2 Thesalon 1 - Asang Khongso New Testament

¹ Paul, Silas hoi Timote mah, Thesalonika vang ih kaom Khrihca kangkom, aicae Ampa Sithaw hoi Angraeng Jesuh Khrih ih kami, nangcae khaeah ca kang pat o.

² Aicae Ampa Sithaw hoi Angraeng Jesuh Khrih mah tahmenhaih hoi monghaih paek o na soe.

Khrih Angzoh Na-ah Lokcaekhaih

³ Naukamzanawk, nangcae han-iah Sithaw khaeah kawn lok ka thuih o toemoe. Totiah sak han hae ahlong, kawmawtiah nangcae ih taanghaih loa paroeai a qoengh tahang moa nangcae boih mah minawk kalah palunghaih ih na tawnh o ih loa a lenh aep aep.

⁴ Topongah kaimahcae roeroe mah nangcae ih kawng to Sithaw ih Khrihca kaminawk khaeah kamlue o haih. Nangcae mah pacaekhlaekhaih ihnawk hoi patang khanghaih ihnawk to na tongh na pauep o moa taanghaih ih to nang cak o poe pongah kaicae mah nangcae to kamlue o haih.

⁵ Hinawk boih mah hae Sithaw lokcaekhaih ih loa a toeng tito amtuengsak. Topongah nangcae loa Sithaw Poenghaih hoiah avang kating kami ah na om o tih; totih hanah ni nangcae mah patang na khang o.

⁶ Sithaw mah kahmaan to loa sah tih: nangcae patang ka khangsak kaminawk nuiah patang khanghaih to phasak toeng tih;

⁷ patang ka khang nangcae hoi kaicae khaeah doeh palung amdamhaih ih paek o tih. Angraeng Jesuh to angmah ih tha ka rah vanminawk hoiah van bang hoitoah amtueng na-ah ato to sah tih;

⁸ Sithaw ka takhoe kaminawk hoi aicae Angraeng Jesuh kawng Tamthang Kahoih ka pazui ai kaminawk to hmai kamngaeh hoiah raek tih.

⁹ Anihcae loa dungzan amrohaih ih raek patanghaih to khang o tih. Angraeng loa angmah kaminawk boih khae hoitoah lensawkhaih hak han hoi ka taang kaminawk boih khae hoitoah khangzahaih hak hanah,

¹⁰ Angraeng angzoh Ni ah anihcae loa Angraeng ohhaih ih hoi angmah ih lensawk tharahhaih khae hoitoah ampraek o boih tih. Nangcae loa kang thuih o ih tamthang lok to na taang o pongah lensawkhaih hoi khangzahaih ka paekkungnawk salak thungah na paa o toeng tih.

¹¹ Topongah hae nangcae han-iah kho kang phoeh pae o toemoe. Aicae Sithaw mah ang kawkhaih ih hoiah avang kating ah hingh thai hanah Sithaw khaeah ka hnik o toemoe. Hoihhaih han-iah nangcae koehhaih ih boiboih to a tharahhaih hoiah a koepsak soeloa nangcae taanghaih toksakhaih ih to acungsak na soe.

¹² Hitih haeah aicae Angraeng Jesuh hmin to nangcae khae hoitoah lensawkhaih to hnuh ueloa aicae Sithaw hoi Angraeng Jesuh Khrih ih tahmenhaih ranghoiah anih khae hoitoah na hnuh o toeng tih.