1 Korin 10 - Asang Khongso New Testament

Kraangthoi Bokhaih Acoe Oah

¹ Naukamzanawk, Mosi hnukah ka baang aicae saezanawk nuiah timaw ka pha tito na pahnet o han aiah kang koeh o. Anihcae loa tamai mah a zaehoih o moa Tuipui Kathim to kasueng ta-ah angkat o.

² Mosi ih hnukbang ah a oh o batiah tamai thung hoi tuipui thungah baptisma to a hak o boih.

³ Anihcae boih mah pakhra takaw maeto khueh to cak o moa,

⁴ pakhra tui maeto khueh to naek o. Angmahcae khaeah ka om toemoe pakhra lungsong khae hoi-ih tui to a naek o; ato lungsong to loa Khrih angmah to ni.

⁵ To-e totiah oh o langla doehsoe kami kapop mah loa Sithaw to palung anghoesak o ai, topongah anihcae ih kadueh qoknawk to praetanghaeng ah kanghaeh dung ah a oh.

⁶ Hi boiboih hae aicae hanah khetpatawthaih hanih ni, anihcae mah sak ih batiah hmuen kahoih ai to koeh toeng han ai hoi,

⁷ kami thoemto mah kraangthoi bok o ih batiah to bok toeng han aiah acoehaih paek ih ni. Cabu Kacai mah, “Kaminawk loa poi kungah anghnut o moa mu antha naekhaih ih hoi zaesakhaih nawmhaih bangah coengsak o,” tiah thuih batiah a oh.

⁸ Anihcae thungih thoemto mah a sak o ih batiah nongpui nongpa zaesakhaih to aicae mah sak han om ai; totiah a sak o pongah nito thungah kami sangpum phae thumto a duek o!

⁹ Anihcae thungih kami thoemto mah Angraeng to tanoek o batiah aicae mah tanoek han om ai; totiah tanoek o pongah paqui mah patuk moa duek o.

¹⁰ Anihcae thungih kami thoemto mah laisaep o batiah aicae mah laisaep han om ai, totiah laisaep o pongah Duekhaih ih Vanmi mah a hum o.

¹¹ Hi hmuen boiboih anihcae nuiah ka pha hae mi kalahnawk mah khetpatawt hanah aicae hanih acoehaih paek ih ni. Kawmawtiah aicae loa atue boenghaih phak tom ih tue ah oh o.

¹² Kacak ta-ah kangdoet tiah ka dawn kaminawk to amtim han aiah acoe o na soe.

¹³ Nangcae mah na tongh o ih tanoekhaih loa kaminawk mah a tongh o vaih ih tanoekhaih ih to ni. To-e Sithaw loa a lok amaihhaih ih to a cak moa na pazawk o thai han ai ih laep ah tanoekhaih to nangcae khaeah phasak mak ai; tanoekhaih na tongh o na-ah pauephaih thai ih tharahhaih to na paek o ueloa nangcae loihhaih hanih loklam to doeh na sak pae o tih.

¹⁴ Topongah palung ih ampuinawk, kraangthoi bokhaih to caeh o tak ah.

¹⁵ Ka dawn thai kaminawk khaeah lokthuih batiah nangcae khaeah kang thuih o; kang thuih o ih to nangmahcae hoi nangmahcae to mah khingmong oah.

¹⁶ Angraeng Duembuh ih misurtui boengloeng hanah Sithaw khaeah kawn lok thuih na-ah: boengloeng hoiah misurtui naek o na-ah hae Khrih thii to aicae mah naek o sungqum na ai maw? Takaw to a aeh moa aicae mah cak o na-ah Khrih ih takbum to cak o sungqum na ai maw?

¹⁷ Takaw kae loa maeto ah oh pongah kami zetpui ah oh o e takbum maeto ni, kawmawtiah aicae boih mah takaw kae maeto ni cak o sungqum.

¹⁸ Israel kaminawk kawng to dawn o noek ah; angbawnhaih hanah paek tahlang ih moi to ka caanawk boih loa Sithaw hanah bokting toksakhaih ih pongah to apa o boih.

¹⁹ Topongah kraangthoi tiaibaloa kraangthoi khaeah tahlang ih caknaek hae lokpui parai tiah ka thuih koehhaih ih maw?

²⁰ Na ai ni! Ka thuih koehhaih ih loa: lawkih kaminawk ih bokting nuiah angbawnhaih ih loa taqawknawk khaeah paek ih ni, Sithaw khaeah paek ih na ai ni, tihae ni. Kai loa taqawknawk hoiah ampui ah oh hanah kang koeh o ai.

²¹ Nangcae loa Angraeng ih boengloeng hoi taqawk ih boengloeng to na nae o thaih maek mak ai; Angraeng ih caboi hoi taqawknawk ih caboi to na patoh o thaih maek mak ai.

²² Aicae mah Sithaw to duengkhoesak hanih maw koeh o? Anih pongdoeh tha ka rah o kue tiah aicae mah dawn o maw?

²³ Anihcae mah, “Tiboih doeh ka sak o thaih,” tiah a thuih o. Ahmaan, a sak o thaih, to-e cungriboih hae hoih boih ai. “Aicae loa tiboih hae sak o thaih,” to-e cungriboih hae bomkung ah om boih ai.

²⁴ Mi doeh aimah ih hoihhaih to khet han om ai, mi kalah hoihhaih ih to ni khet han oh.

²⁵ Nangmahcae ih kasae kahoih panoekhaih ih pongah dueng rae aiah, moi zawhhaih hmuenh ah zawh ih tidoeh na qanh moa na cak o thaih.

²⁶ Kawmawtiah Cabu Kacai mah, “Long hoi a thungih kaom cungriboih loa Angraeng ih ni,” tiah a thuih.

²⁷ Taangca ah kaom ai kami mah nang to buh cak hanah na kawk moa pangh han na koeh nahaeloa nangmah ih kasae kahoih panoekhaih palungthin pongah tidoeh dueng aiah ang patoem pae ih to caa ah.

²⁸ To-e kami longto mah nang khaeah, “Hi caknaek loa kraangthoi khaeah tahlang ih ni,” na naa nahaeloa ka thuikung taham poekhaih hoi kasae kahoih panoekhaih ih pongah caa aiah om halat ah.

²⁹ Kasae kahoih panoekhaih ka ti na-ah nangmahcae ih palungthin to na ai ni; mi kalah ih palungthin to ni ka thuih. Kami thoemto mah, “Totiah oh baloa tipongmaw mi kalah ih kasae kahoih panoekhaih ih mah ka loihhaih ih to pakaa tih loa?

³⁰ Ka caknaek hanah Sithaw khaeah kawn lok ka thuih nahaeloa tipongmaw caknaek hanah kawn lok ka thuih ih kawng pongah kai hae mimah kasae ah thui thai tih?” na ti o.

³¹ Nangcae loa na cak o na-ah doehsoe, na naek o na-ah doehsoe, kawbatih doeh na sak o na-ah Sithaw lensawkhaih hanih ah sah oah.

³² Judah kaminawk doehsoe, Gentel kaminawk doehsoe, Sithaw Khrihca kangkom doehsoe, ami doeh raihaih na paek o han aiah totitoah na khosakhaih to om oah.

³³ Ka sak ih batiah sah oah; anihcae mah pahlonghaih to a hak o thaih hanah kaimah hanih hoihhaih to ka dawn aiah mi boih ih hoihhaih to ka dawn moa ka sak ih boiboih ah mi boih to palung anghoesak hanah ka panki.