Angtawtha 7 - Asang Khongso New Testament

Stefen Ih Lokthuih

¹ Qaihma Kalen mah Stefen khaeah, “A thuih o ih hae tangtang maw?” tiah a duengh pae.

² Stefen mah, “Naukamzanawk, ka lok hae tahngai oah! Aicae ih saeza Abraham to Haran prae ah oh hanah a caeh ai nahlanah, Mesopotamia prae ah lensawkhaih Sithaw to anih khaeah amtueng pae moa,

³ anih khaeah, ‘Na imthungtako hoi na prae to tacawt tak aloa kang patuek hanih prae ah to caeh ah,’ tiah a naa.

⁴ Topongah angmah ih prae Khaldea to tacawt tak moa Haran vang ah khosak hanah a caeh. Abraham loa ampa duek pacoengah vaihi a ohhaih ih prae ah hae Sithaw mah angpuensak.

⁵ Tona thuemah hi prae hae Sithaw mah Abraham khaeah ahap apai boe doeh paek ai, pe maeto ta mataeng doeh paek pae ai; to-e Sithaw mah anih khaeah paek hanah lok amaih moa hi prae hae nangmah hoi na cadiinawk iah om tih, tiah a naa. Hi lok amaihhaih ih Sithaw mah a sak nathuemah hae Abraham loa a canawk tawn ai.

⁶ Sithaw mah anih khaeah thuih ih loa: ‘Na catawnnawk loa prae kalah ah om o ueloa toah to misong ah om o ueloa saning cumvaipalito thung raekraihaih to pauep o tih.

⁷ To-e anihcae mah toksak pae o ih caeng kaminawk to kaimah lok ka caek han,’ tihae ni, ‘topacoengah na cadiinawk to ato prae hoitoah tacawt o ueloa hi hmuenh ah kai hae na bok o tih,’ tiah a thuih.

⁸ Topacoengah Sithaw mah Abraham to tangzat-hin aahhaih tawkcah to paipi mathaih hanah a paek. Topongah Abraham mah Isaak zah pacoeng tabaihto oh na-ah tangzat hin a aah paeh; Isaak mah a capa Jakob to tangzat hin a aah pae moa Jakob mah doeh aicae caeng ih saeza ahmin kamthang a ca hlaihnet tonawk to tangzat hin a aah pae.

⁹ “Jakob ih canawk mah amnauk Joseph to ut o moa Izipt prae ah misong ah oh hanah a zawh o. To-e Sithaw mah a oh haih moa,

¹⁰ a raihaih boih thung hoitoah kasueng ta-ah a zaehoi let. Joseph loa Izipt sangpahrang Fero hma-ah amthong na-ah Sithaw mah tuinuenh kahoih hoi ciinghaih to a paek. Fero mah Joseph to prae ukkung angraeng hoi sangpahrang imthungtako ukkung ah a suek.

¹¹ Topacoengah Izipt hoi Kanaan prae bum boih ah takang a thoh moa patang khanghaih katingai a oh. Aicae saezanawk loa caknaek tidoeh hnuh o ai moa,

¹² Jakob mah Izipt prae ah oh tito a thaih na-ah aicae ih saeza a canawk to hmaloe koek ah toah to a patoeh.

¹³ A caeh o pahnit na-ah Joseph mah naukamzanawk khaeah a panoeksak moa Izipt sangpahrang mah Joseph ih imthungtako kawng to a panoek.

¹⁴ Topongah Joseph mah ampa Jakob khaeah lok a pat pae moa angmah hoi a imthungtako bum boih, kami quisarihto pacoeng pangato to Izipt prae ah angzoh o king hanah a thuih pae.

¹⁵ Topacoengah Jakob loa Izipt prae ah a caeh moa toah to angmah hoi a canawk to a duek o.

¹⁶ Anihcae ih qok to Shekhem ah a caeh o haih moa toah to Abraham mah Hamor caengnawk khaeah tangka hoiah qanh ih taprong thungah to up o.

¹⁷ “Sithaw mah Abraham khaeah lok amaihhaih a sak ih to a koephaih tue a phak na-ah Izipt prae ih kaom aicae caeng kaminawk loa katingai angpung o.

¹⁸ Hnukkhuem ah Joseph kawng panoek ai sangpahrang mah Izipt prae to a uk.

¹⁹ Anih mah aicae saezanawk to aling moa anihcae to raek o, anihcae ih canawk to dueksak hanah imthung hoitoah tasabang ah a sueksak.

²⁰ Hi tue na-ah Mosi to a zah moa krang kahoih phi naukta ah oh. Im ah khra thumto khetzawn o moa,

²¹ im hoitoah tasabang ah vah ah oh na-ah sangpahrang ih canu mah pacah moa angmah ih capa batiah a khetzawn.

²² Anih loa Izipt kaminawk ih ciinghaih boiboih to amtuk moa a loklang hoi a sakhaih ih hoiah kami kalen paraiah coengh.

²³ “Mosi loa saning quipalito a koep na-ah angmah ih caeng ampui Israel kaminawk to kawbangmaw hing o tito khet koeh pongah a paqai.

²⁴ Kami longto to Izipt kami mah raek li ah ka om to a hnuk, topongah abom hanah a caeh moa Izipt kami to humhaih hoiah lu a lak.

²⁵ (Sithaw mah anihcae to loihsak hanah kai hae patoh tih tito angmah ih kaminawk mah panoek kop tih, tiah a dawn e panoek kop o ai).

²⁶ Akhawnbang ah Israel kami longhnetto kangpanh to a hnuk moa anih hnit salak ah angdaehhaih sak hanah panki. Anih mah, ‘Ka lok hae tahngai hoi ah, nang hnit loa caeng maeto Israel kami ah na oh hoi qoiqai; tipongmaw hitiah nangpanh hoi loa?’ tiah a naa.

²⁷ To-e kalah longto nuiah boe kasae parai to mah Mosi to a nuih moa, ‘Mimah maw kai hnit nuiah ukkung hoi lokcaekkung ah na suem?’ tiah a naa.

²⁸ ‘Zangduem ah Izipt kami na hum batiah kai hae hum hanah na koeh maw?’ tiah a naa.

²⁹ Hi lok hae Mosi mah a thaih na-ah Izipt prae hoitoah a cawnh vik moa Midian prae ah oh hanah a caeh. Toah to ca nongpa hnetto a tawnh.

³⁰ “Saning quipalito laemh na-ah, vanmi longto Mosi khaeah Sinai Mae taeng praetanghaeng ah tangpruem hmai kangqong hoiah amtueng.

³¹ Mosi loa a hnuk ih to a dawnrai moa kahnai daek hoiah hoihdak ta-ah khet hanah thingsabu haek ah to a caeh. To-e Angraeng ih lok to a thaih:

³² ‘Kai loa nangcae saezanawk ih Sithaw, Abraham ih Sithaw, Isaak ih Sithaw, Jakob ih Sithaw ah ka oh,’ tiah a naa. Mosi loa zit loiah anghuen sut moa khen vam ai.

³³ Angraeng mah anih khaeah, ‘Na khokbuen to angkhring ah, kawmawtiah nangdoethaih ih hmuenh loa hmuenh kacai ni.

³⁴ Izipt prae ah kai ih kaminawk patanghaih katingai pauephaih o ih to ka hnuk boah. Anihcae ih ahaamhaih lok to ka thaih moa anihcae to loihsak hanah kangzoh boah. Vaihi angzo oah, Izipt prae ah kang patoeh o han,” tiah a thuih.

³⁵ “Mosi loa Israel kaminawk mah vah o sut ih kami ni. ‘Kaihnit nuiah ukkung hoi lokcaekkung ah mimah maw na suem?’ tiah a naa pae hoi. Anih loa kaminawk uk han hoi tangpruem hmai kangqong khae hoitoah kamtueng vanmi ih abomhaih hoiah ka loihsak hanah Sithaw mah patoeh ih kami ni.

³⁶ Anih mah Israel kaminawk to Izipt prae thung hoitoah a zaehoi moa Izipt prae hoi Tuipui Kathim ah saning quipalito thung praetanghaeng ah dawnraihaih ihnawk hoi matsakhaih ihnawk to a sak.

³⁷ Mosi loa Israel kaminawk khaeah lok ka thui kami ni. Anih mah, ‘Sithaw mah kai ang patoeh batih toengah tahma longto nangcae khaeah patoeh o tih moa anih loa nangmahcae caeng thungih kami ah om tih,’ tiah a naa.

³⁸ Anih loa praetanghaeng ah kamkhueng cu Israel kaminawk hoiah nawnto ka om ni; anih loa toah to aicae saezanawk hoiah a oh moa Sinai Mae ah lok ka thuikung vanmi hoiah ka om nawn ni; anih loa Sithaw ih kahing lok aicae khaeah phaksak patoeng hanah ka lakung ni.

³⁹ “To-e aicae saezanawk mah anih ih lok to tahngai o ai; anih to takhoe o sut moa Izipt prae ah amlaem let han a koeh o.

⁴⁰ Topongah anihcae mah Aaron khaeah, ‘Kaicae zaehoi hanah sithawnawk na sah pae oah. Izipt prae hoitoah kaicae zaehoikung Mosi hae kawbangmaw oh ka panoek o ai boah,’ tiah a naa o.

⁴¹ Totiah oh pongah maitaw taeta to kraangthoi maeto a sak o, angbawnhaih a sak o moa ban hoiah sakhmang ih to khangzahaih poi to a sak o.

⁴² Topongah Sithaw mah anihcae to hnukthung tak moa tahmanawk ih cabu thungah tarik ih batiah van sakaenawk a boksak o. Ato Cabu thungah to: ‘Israel kaminawk! Nangcae mah praetanghaeng ah saning quipalito thung boiinawk na boh o moa angbawnhaih na sak o ih to kai khaeah na sak ih na ai ni.

⁴³ Nangcae mah na phawh o ih loa Molek sithaw ih samdai im ni. Nang sinh o ih kraangthoi loa nangmahcae ih sakae sithaw Refan ih kraang to ni; Anihcae loa nangcae mah bok hanah sak o ih kraangthoi to ni. Topongah nangcae loa Babilon prae laep ah kang caehsak han,’ tiah tarik.

⁴⁴ “Aicae saezanawk loa Sithaw to anihcae khaeah oh tito panoek hanah samdai im to praetanghaeng ah a tawnh o toemoe.

⁴⁵ Ahnuk aloa aicae saezanawk mah ampanawk khae hoitoah a hak o ih samdai im to Joshua khaeah a caeh o na-ah a sinh o; anihcae ih hma-ah Sithaw mah adum ih kaminawk ih prae to Joshua cae hoiah a lak o na-ah samdai im to a sinh o poe moa toah to David dung setto a oh.

⁴⁶ David loa Sithaw hma-ah mikhmai kahoih to a hak moa Jakob ih Sithaw ohhaih hanah im maeto sak thai hanah Sithaw khaeah a hnik.

⁴⁷ To-e im ka sahkung tangtang loa Solomon ni.

⁴⁸ “To-e Sang Koek Sithaw loa kami ban hoiah sak ih im thungah om ai; tahma mah hitiah a thuih:

⁴⁹ ‘Van hae kang hnuthaih iah oh moa long hae ka khokkoenghaih iah oh, tiah Angraeng mah a thuih. Kawbatih im maw kai hanah nang sak pae han? Ka ohhaih hanih hmuenh loa naamaw a oh?

⁵⁰ Hi hmuennawk boih hae kaimah ka sak ih na ai maw?

⁵¹ “Topacoengah Stefen mah, “Palung na thah o phi hae loa aw! Nangcae ih palungthin loa Sithaw ka panoek ai ih palungthin bae hae! Sithaw lok thaihhaih bangah naa na pangh o hae loa! Nangcae loa nangmahcae saezanawk batiah ni na oh o, nangcae doeh Cai Pakhra to na pakak o toemoe!

⁵² Nangcae saezanawk mah pacaekhlaek ai ih tahma a oh maw? Sithaw ih Tamtoeh katoeng angzohhaih hanah zanghnii zangkhawn ah ka taphongkung Sithaw ih laicaenawk to a hum o. Vaihi loa nangcae mah anih to nangphat o tak moa na hum o.

⁵³ Vanminawk mah paek patoeng ah ka om Sithaw ih tawklok ka lakung nangcae hae ni, to-e ato tawklok ka pazui ai loa nangcae toengtoeng bae ni,” tiah a thuih.

Stefen Hlung Hoiah Vah O

⁵⁴ Lokcaekhaih Kawngsi ih kaminawk mah Stefen ih lokthuih to tahngai o na-ah katingai palungphui o moa anih to haa kaekthuih o.

⁵⁵ To-e Cai Pakhra hoiah kakoi Stefen loa van bangah doeng tahang moa Sithaw lensawkhaih hoi Sithaw ih bantang bangah kangdoe Jesuh to a hnuk.

⁵⁶ Anih mah, “Khen oah! Van am-ong moa Sithaw ih bantang bangah kangdoe Kami Capa to ka hnuk!” tiah a thuih.

⁵⁷ Tona-ah Kawngsi ih kaminawk loa ban hoiah naa to tamuep o moa khoeh puiah a hangh o. Topacoengah anihcae boih mah caehthuih o buk roep moa,

⁵⁸ avang thung hoitoah paelaep bangah to ruet o moa hlung hoiah vah o. Hlung hoiah ka vah kaminawk mah angmahcae ih kahninawk to thendoeng longto ahmin Saul ih khokkung ah a suek o.

⁵⁹ Hlung hoiah a vah o li na-ah Stefen loa Angraeng to a kawk moa, “Angraeng Jesuh, ka pakhra hae na talawk pae ah,” tiah a naa.

⁶⁰ Khokkhu samkrawn moa khoeh puiah a hangh moa, “Angraeng! Anihcae ih zaehaih hae palung thungah suem pae hmah,” tiah a thuih moa a duek.