1 Korin 14 - Asang Khongso New Testament

Cai Pakhra Langrae Kalah Kalah

¹ Topongah amlunghaih hae lokpui koek ah suem oah. Pakhra langraenawk pongah palungthin to suem oah, lokpui koek ah Sithaw lok taphong thaihaih ih langrae to koeh oah.

² Panoek ai lok kapae kami loa mi kalahnawk hoiah apae ai moa Sithaw hoiah ni apaeh, kawmawtiah apaeh ih lok to mimah doeh thaihkop ai.

³ To-e Sithaw lok ka taphongkung loa kami khaeah to a thuih moa kaminawk hanah a bomhaih, thahmaehaih hoi monghaih to a paek.

⁴ Panoek ai lok kapae kami loa angmah hoi angmah khueh to abom, to-e Sithaw lok ka taphong kami loa Khrihca kangkom bum boih to abom.

⁵ Nangcae boih mah panoek ai lok apaeh hanah kang koeh o; to-e Sithaw lok thuih thaihaih ih langrae to tawnh hanah kang koeh o haih kue. Kawmawtiah Sithaw lok taphong kami loa panoek ai lok kapae kami pongdoeh tamu ohhaih a lenh kue. Khrihca kangkom bum boih mah hoihkhang haih thai hanah ka leh thaikung om ai nahaeloa panoek ai lok loa atho om ai.

⁶ Topongah naukamzanawk, kai kangzoh na-ah panoek ai lok kapaeh nahaeloa nangcae hanah hoihkhanghaih ih timaw om tih? Sithaw khaeih lok kangphong maw, panoekhaih ih maw, tahma batiah lokthuihhaih ih maw, patukhaih ih maw, maemaeto kang sin ai nahaeloa hoihkhanghaih hanih tidoeh om mak ai.

⁷ Hinghaih ka tawn ai atuenh kahoih ka tacawt tam-oi doehsoe, thongpa doehsoe, dawn o noek ah; a uengh o ih atuenh to hoihdak ta-ah tacawt ai nahaeloa ti tuen maw, timaw a uengh o tito mimah doeh panoek thai mak ai.

⁸ Mongka ka uengkung mah hoihdak ta-ah ueng ai nahaeloa mimaw misa tuk hanah amsak tih?

⁹ Tobatih toengah panoek ai lok to napaeh o ih to ahlongrui to om ai nahaeloa na thuih o ih lok to mimah maw thaihkop thai tih? Nangcae ih loknawk loa takhi thungah anghma king tih.

¹⁰ Longnui ah lok congca a oh, to-e ahlong ka om ai lok maeto doeh om ai.

¹¹ To-e panoek ai lok ka patohkung ih lok to ka panoek ai nahaeloa anih loa kai hanah caeng kalah kami ah oh moa kai doehsoe anih hanah caeng kalah kami ah om toeng tih.

¹² Nangcae mah Pakhra langrae to tawnh hanah na koeh o phi pongah ti kalah boih pongdoeh Khrihca kangkom ka qoengsak hankoi langrae to hak hanah panki oah.

¹³ Topongah panoek ai lok kapae kami mah a thuih ih to leh thai hanah khophoeh na soe.

¹⁴ Kawmawtiah totiah panoek ai lok hoiah kho ka phoeh nahaeloa ka pakhra to kho a phoeh toeng eloa palungthin loa toah to om ai.

¹⁵ Toti nahaeloa kawbangah maw ka sak han? Ka pakhra hoiah kho ka phoeh moa ka palungthin hoiah doeh kho ka phoeh han; ka pakhra hoiah laa ka thuih moa ka palungthin hoiah doeh ka thuih han.

¹⁶ Nangcae mah pakhra hoiah khueh Sithaw khaeah kawn lok na thuih o na-ah kawbangmaw acuhaih khaeah kangzo kami romramnawk mah nangcae kawn lok thuihhaih ih pongah to “Amen” tiah na thui pae o thaih tih? Na thuih o ih to thuihkhoehhaih tidoeh panoek o ai to loa.

¹⁷ Sithaw khaeah kawnh ih khophoehhaih to paroeai hoih phi langla cadoehsoe mi kalahnawk hanah hoihkhanghaih ih om ai roeroe.

¹⁸ Nangcae pongdoeh panoek ai lok kanoi aep ah kapaeh pongah Sithaw khaeah kawn lok ka thuih.

¹⁹ To-e mipui Sithaw bokhaih hmuenh ah loa minawk to patuk hanah panoek ai lok sanghato thuih pongdoeh thaihkop ih lokmu pangato thuih han ka koeh kue.

²⁰ Naukamzanawk, poekdawnhaih bangah naukta batiah om o hmah; hmuen kahoih ai sakhaih bangah loa naukta batiah om oah, to-e poekdawnhaih ih bangah loa kacoeh kami batiah om oah.

²¹ Cabu Kacai mah, “Kaimah ih kaminawk khaeah panoek ai lok kapae kaminawk patohhaih hoiah kapae han; caeng kalah kaminawk pakhaa patohhaih hoiah ka thuih han, to-e totih langla cadoehsoe kaimah ih kaminawk mah tahngai o mak ai; tiah Angraeng mah a thuih,” tiah tarik ah oh.

²² Totiah oh pongah panoek ai lok apaeh thaihaih ih langrae loa taangca ainawk hanah hnuksakhaih ih ni, taangcanawk hanih na ai ni. Sithaw ih lok taphong thaihaih ih langrae loa taangcanawk hanih ni, taangca ainawk hanih na ai ni.

²³ Khrihca kangkom kaminawk boih acu o na-ah kangzo kaminawk boih mah panoek ai lok apaeh o king nahaeloa tona thuemah kami romram thoemto tiaibaloa Sithaw kataang ai kaminawk to akun o soehaeloa kamthunawk tiah na naa o mak ai maw?

²⁴ To-e nangcae boih mah Sithaw lok na taphong o li na-ah Sithaw ka taang ai kami thoemto tiaibaloa kami romramnawk to akun o nahaeloa a thaih o ih lok mah to a zaehaih o ih to panoeksak tih.

²⁵ Anihcae mah tamqu lamah poekdawnhaih ihnawk to amtueng ueloa anihcae mah tongkhumhaih hoiah Sithaw to bok o ueloa, “Nangcae khaeah hae Sithaw a oh tangtang,” tiah thui o tih.

Sithaw Bokhaih Ninglam

²⁶ Naukamzanawk, ka thuih koehhaih ih loa hae ni: Na cu o na-ah kami longto mah laa sah koeh tih, kalah mah patuk han koeh tih, kalah longto mah Sithaw khaeih lok taphonghaih to tawn tih, kalah longto mah panoek ai lok to apaeh koeh tih, kalah longto mah panoek ai lok apaeh ih to thuihpacaih han koeh tih. Cungriboih to Khrihca kangkom hoihkhang haih hanah sah oah.

²⁷ Kami longlongto mah panoek ai lok apaeh hanah koeh nahaeloa ka pop koek ah kami longhnetto tiaibaloa longthumto roekto mah apaeh o na soe, longto pacoengah longto apaeh o na soeloa apaeh ih lok to longto mah thuihkoehhaih ih to leh na soe.

²⁸ To-e lok ka lehkung midoeh om ai nahaeloa panoek ai lok ka paekung to loa om duem na soeloa angmah hoi Sithaw khae khueh ah apae na soe.

²⁹ Sithaw mah paek ih lok thuih han ka tawn kami longhnit longthumto mah thui halat na soeloa kalahnawk mah a thuih o ih to kahoih hoi kahoih ai to tahngai o na soe.

³⁰ To-e acu na-ah kanghnu toeng kami longto mah Sithaw khae hoitoah a hak ih lok to thuih han tawn nahaeloa ka thui li kami to loa anghak rae na soe.

³¹ Mi boih mah amtukhaih ih a hak o moa tharahhaih ih to a hak o thai hanah nangcae boih to longto pacoeng longto Sithaw ih lok to na thui o thai tih.

³² Sithaw lok thuih thaihaih ih langrae hak ih to ka thuikung mah angmah hoi angmah to anguk han a oh.

³³ Kawmawtiah Sithaw loa tuengcang aiah oh hae koeh ai moa angdaeh hoi ka mong ta-ah ohsak han ang koeh. Sithaw ih Khrihca kangkom boiboih thungah na sak o ih batih toengah,

³⁴ nongpui loa acu na-ah om duem na soe. Anihcae loa lokthuih thaihaih ih to tawn o ai; Judah Tawklok mah a thuih ih batih toengah pahoikung ah doeh oh han om ai.

³⁵ Anihcae mah akawng maemaeto panoek han koeh o nahaeloa angmahcae im ah savanawk khaeah dueng o na soe. Nongpui mah thungah lokthuih hae azat han oh parai.

³⁶ Sithaw ih lok hae nangcae khae hoitoah angzoh thai maw? Tiaibaloa nangcae khueh khae hoitoah maw Sithaw lok to a phak?

³⁷ Kami longlongto mah Sithaw ih laicae ah ka oh tiah a dawn, tiaibaloa pakhra langrae ka hak tiah a dawn nahaeloa hitiah nangcae khaeah ka tarik ih loa Angraeng ih lokpaek ni, tito panoek na soe.

³⁸ To-e hi hae tiadoeh dawn ai nahaeloa anih to tiadoeh dawn o toeng hmah.

³⁹ Topongah naukamzanawk, Sithaw lok taphonghaih pongah palungthin to suem oah, to-e panoek ai lok apaeh ih to doeh pakaa pae o hmah.

⁴⁰ Cungriboih hae kadue kaca hoi along aim ta-ah sah oah.