2 Korin 7 - Asang Khongso New Testament

¹ Kang palung o ih naukamzanawk, hi lok amaihhaih boiboih hae kaicae hanah amaih ih ni. Topongah takbum doehsoe, pakhra doehsoe kamhnongsak boiboih to loa thoengcaisak o si; Sithaw zithaih ih hinghaih hoiah thoengcaisak o si.

Paul Palung Anghoehaih

² Nangcae ih palungthin thungah kaicae hanah ahmuenh paek oah. Mita nuiah doeh zaehaih ka sah o ai, ami doeh ka paro o ai moa ami ih hmuen doeh ka la pae o romram ai.

³ Nangcae to zaenet hanah hi hae ka thui o ai; kawmawtiah zanghni ah kang thuih o ih batiah nangcae o paroeai kang palung o pongah hingh doeh hing o nawn, duek doeh duek o nawn hanah ni oh o toemoe.

⁴ Nangcae to paroeai kang oep kang tang o; nangcae to kamlue o haih! Patang raihaih cungri ka tongh o na-ah palungthin kangcak ah ka oh o.

⁵ Masidonia ah ka phak o na-ah mataeng doeh amdamhaih tue ka hnuh o ai. Ahmuenh kruekah raihaih ih to a oh, longto hoi longto angzoeh angaek o, palung thungah ka zit ka mawnh o.

⁶ To-e palungthin kaboeng thahmaehaih ka paekkung Sithaw mah Titas angzohhaih ranghoiah thahmaehaih to ang paek let.

⁷ Anih ih angzohhaih khueh mah kaicae palung anghoesak ai moa anih tha na paek o ih to ka thaih na-ah paroeai tha ka hmae o. Natanmaw kaicae hnuk han na koeh o, natanmaw palung na set o moa natanmaw kai hae nang tangh o haih tito ang thuih; topongah vaihi kanghoe aep.

⁸ Kawmawtiah totiah ca ka pat ih mah nangcae to palungsetsak o langla cadoeh ka tarik ih to ka dawnpakhuem ai. Ato ca mah nawnetta thung palung ang setsak o tito ka hnuk na-ah palung ka hoih ai.

⁹ To-e vaihi loa palung kang hoe, nangcae to palung kang setsak pongah na ai moa nangcae palungsethaih mah nangcae ih tuinuenh to anglaihsak pongah ni.

¹⁰ Kawmawtiah Sithaw mah patoh ih palungsethaih loa pahlonghaih bangah ka caeh haih palungthin anglaihhaih to tacawtsak moa ato palungsethaih ih pongh dawn pakuemhaih om ai. To-e kami palungsethaih ih romram mah loa duekhaih to tacawtsak.

¹¹ Sithaw mah nangcae palungsethaih to kawbangmaw patoh tito khen o noek ah: kawkruk maw tha ang hmaesak o boah moa zaehaih na tawn o ai tito kawkruk maw amtuengsak han paroeai na koeh o hae! Palung na phui o, na tasoeh o, na poek na dawn o, palungthin nang paek o, sakzaehaih ih to dan paek mue mue han na koeh o! Hi hmuen boiboih ah nangcae loa sakzaehaih om ai tito namtuengsak o boah.

¹² Topongah ato ca to kang tarik o to zaehaih ka sah kami ih kawng pongah na ai moa zae sakhaih ka pauepkung ih kawng pongah doeh na ai ni. Ka tarik koehhaih ih loa kaicae hanah angpaekhaih ih hae natanmaw a thuk tihae Sithaw mikhnuk ah amnoeksak hanah ni.

¹³ Topongah ni kaicae loa tha ka hmae o. Kaicae tha ka hmae o ih khueh na ai; nangcae boih mah Titas to palung anghoesak hanah na bom o moa anih ih palung anghoehaih mah kaicae hae doeh palung anghoesak toeng.

¹⁴ Anih khaeah nangcae to kamlue haih moa nangcae mah kai hae tha nang ruihsak o ai. Nangcae khaeah loktang to kang thuih o toemoe, tobatih toengah Titas khaeah kamlue o haih ih hae loktang ah coengh.

¹⁵ Topongah nangcae boih mah Titas ih thuih loknawk to pazui hanah coengcoe ah na oh o ih hoi zit tasoehhaih hoiah anih to na dawt o to a dawn toepsoep na-ah anih mah nangcae palunghaih loa a nat aep aep.

¹⁶ Palungthin boih hoiah nangcae ka oeptang thai pongah natanto maw palung kanghoe!