1 Piter 4 - Asang Khongso New Testament

Hinghaih Alaih

¹ Khrih loa takbum hoiah patang a khang pongah anih ih pauephaih to dawnhaih hoiah nangcae doeh thahmaesak oah; kawmawtiah ami doeh takbum hoiah patang khanghaih ka pauep loa zaehaih thungah apa ai boah.

² Topongah vaihi hoiloa longnui hing nathungah kami koehhaih ih na aiah Sithaw koehhaih ih mah na uk o soe.

³ Zanghnii ah Sithaw panoek ainawk mah a sak han koeh o ih to na sak o hoiah atue to na patoh o boah. Nangcae hinghaih to khet kahoih ai hinghaih, takngan koehhaih, mu paquihaih, nongpui nongpa zaesakhaih, poicak kungah hnawh lamhhaih, panuet kaom kraangthoi bokhaih to na sak o.

⁴ Vaihi loa Sithaw panoek ai kaminawk ih tidoeh amquemhaih kaom ai hinghaih pongah na paa pae o ai pongah a dawnrai o moa nangcae to thuihprong o.

⁵ To-e kahing hoi kadueh kami to lokcaek hanah coengcoe ah kaom Sithaw hma-ah anihcae mah angmahcae ih a kawng to thui o let tih.

⁶ Topongah ni loa Tamthang Kahoih to kadueh kaminawk khaeah doeh thuih pae ah oh. Anihcae doeh takbum ah hing o nathuemah mi kalah batiah lokcaek ah oh o boah; anihcae khaeah tamthang lok thuih pae haih ih loa pakhra bangah Sithaw batiah a hingh o thai hanah ni.

Sithaw Langrae Pakuemkung

⁷ Tiboih boih aboenghaih tue loa a hnai boah. Nangcae loa khophoeh o thai hanah aimah hoi aimah amquem o aloa acoe aha oah.

⁸ Atonawk boih pongdoeh, longto hoi longto palungthin tang hoiah amlung oah, kawmawtiah amlunghaih mah loa zaehaih paroeai to a khuk thai.

⁹ Laisaep aiah nangcae ih im ah longto hoi longto toemsak oah.

¹⁰ Sithaw ih langrae kalah kalah pakuemkung kahoih batiah Sithaw khae hoitoah na hnuk ih langrae to minawk kalah hoihhaih hanah patoh oah.

¹¹ Ami doeh tamthang lok ka thui loa Sithaw ih tamthang to thui han oh; ami doeh tok ka sah loa Sithaw mah paek ih tharahhaih hoiah sak han oh, tona-ah ni loa tiboih boih pongah Jesuh Khrih ranghoiah Sithaw khaeah saphawhaih to paek thai tih, lensawkhaih hoi tharahhaih loa dungzan khoekto angmah khaeah oh na soe. Amen.

Khrihca Patang Khanghaih

¹² Palung ih ampuinawk, kana parai tanoekhaih ih na pauep o ih pongah dawnrai o hmah, nangcae nuiah hmuen ka om vaih ai to angthoh tiah dawn o hmah.

¹³ Khrih ih patang khanghaih to na bo haih pongah anghoe o lat ah, totibaloa angmah ih lensawkhaih to amtueng na-ah palung anghoehaih hoiah na koi o ih.

¹⁴ Jesuh ih hnukbang ah na oh o pongah kasae thuihhaih ih to na pauep o nahaeloa palung anghoe oah; kawmawtiah lensawk Pakhra, Sithaw ih Pakhra to nangcae nuiah oh tihaih ih ni.

¹⁵ Nangcae thungih longlongto mah patanghaih pauep nahaeloa, kami hum pongah, amquk pongah, lumlai hnuk pongah, minawk kawng to na taek na zak pongah, patanghaih pauep o hmah.

¹⁶ Khrihca ah na oh o pongah patang khanghaih pauep o nahaeloa azat o hmah, to-e Khrih hmin to na sinh o pongah Sithaw khaeah kawn lok thui oah.

¹⁷ Lokcaekhaih amtong hanah atue to phak boah moa Sithaw angmah ih kaminawk to lokcaek hmaloe ah om tih. Ato to aicae hoiah amtong nahaeloa Sithaw khae hoi-ih Tamthang Kahoih ka taang ainawk to kawbangmaw aboenghaih om tih?

¹⁸ Cabu Kacai mah, “Kami kahoihnawk hanah pahlonghaih hnuk hanah a rai parai; Tisoe nahaeloa Sithaw panoek ai kami kazaenawk to kawbangmaw om tih?” tiah a thuih.

¹⁹ Topongah Sithaw ih koehhaih pongah patanghaih pauep kaminawk loa hmuen kahoih sakhaih ranghoiah Sithaw khaeah angmahcae to angpaek o qoek na soe; anih loa angmahcae ka Sahkung ah oh moa a lok amaihhaih to pakhrawt vaih ai.