2 Korin 9 - Asang Khongso New Testament

Khrihca Longto hoi Longto Abomhaih

¹ Judea prae ih Sithaw kaminawk khaeah abomhaih nang pat o ih kawng pongah nangcae khaeah capat tarik han aloe ai tiah ka dawn.

² Nangcae loa abom hanah palung na huem o tito kang panoek o moa Masidonia prae ih kaminawk khaeah nangcae kawng to kamlue haih. “Akhaia prae ih kaom naukamzanawk loa hnuk bang saning hoitoah abom hanah coengcoe ah a oh o boah,” tiah ka naa pae. Nangcae palungthin angthawkhaih ih mah kami kanoi to palung angthawksak.

³ Vaihi ah hi naukamzanawk hae kang patoeh o, kawmawtiah hi kawng pongah hae nangcae kamlue o haih ih to lok romram ah coengh ving han aiah ka koeh pongah ni. To-e ka thuih batiah abomhaih paek hanah amsakhaih hoiah coengcoe ah om oah.

⁴ Topacoengah Masidonia ih kaminawk to kai hoiah angzoh o moa coengcoe ta-ah na om o ai tito panoek o nahaeloa nangcae azat hanih to thui hmah raeh, kaicae doeh nangcae to kang oeptang o pongah ka zat o phi tih.

⁵ Topongah kai kangzoh ai nahlanah hi naukamzanawk to nangcae khaeah patoeh han hoi nam-aih o ih abomhaih hmuenpaek to paek hanah coengcoe ta-ah oh roeh han angaih tiah ka dawn ai. Kai kang phak na-ah coengcoe ta-ah na oh o han hoi na tawnhnang o pongah paek o ai moa na koeh o pongah na paek o tito amtuengsak tih.

⁶ Cangti zetta ka tuh mah aquihthaih zetta hak tih; cangti zetpui ka tuh mah aquihthaih zetpui hak tih, tihae pahnet o hmah.

⁷ Topongah mi boih mah angmahcae palungthin angthawk ih batiah paek o na soe; pa-awthaih hoiah paek o hmah na soe; paek cingcing han oh ti ih palungthin hoiah paek o hmah na soe; kawmawtiah palungthin anghoehaih hoiah ka paek to ni Sithaw mah palung.

⁸ Sithaw loa nangtoeng o ih ponghdoeh kamhlai ka paekkung ah a oh moa nangmahcae angtoeng ihnawk boih to na tawn o toemoe ueloa hmuen kahoih na sak o ih nuiah kamhlai zawt ah na hak o tih.

⁹ Cabu Kacai mah, “Kamtang kaminawk khaeah kuuhoihhaih hoiah a paek; a palungnathaih loa dungzan ah angcak,” tiah a thuih ih batiah oh.

¹⁰ Cangti haeh han hoi buh cak hanah ka paekkung Sithaw mah nangtoeng o ih cangti boiboih to doeh na paek o tih, nangcae kuuhoihhaih thung hoitoah atimu kamprawk to qoengsak ueloa aquihthaih to zetpui tacawtsak tih.

¹¹ Natuek tue ah doeh kuuhoih toemoe hanah Sithaw mah ka khawt ah angraengsak toemoe tih, tona-ah ni nangcae ih hmuenpaek to kaicae khae hoitoah a hak o na-ah kami paroeai mah Sithaw to pakoeh o tih.

¹² Kawmawtiah hi tok na sakhaih o ih mah hae Sithaw kaminawk ih avawthaih to abom khueh aiah Sithaw khaeah thuih ih kawn lok zetpui tacawtsak.

¹³ Ahi nangcae toksakhaih ih mah amtuengsak pongah kami paroeai mah Khrih ih tamthang kahoih to oeptang kaom ta-ah na tapom o pongah doehsoe, nangcae mah anihcae hoi mi kalahnawk boih khaeah kuuhoihhaih hoiah na pazet o pongah doehsoe, kami paroeai mah Sithaw lensawkhaih to pakoeh o tih.

¹⁴ Topongah Sithaw mah ang paek o ih tahmenhaih kamhlai zawt pongah nangcae to palunghaih katingai hoiah nangcae hanah kho na phoeh pae o tih.

¹⁵ Thui laek thai ai avang kating langrae pongah Sithaw khaeah kawn lok thui o si.