Johan 6 - Asang Khongso New Testament

Kami Sangpangato Buh A Pacah

¹ Ato pacoengah Jesuh loa Galili tuili hapbang yaeh ah a caeh (Tiberias tuili tiah doeh a kawk o).

² Dawnraihaih ih sakhaih hoiah ngan kana kaminawk a hoihsak ih to a hnuk o boah pongah mipui paroeai mah anih hnukah to a baang o.

³ Jesuh loa maenui ah a dawh moa toah to a hnukbangnawk hoiah anghnut o.

⁴ Judah kaminawk ih Takantak Poi tue loa a hnaih boah.

⁵ Jesuh loa a taenghaek to a khet na-ah mipui paroeai mah angmah bangah kangzo to a hnuk moa Filip khaeah, “Ahi kaminawk boiboih hae pacah han ka khawt buh hae naamaw qanh o han?” tiah a duengh.

⁶ (Hitiah a thuih hae Filip tanoekcakhaih ih ni; loktang ah thuih nahaeloa timaw ka sak han tito angmah panoek tangcae boah).

⁷ Filip mah, “Mi boih mah zetta ah cak poeng han mataeng doeh takaw ka khawt ah qan han loa maku phoisa 200 to cang ai koeh tih,” tiah a naa.

⁸ A hnukbang ah ka om toengh longto, Simon Piter ih amnauk Andru mah,

⁹ “Kami longto, barli takaw kae pangato hoi tangaa hnetto ka tawn naukta to hiah hae a oh. To-e hi zetto kapop mipuinawk hanah ato takaw hoi tangaa to khawt mak ai roeroe,” tiah a naa.

¹⁰ Jesuh mah, “Mipuinawk to anghnusak oah,” tiah a naa pae. (Toah to phroh kahing to a oh mang). Topongah mipui to anghnut o moa sungqum boih ah nongpa ngaiah sangpangato thuemtham a oh.

¹¹ Jesuh loa takaw to a lak, Sithaw khaeah kawn lok a thuih moa toah kanghnu mipuinawk khaeah to a pazet. Tangaa to doeh tobatih toengah a pazet moa anihcae boih mah a cak o thaih roekto ah a cak o.

¹² Zok amhah o boih na-ah a hnukbangnawk khaeah, “Caknoinawk to pakuem o boih ah; tidoeh anghmatsak o hmah,” tiah a naa.

¹³ Topongah anihcae mah pakuem o cu moa mipui mah barli takaw kae pangato a cak o pacoeng ih caknoi kamhlai to daengkraem hlaihnetto a koi.

¹⁴ Ato dawnraihaih Jesuh mah a sak ih a hnuk o na-ah, “Ahi kami hae longnui ah kangzo han kaom Tahma tangtang ni,” tiah a thuih o.

¹⁵ Mipui to angzo o ueloa sangpahrang ah suek nganga hanah na naeh o tih, tito Jesuh mah a panoek; topongah angmah buengah maenui ah to caeh.

Jesuh Tui Nuiah Takat

¹⁶ Duembang khoving na-ah Jesuh hnukbangnawk to tuili bangah to tathuk o moa,

¹⁷ palong thungah akun o, moa tuili hapbang yaeh, Kapernaum vang bangah to amlaem o let. Qum tue a phak boah moa Jesuh loa anihcae khaeah angzo ai zawzaw vop.

¹⁸ Ato nathuemah takhi kana parai a songh moa tuiphu paroeai angthawk.

¹⁹ Palong to meng thum meng palito roekrak a thoek o na-ah Jesuh to tui nuiah ka taka moa palong bangah kangzo to a hnuk o na-ah paroeai a zit o.

²⁰ Jesuh mah, “Zi o hmah, kai ni,” tiah a naa pae.

²¹ Topacoengah kawnhaih hoiah palong thungah to akun o sak moa a caeh han a koeh o haih ih hmuen ah to akraa aiah a phak o.

Mipui Mah Jesuh Pakrong O

²² Akhawnbang ah tuili hapbang yaeh ah kaom mipuinawk loa toah to palong maeto khueh a oh tito panoek o. Ato palong thungah Jesuh to om ai moa a hnukbangnawk khueh a caeh o tito panoek o.

²³ Tiberias vang hoitoah kangzo palong kalahnawk to Angraeng mah kawn lok a thuih pacoengah mipui mah takaw a cak o haih ih ahmuenh taeng tuitaeng ah ang phak.

²⁴ Toah to Jesuh hoi a hnukbangnawk om o ai tito mipui mah a hnuk o na-ah to ih palongnawk to angthueng moa Jesuh pakrong koeh ah Kapernaum vang ah to a caeh o.

Jesuh Hinghaih Takaw

²⁵ Jesuh to tuili hapbang yaeh ah a hnuk o na-ah mipuinawk mah, “Patukkung, natuekah maw hiah hae na phak loa?” tiah a duengh pae o.

²⁶ Jesuh mah, “Loktang kang thuih o: Kai nang pakrong o hae ka sak ih dawnraihaih na panoek o thaih pongah na ai moa takaw to na koeh roekto na cak o pongah ni.

²⁷ Kamro hankoi buh han-iah to toksah o hmah; dungzan hinghaih hanah kangcak buh hanih ah to tok o lat ah. Ato buh loa Kami Capa mah na paek o tih, kawmawtiah Pa Sithaw mah anih nuiah amathaih ih to a sak zawh boah,” a naa pae.

²⁸ Topongah anihcae mah, “Sithaw mah sah o na soe tiah ang koeh o haih ih sak hanah timaw ka sak o han?” tiah a duengh o.

²⁹ Jesuh mah, “Sithaw mah sah o na soe tiah ang koeh o haih ih loa a patoeh ih kami to taang hae ni,” tiah a pathim pae.

³⁰ Anihcae mah, “Ka hnuk moa ka taang o thaih hanah kawbatih dawnraihaih ih to maw na sak han? Na sak hanih to loa timaw?

³¹ Cabu Kacai mah, ‘Cak hanah van hoitoah takaw to a paek pae o,’ tiah a thuih ih batih toengah kaicae saezanawk loa praetanghaeng ah manna takaw to a cak o,” tiah a naa o.

³² Jesuh mah, “Loktang ta-ah kang thuih o: Mosi mah a paek ih to van takaw tangtang ai ni. Van takaw tangtang to ka paek loa Pa ni.

³³ Kawmawtiah Sithaw mah paek ih takaw loa van hoitoah angzoh tathuk moa long hae hinghaih ka paekkung to ni,” tiah a naa pae.

³⁴ Anihcae mah, “Angraeng, ato takaw to na paek toemoe ah,” tiah a hnik o.

³⁵ Jesuh mah anihcae khaeah, “Kai loa hinghaih ih takaw ni. Kai khaeah kangzo kami loa natuek doeh zok amhlam mak ai; kai ka taang kami loa natuek doeh tui anghae mak ai.

³⁶ To-e kang thuih o batiah kai hae nang hnuk o boah e nang taang o ai.

³⁷ Pa mah ang paek ih kami boih loa kai khaeah angzo o ueloa ami doeh kai khaeah kangzo boih loa ka haek mak ai.

³⁸ Kawmawtiah kaimah koehhaih ih to sak hanah van hoitoah kanghum ai, kai matoehkung koehhaih ih to sak hanah ni loa kangzoh.

³⁹ Moa kai matoehkung ih koehhaih ih loa ahi ni: Kai ang paek ihnawk boiboih to maeto doeh anghmasak aiah, ani hnukkhuem koek ni ah anihcae boih to kang thawksak let boih hanih to ni.

⁴⁰ Kawmawtiah Pa mah a koehhaih ih loa Capa to a hnuk moa ka taang kami boiboih mah dungzan hinghaih a tawnh o hanah to ni. Hnukkhuem koek ni ah anihcae to pathawk moa ka hinghsak han,” tiah a thuih.

⁴¹ “Kai loa van hoi-ih kangzo takaw ni,” tiah a thuih pongah mipuinawk mah laisaep o thuih.

⁴² Topongah anihcae mah, “Hi kami hae Joseph capa Jesuh na ai maw? Amno hoi ampa doeh ka panoek o boih. Kawbangmaw ‘Van hoitoah kangzoh,’ tiah a tih halat hae?” tiah a thuih o.

⁴³ Jesuh mah, “Laisaep o tuek hmah laih ah!

⁴⁴ Matoehkung Pa mah kai khaeah na zaehoi ai nahaeloa ami doeh kai khaeah angzo thaih mak ai; moa hnukkhuem koek ni ah anih to pathawk moa ka hinghsak han.

⁴⁵ Tahmanawk mah, ‘Mi boih to Sithaw mah thuitaek ah om o tih,’ tiah a tarik o. Ami doeh Pa ih lok to ka thaih moa anih khae hoitoah kamtuk kami loa kai khaeah to angzoh.

⁴⁶ Hitiah ka thuih na-ah hae ami doeh Pa to a hnuk o boah tihaih ih na ai ni; Sithaw khae hoitoah kangzo kami khueh ni loa Pa to ka hnuh kami ah a oh.

⁴⁷ Loktang ta-ah kang thuih o: Ka taang kami loa dungzan hinghaih to a tawnh.

⁴⁸ Kai loa hinghaih takaw ni.

⁴⁹ Nangcae saezanawk loa praetanghaeng ah manna to a cak o e, a duek o toengtoeng.

⁵⁰ To-e ami doeh van hoitoah kangzo takaw to ka caa kami loa dueh mak ai.

⁵¹ Kai loa van hoitoah kangzo hinghaih takaw ni. Ami doeh ahi takaw ka caa loa dungzan ah hing poe tih. Kang paek hanih takaw loa hi long mah hinghaih a hnuk thaih hanah kang paek ih ka takngan ni,” tiah a naa.

⁵² Totiah a thuih pongah anihcae salak thungah angaekhaih ih to tacawt moa, “Kawbangmaw hi kami mah a takngan to cak hanah aicae to na paek thaih tih?” tiah thuih o.

⁵³ Jesuh mah anihcae khaeah, “Loktang ta-ah kang thuih o: Kami Capa takngan na caa o ai moa a thii to na nae o ai nahaeloa nangmahcae ih a thungah hinghaih na tawn o thaih mak ai.

⁵⁴ Kai ih ka takngan ka caa moa ka thii ka nae boih loa dungzan hinghaih to a tawnh o moa hnukkhuem koek ni ah pathawk moa ka hinghsak han.

⁵⁵ Kawmawtiah kai ih ka takngan loa buh tangtang moa ka thii loa naek hankoi tangtang ni.

⁵⁶ Kai ih ka takngan to ka caa moa ka thii ka nae boih loa kai thungah a hingh o moa kai doeh anihcae thungah ka hingh toeng.

⁵⁷ Kahing Pa mah ang patoeh moa anih ranghoiah kai doeh ka hingh. Tobatih toengah ami doeh kai ka caa loa kai ranghoiah hing toeng tih.

⁵⁸ Topacoengah ahi hae van hoitoah kangzo takaw ni; nangcae saezanawk mah a cak o ih takaw batih na ai ni. Anihcae loa a cak o e a duek o toengtoeng, to-e ahi takaw ka caa kami boih loa dungzan ah hing o tih,” tiah a naa.

⁵⁹ Ahi lok hae Kapernaum vang sinakok thungah a patuk na-ah to Jesuh mah a thuih.

Dungtasawk Hinghaih Lok

⁶⁰ A hnukbang paroeai mah ato lok to a thaih o na-ah, “A patukhaih ih hae a rai lawnlai. Mimah maw tahngai thaih tih?” tiah a thuih o.

⁶¹ Mimah thui pae o aiah ato kawng ah to laisaep o tito a panoek moa anihcae khaeah, “Ahi patukhaih ih mah hae nangcae to palung a boengsak o maw?

⁶² Totibaloa patahhaih iah Kami Capa hae zanghnii thuem ih a ohhaih ahmuenh ah kamlaem let to na hnuk o nahaeloa kawbangmaw na om o tih?

⁶³ Hinghaih ih ka paekkung loa Sithaw ih Pakhra ni; kami sakthaihaih ih loa azompui ni. Nangcae khaeah kang thuih o ih loknawk hae loa hinghaih ka paek Sithaw ih Pakhra to angzoh haih.

⁶⁴ To-e kami thoemto mah na taang o ai,” tiah a naa. (Jesuh loa atangsuek nahoiah mah amito maw ka taang han ai moa amito maw angmah nuiah paipi alae tih, tito a panoek king).

⁶⁵ Moa anih mah, “Hitiah a oh pongah Pa mah anihcae hanah loklam sah pae ai nahaeloa ami doeh kai khaeah angzo o thaih mak ai, tiah kang thuih o ih to ni,” tiah a naa.

⁶⁶ Topongah Jesuh hnukbang kami paroeai mah amlaem o let moa ahnuk ah to baang o ai boah.

⁶⁷ Topongah a hnukbang hlaihnetto khaeah, “Nangcae doeh kai hae caehtak han na koeh o toeng maw?” tiah a duengh.

⁶⁸ Simon Piter mah, “Angraeng, ami khaeah to maw ka caeh o tih loa? Nang ni loa dungzan hinghaih ka paek lok to na tawnh.

⁶⁹ Moa vaihi loa nang hae Sithaw khae hoitoah kangzo Kami Kacai ni, tito kang taang moa kang panoek o boah,” tiah a naa.

⁷⁰ Jesuh mah, “Nangcae hlaihnetto hae kaimah kang tuek o na ai maw? To-e longto loa taqawk ah na oh o ving,” tiah a naa.

⁷¹ Anih loa Simon Iskariot capa Judas ih akawng to ni a thuih. Kawmawtiah Judas loa hnukbang hlaihnetto thungih longto toeng e anih nuiah paipi alae.