Ephesi 2 - Asang Khongso New Testament

Duekhaih Hoitoah Hinghaih Ah

¹ Zanghnii aloa lok tahngaihhaih ai ih hoi zaehaih ih pongah pakhra bangah na duek o.

² Tona thuemah loa longnui tawk kahoih ai to na pazui o; nilinglong ih pakhra tharahhaih ihnawk ka ukkung ih lok to na tahngaih pae o, ato pakhra mah vaihi loa Sithaw ka panoek ai kaminawk to a uk.

³ Thuih tangtang nahaeloa aicae boih hae anihcae batih toengah ni oh o moa tacawthaih ih takngan koehhaih batiah hingh o, aimahcae ih takbum hoi palungthin mah koehhaih ih boih to sak o. Aicae coenghhaih ih batiah thuih nahaeloa aicae doeh mi kalah batih toengah Sithaw palungphuihaih ka tong hankoi ah oh o.

⁴ To-e Sithaw palungnathaih loa a pop parai moa ang palunghaih ih doeh a lenh parai pongah,

⁵ aicae ih lok tahngaihhaih ai pongah pakhra bangah duek o nathuemah Khrih hoiah nawnto ang hinghsak o let boah. Sithaw tahmenhaih ranghoiah nangcae loa pahlong ah na oh o boah.

⁶ Aicae loa Khrih Jesuh hoiah angpaehhaih ranghoiah Sithaw mah Khrih hoiah vannui prae ah ukkung ah hanah angmah hoiah angthawksak let boah.

⁷ Hitiah a sakhaih ih loa Jesuh Khrih ah amtuengsak ih amlunghaih thungah a tahmenhaih ih kating kanoek ai kalen to hmabang khoekto dungzan ah amtuengsak hanah ni.

⁸ Kawmawtiah nangcae loa taanghaih ranghoiah Sithaw mah tahmen pongah pahlong ah na oh o. Nangcae ih zomhaih pongah na ai ni, Sithaw ih langrae ni.

⁹ Topongah hi kawng pongah hae ami doeh amlue thaih ih tidoeh om ai.

¹⁰ Aicae loa Khrih Jesuh hoiah angpaehhaih ranghoiah hingh tuinuenh kahoih to tawnh hanah Sithaw mah aicae hae ang sak; ato to sak hanah aicae hanih ang paroep pae o coek boah.

Khrih Ah Maeto

¹¹ Zah tangsuek nahoitoah Gentel kaminawk nangcae to Judah kaminawk mah, “Tangzat hin ka aat ainawk,” tiah ang kawk o; angmahcae hoi angmahcae to loa, “Tangzat hin ka aatnawk,” a ti o. (Tangzat hin aah ti ih mah takhi ih loa kami mah a takbum nuiah a sak ih to ni). Nangcae Gentel kaminawk zanghnii ah kawbangah maw na oh o tito pahnet o hmah.

¹² Tona thuemah loa Khrih hoiah nampraek o. Prae kalah kami ah na oh o moa Sithaw mah qoih ih kami ah na om o ai. Sithaw mah angmah kaminawk khaeah lok amaih ih nuiah akung tasut ih paipi thungah na paa o ai moa hi longnui ah oepdoenghaih tawn ai hoi Sithaw tawn ai hoiah na hingh o.

¹³ To-e vaihi loa Khrih Jesuh hoiah angpaehhaih ranghoiah kanghla paraiah kaom nangcae to Khrih ih athii longhhaih ranghoiah ka hnaidaek ah kawk cu ah na oh o boah.

¹⁴ Kawmawtiah Khrih angmah Judah kami hoi Gentel kami to maeto ah suekhaih hoiah aicae hanah angdaehhaih to ang sinh boah. Anih loa Judah kami hoi Gentel kaminawk kampraeksak takung hoi misa ah ka sahkung tapang to angmah ih takbum hoiah a phraek boih boah.

¹⁵ Anih loa Judah Tawklok to lokpaek ihnawk hoi tawkcahnawk boih to a phraek king; totiah a sakhaih ih loa caeng kami hnetto to angmah hoiah angpaehhaih ranghoiah caeng kami kangtha maeto ah sak moa angdaehhaih ih ohsak hanah a koeh pongah ni.

¹⁶ Kraws ah a duekhaih ranghoiah Khrih mah misa ah coenghhaih ih a phraek boah; kraws ranghoiah acaeng hnetto to takbum maeto ah pahlom moa Sithaw khaeah a zaehoih let.

¹⁷ Topongah Khrih loa angzoh moa mi boiboih, Sithaw khae hoitoah kahla paraiah kaom Gentel kaminawk hoi Sithaw hoiah kahnai ah kaom Judah kaminawk khaeah angdaehhaih Tamthang Kahoih to a thuih.

¹⁸ Aicae boih mah Judah kami doehsoe, Gentel kami doehsoe, Khrih ranghoiah Pakhra maeto ah Pa ih hma-ah akun o thaih.

¹⁹ Totiah oh pongah nangcae Gentel kaminawk loa prae kalah kami hoi kholong kami ah na om o ai boah; nangcae loa Sithaw kaminawk hoiah nawnto aprae kami hoi Sithaw imthungtako ih kami ah na oh o boah.

²⁰ Nangcae doeh kawkpatoehnawk hoi tahmanawk mah imtakung pahung ih nuiah sak ih im ah na oh o toengh moa imkii ih hlung loa Khrih Jesuh to ni.

²¹ Anih loa im bum boih to patawn takung ah oh moa Angraeng khaeah tahlang ih tempal kacai ka qoengsakkung ah a oh.

²² Angmah hoiah angpaehhaih ranghoiah nangcae doeh kalah kaminawk boih hoiah nawnto ah a Pakhra hoiah Sithaw mah a ohhaih ih im sak iah na oh o toengh.