1 Korin 4 - Asang Khongso New Testament

Khrih Ih Kawkpatoehnawk

¹ Kaicae hae Khrih ih tamtoeh, Sithaw ih loktamqu loktang lok pakuemkung ah nang dawn o han oh.

² Ato batih tamtoehnawk mah nguek ih hmuen maeto loa angmahcae angraeng khaeah oepthok ta-ah oh han hae ni.

³ Vaihi ah nangcae mah doehsoe, kami tawk hoiah doehsoe, lok nang caek o han hae tiadoeh ka dawn ai; kaimah hoi kaimah doeh lok ka caek ai.

⁴ Kasae kahoih panoekhaih ih palungthin loa a thoeng, to-e totiah ka thuih na-ah zaehaih ih tawn ai roeroe tihaih ih na ai ni. Ka nuiah lokcaekhaih ka sahkung loa Angraeng ni.

⁵ Topongah atue mah phak ai nahlanah ami doeh lokcaek o hmah. Hnukkhuem lokcaekhaih ih loa Angraeng angzoh na-ah om tih; anih mah khoving thungih hawk ihnawk boih to aanghaih thungah tacawt haih ueloa kami mah palungthin thungah tamqu lamah amsakhaih ihnawk taphong boih tih. Topacoengah mi boiboih mah hnuk hanih kating pakoehhaih ih to Sithaw khae hoitoah hak o tih.

⁶ Naukamzanawk, nangmahcae han-iah hi hmuen boiboih hae kai hoi Apollo hae patahhaih iah kang lak pae o moa kang thuih o. Hitiah ka thuih na-ah, “Sipae taloek hmah,” tiah thuih ih lok kaom to thuihkoehhaih na panoek o thaih hanah ni.

⁷ Mimah maw mi kalah pongdoeh kasang kue ah na sah? Na tawnh o ih cungriboih to Sithaw mah paek ih na ai maw? Toti nahaeloa na tawnh o ih hmuennawk to azom ah paek ih langrae na ai batiah kawbangmaw namlue o thaih loa?

⁸ Nangtoeng o ih cungriboih na tawnh o king boah maw? Nangraeng o king boah maw? Kaicae loa sangpahrang ah coeng o ai e nangcae loa sangpahrang ah na coengh o ving boah maw? Sangpahrang tangtang ah oh hanah kang koeh o haih, tona-ah ni kaicae doeh nangcae hoiah nawnto sangpahrang ah om o thaih tih.

⁹ Kawmawtiah kaicae kawkpatoehnawk hae Sithaw mah a hnukkhuem koek ah ang suek tiah ka dawn. Mipui hma-ah duek hanah zaenet ih kami, vanminawk hoi longnui kami hma-ah khet ka nawm romram ah patoh ih kami ah ka oh o.

¹⁰ Kaicae loa Khrih han-iah kamthu o; to-e nangcae loa Khrih hoiah kangpaeh kacing kami ah na oh o! Kaicae loa tha ka hnaem o, to-e nangcae loa tha na rah o! Kaicae loa hnaphnae ah ka oh o, to-e nangcae loa khangza koiah na oh o.

¹¹ Vaihi tue khoekto doeh tui kanghae hoi zok kamhlam ah ni ka oh o; khukbuenh prawn pranh hoiah ni ka oh o; ang boh ang caep o; ahmuenh maeto hoitoah ahmuenh kalah ah ka vah kamhet o tuektuek;

¹² Angkok angtang hanah ban hoiah kangpho paraiah tok ka sak o. Ang tangoeng o na-ah tahamhoihhaih ka paek pae o; ang pacaekhlaek o na-ah ka pauep o taitu;

¹³ tamhnuih tamsak lok ang sak o haih na-ah lok ka naem hoiah ka pathim o. Kaicae loa hi longnui ih ka khoem ka ak kamhnong batiah ni ka oh o; vaihi khoekto longnui ih anghnoeng angoih batiah ni ka oh o.

¹⁴ Hi ca kang tarik o ih hae nangcae azatsak hanah ka koeh pongah na ai ni, ka palung ih caanawk batiah thuihtaek han ka koeh pongtoah ni.

¹⁵ Kawmawtiah nangcae ih Khrihca hinghaih tuinuenh pongah khenzawnkung sanghato na tawnh o langla doehsoe nampa loa maeto khueh ni na tawnh o. Kawmawtiah Khrih Jesuh hoiah angpaehhaih ih hinghaih pongah Tamthang Kahoih kang sinh ranghoiah kai hae nangcae ih ampa ah ka oh.

¹⁶ Topongah ka hinghaih tuinuenh hae khetpatawt hanah kang pacae o.

¹⁷ Ato pongah Timote doeh nangcae khaeah kang patoeh. Anih loa Khrihca hinghaih pongah ka palung ih hoi ka oeptang ih ka capa ni. Anih mah Khrih Jesuh hoiah angpaehhaih ranghoiah hinghaih kangtha ka pazui ih loklam hoi ahmuenh kruekah Khrihca kangkom boiboih khaeah ka patukhaih ih hinghaih loklam to na thui let tih.

¹⁸ Nangcae thungih thoemto loa kai hae nangcae khaeah angzo mak ai tiah dawn o pongah nam-oek o.

¹⁹ Angraeng koehhaih ih om nahaeloa nangcae khaeah kangzoh palang moa hi kam-oek kaminawk mah hmuensak thaihaih ih a tawnh o tito loklang hoiah a thuih o ih khueh aiah anihcae ih hmuensak thaihaih ih to kaimah khaeh mah ka khet han.

²⁰ Kawmawtiah Sithaw Poenghaih ih loa lokthuih romram ih na ai moa hmuensak thaihaih ih ni.

²¹ Kawbatih to maw na koeh o koek? Cungpraek hoiah maw kangzoh han? Tiaibaloa amlunghaih hoi hnonghoihhaih hoiah maw kangzoh han?