Hebrai 6 - Asang Khongso New Testament

¹ Topongah hmabang ah pang o si, Khrih ih tamthang lok hmaloe koek amtukhaih to hnuk bangah suem o siloa amtukhaih kacung bangah pang o si; atho ka om ai toksakhaih caehtak ihnawk to takung hoiah amtong o let hmah si, Sithaw taanghaih to doeh takung hoiah amtong o tuek hmah lai si;

² baptisma paek kawng hoi ban koenghaih kawngnawk, kami kadueh angthawklethaih kawng hoi dungzan lokcaekhaih kawngnawk doeh takung hoiah amtong o let tuektuek hmah si.

³ Hmabang ah mah pang o si! Sithaw koehhaih ih om nahaeloa ato to aicae mah sah o tih.

⁴ Taanghaih ka caehtak kaminawk to kawbangmaw dawn pakhuemhaih ih to hak o thaih let tih? Anihcae loa Sithaw aanghaih thungah a oh o vaih boah; van langrae to doeh pataeng o boah moa Cai Pakhra to doeh a hak o vaih boah;

⁵ Sithaw lok loa a hoih tito a hnuktonghhaih ih hoiah panoek o moa kangzo hankoi a dungh tharahhaih ihnawk to doeh panoek o boih boah.

⁶ Totiah oh o boah e taanghaih ih to a cawnh o tak! Anihcae to zae dawn pakhuemsak let hanah angcoeng thaih ai boah; kawmawtiah Sithaw Capa to kraws ah takhing o let bae moa mipui hma-ah azat a phawhsak o.

⁷ Khotui ka krah pazopkung longlai hoi lawk ka sahkungnawk hanih atho kaom cangkungnawk kamprawk sakkung longlai to Sithaw mah tahamhoihhaih paek ih longlai ni.

⁸ To-e Khringzang hoi phroh khueh kamprawk sakkung longlai loa tidoeh atho om ai; Sithaw tangoenghaih ih to tong ueloa hmai hoiah qoeng kingah om tih.

⁹ Ka palung ih ampuinawk, hitiah ka thuih langla cadoeh nangcae kawng pongah loa oeptanghaih ka tawnh. Nangcae loa tahamhoihhaih kahoih kue pahlonghaih to na tawnh o tito ka panoek.

¹⁰ Sithaw loa katoeng ai kami na ai ni. Tok na sak o ih pongah doehsoe, Sithaw palunghaih amtuengsak hanah Khrihca ampuinawk na bom o haih ih hoi vaihi karoekto na bom o haih ih pongah doehsoe, Sithaw mah pahnet mak ai.

¹¹ Kaicae mah koehhaih koek ih loa nangcae oepdoenghaih ih acung thaih hanah aboeng khoekto thahmaehaih ohsak poe han hae ni.

¹² Toksak paqak ah oh hanah kang koeh o ai, to-e Sithaw mah amaih tangcae to hak hanah taanghaih ka tawn kami hoi palungsawkhaih ka tawn kaminawk batiah oh hanah kang koeh o.

Sithaw Amaihhaih Kangcak

¹³ Sithaw mah Abraham khaeah lok amaihhaih ih sak na-ah amaih ih to sak kuekluek han tihaih iah loktaaphaih to a sak. Angmah pongdoeh kalen kue kami to om ai boah pongah loktaaphaih ih to a sak na-ah angmah ih hmin to patoh.

¹⁴ Anih mah, “Nang to tahamhoihhaih kang paek moa catawn zetpui kang paek han tiah lok kamaih,” tiah a thuih.

¹⁵ Abraham loa palungsawk pongah Sithaw mah amaih ih to a hak.

¹⁶ Kaminawk mah loktaap na-ah angmah pongdoeh kalen kue longlongto ih ahmin to patoh o moa loktaaphaih ih mah angaekhaih ihnawk boih to a boengsak.

¹⁷ Angmah lok amaih ih to ka hak han kaminawk khaeah Sithaw loa angmah amsakhaih ih to natuekah doeh amkhraih mak ai tito kamnoek ta-ah panoeksak han a koeh; topongah a lok amaihhaih ih to loktaaphaih hoiah pacoih thuih.

¹⁸ Topongah hi lok hnetto hae loa alaih thai ai ih hmuen ah oh moa hi hnit kawng pongah Sithaw loa amsawn lok thui thai ai. Totiah oh pongah angmah hoiah suenghaih ka hnuhkung aicae hae thahmaehaih paroeai tawnh o moa aicae hma-ah suek tangcae ih oepdoenghaih to kacak ah patawn o.

¹⁹ Hi oepdoenghaih hae aicae hinghaih hanah sum kawnvawn batiah ni a oh. Hi loa angcak moa palung monghaih iah oh, van tempal kahnizang ih to takren moa a thungih ahmuenh kacai to a phak.

²⁰ To hmuenh ah Jesuh loa aicae zuengah akun boah moa Melkhizedek ih qaihma coenghhaih tawk hoiah dungzan Qaihma Kalen ah coengh boah.