Hebrai 12 - Asang Khongso New Testament

Aicae Ih Ampa

¹ Aicae loa hitih khoekto kanoi saksinawk mah ang ven o pongah aicae caehhaih ih loklam pakaakung hmuen cungriboih hoi aicae khaeah kangbet kaang zaehaih to vah o ving siloa aicae hma-ih kaom cawnh angnoekhaih ih ahmuenh ah to phak hanah tha pathokhaih hoiah cawn o si.

² Aicae taanghaih ih amtonghaih tangsuek hoitoah aboeng khoekto ka koepsakkung Jesuh to mik hoiah pacok o si. Anih loa hmabang ih kaom hankoi anghoehaih mah a zing pongah kraws ah azat kathok duekhaih to tiadoeh dawn ai boah moa vaihi loa Sithaw tangkhang bantang bangah to anghnut boah.

³ A pauephaih ih to dawn o noek ah; kami kazaenawk ih hnukmaahaih to natanto maw a pauep! Topongah tharuisak o hmah aloa palungboengsak o hmah.

⁴ Kawmawtiah zaehaih na tuk o na-ah duekhaih khoekto na hmak o ai vop.

⁵ Sithaw mah a caanawk batiah thapaekhaih ih lokthuih to na pahnet o boah maw? “Ka caa, Angraeng mah nang ang thuihtaek na-ah tahngai ah, ang zoeh na-ah palungboeng hmah.

⁶ Kawmawtiah ami doeh Angraeng mah palung ih to loa a thuihtaek moa, ami doeh a caa batiah talawk ih to loa dan a paek,” tiah a thuih.

⁷ Patang khanghaih to loa nam pa ih thuihtaekhaih ni tiah poek o aloa pauep oah; nangcae patang khanghaih loa Sithaw mah a caanawk batiah a dawn tito amtuengsak. Ampa mah thuihtaek ai ih a caa to oh vaih maw?

⁸ A caanawk to danpaek moa nangcae to danpaek ai nahaeloa nangcae loa a caa tang na ai moa pazangca ni tihaih ih ni.

⁹ Aicae long kami ampa kawng to dawn o noek ah, aicae hae dan ang paek o e aicae mah khangza o toengtoeng. Topongah hinghaih hak thai hanah pakhra bangih aicae Ampa to natanto maw a lok tahngaih pae aep han oh!

¹⁰ Aicae long kami ampanawk mah ahmaan ti ih to loa nawnetta thungah dan ang paek o; to-e Sithaw loa aicae hoihhaih han hoi a caihaih to abo thai toeng hanah dan ang paek.

¹¹ Aicaemah danpaekhaih tongh o na-ah loa palung kanghoesakkung na aiah palungsethaih ka paekkung ah oh. To-e a hnukah loa tobatih danpaekhaih hoiah thuihtaek ih kaminawk loa hinghaih pongah monghaih hoi toenghaih kawnvang to a hak o.

Thuihtaekhaih hoi Acoepaekhaih

¹² Topongah nangcae ih ban kakhah to pazang o tahang aloa khokkhu kanghuen nongkong to caksak oah.

¹³ Loklam katoeng to pazui o poe ah; tona-ah ni nangcae khok kangbai to amro mak ai ueloa hoih let thai tih.

¹⁴ Mi boiboih to angdaehhaih hoiah oh hanah zom o aloa hinghaih kacai ah hingh hanah panki oah, kawmawtiah ato hinghaih kacai to om ai nahaeloa ami doeh Sithaw to hnuh o thai mak ai.

¹⁵ Sithaw tahmenhaih to hnukthung tak han aiah acoe oah. Thingkung kakhaa ka qoeng tahang moa angmah ih kasoe kahoih ai mah mi paroeai raihaih ka paekkung batiah ami doeh om o hmah.

¹⁶ Ami doeh nongpui hoi nongpa zaehaih sah o hmah; pakhra bangah tidoeh ka sah ai Esau batiah om o hmah, anih loa calu ah ohhaih ih to buh vaito cak ah a zawh ving.

¹⁷ Hnukkhuem aloa ampa ih tahamhoihhaih to hak hanah a koeh tito na panoek o; to-e anih mah hnuh let thai ai boah, kawmawtiah mikkhraetui hoiah pakrong khing langla cadoehsoe a sak tangcae ih to loa kawbangah doeh pakhraih let thai mak ai boah.

¹⁸ Nangcae loa Israel kaminawk angzoh batiah na sui o thai ih Sinai Mae ah to nangzo o ai. Ato mae loa hmai angqongh hluphluphaih, tamai tabok hoi vinghaih, takhisae songhhaih,

¹⁹ mongka uenghhaih, loktuen thaihhaih ih mae ni. Kaminawk mah alok to thaih o na-ah lok kalah to thaih han aiah a hnik o,

²⁰ kawmawtiah lokpaek, “Tawmoi mah doehsoe mae to qoe nahaeloa hlung hoiah vah mat han oh,” ti ih to pauep o vam ai.

²¹ A hnuk o ih to zitman oh parai pongah Mosi mah, “Ka zit parai moa kanghuen sut,” tiah a thuih.

²² To-e nangcae loa Zion Mae hoi vanminawk a sangsangto ohhaih kahing Sithaw ih vangpui Jerusalem ah to ni nangzoh o.

²³ Nangcae loa van ah ahmin tarik ah kaom Sithaw ih calunawk anghoe kawnhaih hoiah acuhaih ih khaeah nangzoh o boah. Kami boiboih taracaekkung Sithaw hoi kami to kacung ah sak kok ih kami katoengnawk ih pakhra khaeah to na phak o boah.

²⁴ Paipi kangtha ka sahkung Jesuh khaeah nangzoh o moa Abel ih athii pongdoeh kahoih kueah lok ka thuikung, Jesuh mah haeh ih athii khaeah to na phak o boah.

²⁵ Topongah acoe o aloa nangcae khaeah ka thuikung ih lok to aek o hmah. Longnui ah Sithaw lok ka thuikung ih lok to ka aek kaminawk loa loih o ai. Van khae hoi-ih ka thuikung ih lok to hnukthung o tak nahaeloa natanto maw aicae mah loih o mak ai aep aep tih!

²⁶ To tue nathuemah a loktuen mah long anghuensak king, to-e vaihi loa anih mah, “Longlai khueh aiah van doehsoe kaimah vaito kanghuenhsak let han,” tiah lok to amaih.

²⁷ “Kaimah vaito kanghuenhsak let han” ti ih lok mah hae sak ih hmuennawk boih to anghuen ueloa amro kingah om tih moa kanghuenh thai ai to loa om poe tih, tihae kamnoek ta-ah amtuengsak.

²⁸ Topongah anghoe kawnhaih hoiah om o si, kawmawtiah kanghuen thai ai poenghaih to aicae loa hak o boah. Aicae mah kawn o siloa angmah koeh ih khangzahaih hoi zithaih hoiah Sithaw to bok o si.

²⁹ Kawmawtiah aicae ih Sithaw loa kami ka kangh thaikung hmai tangtang ni.