1 Korin 8 - Asang Khongso New Testament

Kraangthoi Khaeah Tahlang Ih Caknaek

¹ Kraangthoi bokhaih ih caknaek kawng ca hoiah nang tarik o ih to vaihi kang thuih o han: “Aicae boih mah panoekhaih ih hae tawnh o” tiah thuih o ih to ahmaan parai. To-e ato batih panoekhaih ih mah kami to amoeksak, to-e amlunghaih ih mah loa kami to a qoenghsak.

² Ka panoek boih tiah ka dawn kami loa a panoek hanih zetto panoek ai tangtang.

³ To-e ami doeh Sithaw ka palung loa Sithaw mah a panoek.

⁴ Totiah oh pongah kraang kathoinawk khaeah paek ih caknaek cak kawng pongah hitiah ka dawn: kraangthoi loa ka om tangtang ai ih hmuen maeto zuengah suek ih ni tiah aicae mah panoek o moa Sithaw loa maeto khueh ni a oh tito aicae mah panoek o.

⁵ Van ah doehsoe, longnui ah doehsoe “sithawnawk” om toklangla doehsoe, topacoengah “sithawnawk” hoi “angraengnawk” ka pop paraiah om langla cadoehsoe,

⁶ aicae hanih loa cungriboih Sahkung hoi aicae hinghaih takung pa Sithaw maeto khueh a oh; topacoengah Angraeng maeto Jesuh Khrih khueh a oh moa angmah ranghoiah cungriboih a sak moa angmah ranghoiah aicae mah hingh o.

⁷ To-e mi boih mah ahi loktang hae panoek o ai. Kami thoemto loa kraangthoi patoh ih hae a kra parai boah moa vaihi ni khoekto kraangthoi khaeah paek ih caknaeknawk to a cak o na-ah ato caknaek loa kraangthoi ih ni tiah a dawn o poe; anihcae ih kasae kahoih panoek ih to a thahnaem sut pongah ato caknaek mah amhnongsak o tiah a dawn o.

⁸ Caknaek loa Sithaw hoiah angpaehhaih ih to qoenghsak thaih ai; aicae mah caa ai cadoeh sunghaih ih tidoeh om ai moa amraihaih ih tidoeh om ai.

⁹ To-e acoe oah, kaloih kami ah na ohhaih o ih to mah taanghaih bangah tha ka zok kaminawk to zaehaih thungah amtimsak o moeng hmah na soe.

¹⁰ Thuih patahhaih iah “panoekhaih ih” ka tawn tiah kawk o ih nangcae mah kraangthoi bokhaih hmuenh ih caknaek na cak o to kasae kahoih panoekhaih bangah tha ka zok mah ang hnuk o ti rae si; ato mah to kraangthoi khaeah tahlang ih caknaek to cak hanah tha na paek batiah om mak ai maw?

¹¹ Topongah tha ka zok namnauk hanah Khrih to a duek e nang ih “panoekhaih ih” mah namnauk to amrosak tih!

¹² Hitih haeah Khrihca naukamza nuiah zaehaih na sakhaih ranghoi anihcae ih kasae kahoih panoekhaih ih tha ka zok to angloisakhaih ranghoiah Khrih nuiah zaehaih ih to na sak ah oh.

¹³ Totiah soehaeloa caknaek mah naukamza to zaesak nahaeloa naukamza to zaehaih thungah amtimsak han aiah natuek doeh ato batih moi to ka caa mak ai boah.