ni,” tiah a thuih.

⁴⁸ Ato hmuen khet hanah toah ka cu kaminawk boih mah hmuen ka om to a hnuk o na-ah palungset loiah saoek angtum o moa im bangah amlaem o.

⁴⁹ Jesuh to miloeng ah ka panoek kaminawk boiboih hoi Galili prae hoitoah ahnuk ah ka baang nongpuinawk mah doeh kahla ah angdoet o moa a danh o.

Jesuh Aphumhaih

^50-51 Judea prae Arimathea vang ih Joseph naa pae o ih kami longto a oh. Anih loa kami kahoih hoi khangza kaom kami ah a oh moa Sithaw Poenghaih kangzo han to ka zing kami ni. Anih loa kawngsi thungih longto ah oh toeng eloa lok takroek o haih ih hoi hmuen sak o haih ih to naakrah ai.

⁵² Anih loa Pilat khaeah a caeh moa Jesuh ih qok to a hnik.

⁵³ Topacoengah a qok to a khringh moa kahni naemding hoiah abam moa hlungkhaw thuk ih, patoh vaih ai vop ih, taprong kangtha thungah up o.

⁵⁴ Ato ni loa Amtukhaih Nipanga ni ah a oh moa Sabbath ni to amtong tom boah.

⁵⁵ Galili prae hoitoah Jesuh hnukah ka baang nongpuinawk loa Joseph hoiah nawnto a caeh o moa taprong hoi a thungah Jesuh qok to kawbangmaw up o tito doeh a hnuk o king.

⁵⁶ Topacoengah im bangah amlaem o moa Jesuh qok to nok hanah hmuihoihnawk hoi hmuihoihtuinawk to aroep o. Sabbath ni aloa Tawklok mah lok a paek ih batih toengah anghak o.