Galati 2 - Asang Khongso New Testament

Paul hoi Kawkpatoeh Kalahnawk

¹ Saning hlaipalito a laemh pacoengah kai hoi Barnabas mah Titas doeh ka caeh haih hoi moa Jerusalem ah to kamlaem o let.

² Tipongmaw ka caeh tisoe nahaeloa Sithaw mah kai khaeah ang taphong pongah ni. Kacoetanawk hoiah kaimahcae khueh ah kangqum o na-ah Gentel kaminawk khaeah tamthang kahoih ka taphong ih kawng to anihcae khaeah ka thuih pae. Hnuk bangih tok pongah doehsoe, vaihi ih tok pongah doehsoe, azom puiah coenghsak han ka koeh ai.

³ Toksah ampui Titas loa Grik kami ah oh e tangzat hin aah hanah ka naa pae o nganga ai,

⁴ thoemto mah loa tangzat hin aahsak hanah koeh o. Khrih Jesuh hoiah angpaehhaih ranghoiah loihhaih ih hakhaih kawng hae panoek koeh ah taangca ah kangsah moa tamthang kazuep batiah aicae bu thungah tamqu lamah kakun kaminawk to a oh. Anihcae mah aicae to misong ah suek hanah koeh o.

⁵ To-e nangcae hanah tamthang kahoih loktang lok hae nangcae hanih suengsak hanah atue setta boe doeh anihcae to ka paek pae o ai.

⁶ To-e pahoikung batiah dawn ihnawk mah poekhaih kangtha to tidoeh na paek o ai; Sithaw loa tasabang amtuenghaih ih to khen ai pongah kai hanih loa ato pahoikungnawk to tidoeh lahhaih ih om ai.

⁷ Poekhaih ih paek tuemtang ah Judah kaminawk khaeah tamthang lok thuih hanah Sithaw mah Piter khaeah tok to a paek batiah, Gentel kaminawk khaeah tamthang lok thuih hanah Sithaw mah kai hae tok a paek tiah a hnuk o lat.

⁸ Kawmawtiah Sithaw ih tharahhaih ranghoiah Piter loa Judah kaminawk khaeah kawkpatoeh ah oh batiah kai doeh Gentel kaminawk khaeah kawkpatoeh ah ka oh toeng.

⁹ Pahoikung ah dawn ih Jaem, Piter hoi Johan cae mah Sithaw mah kai hanah paek ih tok kalensawk tiah panoek kop o; topongah toksah ampui ah oh o batiah anihcae loa Barnabas hoi kai hae ban ang sinh o. Kai hoi Barnabas loa Gentel kaminawk salak thungah toksak han hoi moa anihcae loa Judah kaminawk salak thungah toksak hanah palung ka due o.

¹⁰ Ang hnik o ih loa anihcae thungih kamtang kamlainawk to pahnet han ai hae ni, ato loa sak hanah tha ka hmaehaih toemoe ih ni.

Antiok Ah Paul Mah Piter Padaengh

¹¹ Antiok vang ah Piter angzoh na-ah mipui hma-ah padaeng, kawmawtiah a sak pazae tito hoihdak ta-ah amtueng.

¹² Jaem mah patoeh ih kami thoemto toah a phak o ai nahlanah Piter loa Gentel naukamzanawk hoiah buh a cak o tuektuek. To-e to kaminawk ang phak o pacoeng na-ah loa Gentel kaminawk to yaetak ving moa anihcae hoiah buh cak koeh ai boah, kawmawtiah angmah ka bong haih tangzat ka aat kaminawk to a zit pongah ni.

¹³ Judah kami naukamza kalahnawk doehsoe Piter batih toengah misa set o moa hnuk bangah anawn o boih, Barnabas mataeng doeh hnuk bangah anawn toeng.

¹⁴ Tamthang kahoih loktang lok bangah pazui o ai tito ka hnuk na-ah Piter to mipui hma-ah, “Nang loa Judah kami ah na oh e Judah hinghaih batiah hing aiah Gentel kaminawk batiah na hingh. Totiah nahaeloa kawbangmaw Gentel kaminawk to Judah tawk batiah hingh hanah na pacae thai tih?” tiah ka naa.

Judah hoi Gentel Pahlong Ah Oh Qoiqai

¹⁵ Aicae hae zah nahoiah Judah kami ah oh o tangtang moa “Gentel kami kazaenawk” ah om o ai roeroe.

¹⁶ To-e kami hae Sithaw mah tangpaekhaih ih loa Jesuh Khrih taanghaih ranghoiah khueh ni hak thai, Tawklok mah nguek ih sakhaih ranghoiah na ai ni. Aicae mah doeh Khrih taanghaih ranghoiah Sithaw hma-ah kami katoeng ah oh hanah Khrih Jesuh to taang o, Tawklok mah nguek ih sakhaih ranghoiah na ai ni. Kawmawtiah Tawklok mah nguek ih sakhaih ranghoiah mita mah doeh Sithaw hma-ah kami katoeng ah om thai ai.

¹⁷ Topongah Khrih hoiah angpaehhaih ranghoiah Sithaw hma-ah kami katoeng ah oh hanah panki o tuek nahaeloa Gentel kaminawk batiah kami kazae ah oh o toengh tito panoek o nahaeloa Khrih loa zaehaih ka sinkung ah oh tiah thui thai tih maw? Thui thai mak ai roeroe!

¹⁸ Ka phraek kok ih Tawklok to ka pazui let nahaeloa Tawklok ka phraekung loa kaimah hoi kaimah hae ni tihae kamtuengsak.

¹⁹ To-e Tawklok kawng pongah kai loa kami kadueh ah ni ka oh; Sithaw han-iah hing thai hanah Tawklok mah ang paduek boah. Angmah ih kraws pongah kai loa Khrih hoiah hum ah ka oh boah.

²⁰ Topongah ka hingkung to loa kai na ai boah moa kai thungih kaom Khrih to ni ka hing boah. Vaihi ka hinghaih ih loa kai ka palung moa kai hanah a hinghaih ka paekkung Sithaw Capa taanghaih hoiah ni ka hingh boah.

²¹ Sithaw tahmenhaih loa ka tahnawt thai ai. To-e Tawklok pazui ranghoiah Sithaw mah kami to katoeng ah suem nahaeloa Khrih loa azom puiah duek tihaih ih ni.