Yuˇdaˆ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, Yeqsur Kali-euq kuirlaf zaqkhav hawr-eu Yaqkov-euq maernmr Yurdav ma. Aqda Miqyaer nae kurdov-awr lavshawr-euq uqtaf, Yeqsur Kali bosav-eu lafkhoer jawrluf-eu tsawrhaq deuq-anr sanqbof bofanr lef-euq ma.

² Ghawqshaq gaq-eu jeq, nuisar of-eu jeq hawr-eu gaq-eu jeq nawmaf-euq lafkhoer myaqlar luf-ur.

Maeqbanq-eu Deuq

³ Ngar zawr gaq-eu cawqdeuq-or! Aqdui kakhof-eu jeq tiqkawv lof-aer za-eu garkawv, ngar nuima keuv-awr nawmaf-anr bofanr naeqlefmawf mir-a. Aerkhawf, Miqyaer nae tsawrshawr deuq-anr tiq pov bif-euq nar-aq luiv-eu jan-eu jeq-euq gharduq, nuima keuv duidui-eu lafkhoer deuv-awq laer, ghaq bif-eu tsaq nga laer noeq-awr bofanr lef-euq ma.

⁴ Aqjeq mirnae aernar-aq, tsawrhaq tiqghaqnav, aqdui maf-euq lafkhoer urkhoeq lar-euq mae. Aqyawf maf-aq, jawflafni ghae-eu jeq mrnya’ni, Miqyaer-euq guiqlanq yawdzanr lavpyawv-awr, aqdui-euq Sanqpaq Yeqsur Kali tiq ghaq taef-aer Sanqpaq Miqyaer pyeuf-eu mae laer maq hageuf-eu, Miqyaer-anr yawzeu maqbaw-eu tsawrhaq mae. Aqyawf maf-aq, yarkhaq dar-eu gar yadaqni arhuba nae bi dartsaev taq-euq mae.

⁵ Garkawv heudeuq dawqtawvluf nawmaf arhu nae siqnya taq-euq khawf, ngar, nawmaf-anr tiq pov par ja’noeqnaeq mawf nya siq. Sanqpaq Miqyaer, Irjirtuv-anr nae aqyawf-euq tsawrhaq-anr bibuq-ir-awr, arnan-aq, maqjan-eu tsawrhaq deuq-anr lavcawv naeq-euq mae.

⁶ Khoeruqtaf, yawqha ya’mr-eu yawbae jeq-anr byaerdzae-awr, yawqha-euq jawrduq jawrzar-anr maqjawr-euq mqtav ghaqkhaer deuq-anr, Miqyaer mqmaq maqbyav yarzir-euq shmrcav nae paf-awr, zanrtsuini ghae-eu jawrduq-euq lafkhoer kalanr taq-awr, yarkhaq dar-eu arnan nanma khoernan-euq gharduq laeqhmq taq-euq mae.

⁷ Sordoq, Gormorlav hawr-eu dawqpae jav-eu meuqdeuq-anr jawr-eu tsawrhaq, yawqha-euq mawrdo maqtsaq-eu lafkhoer banq-awr joe-eu jeq-anr a’naeq-awr, shiqshaq-anr taf-eu aqcawq maqmr-eu jeq-euq maeqnan cantae-euq mirnae, hawgeuf dzawgeufduq pyeufni, miv-ir-eu maqbawni dof-eu miqdzaq nae janrkhof naeq-eu lafkhoer, khaeq-awr khav-eu gar yadaq-euq lof-aer, aqyawfmaf khawf yadaq taef-a.

⁸ Shiqshaq maqshawrni bipyeuf-ir-eu yufmav mav-eu tsawrhaq deuq khawf, aryaq-euq uqmov maqjawr-aer, uvlanr-eu deuq-anr dawqdoer ngaeq-eu mae.

⁹ Mqtav ghaqkhaer-euq lafkhoer aqyuif pyeuf-eu Mirgeqlar-aq, naef sanqpaq naeq-aer dawqja ja-eu lafkhoer, shir-euq Morseq-euq mawrdo-euq garkawv tsawrpyaerpyaer ngae, aqyawf-anr dawqdoer maqngaeq-aer yarkhaq maqdarni aer-eu, “Sanqpaq Miqyaer, nawq-anr daeq luf-ur!”

¹⁰ Aerkhawf, tsawrhaq heudeuq-aq, aqyawfmaf maq siqnya-eu garkawv dawqdoer ngaeq-eu mae. Aqyawf maf-aq, tiqjeq-iq maq sharnoeq nya-eu bawrtsanq-euq jeqzaq siqnya-eu lovni taef-aer, yawqha siqnya-eu jeq-euq lafkhoer, yawqhar yawqha lavcawv luf-eu mae.

¹¹ Aqyawfmaf ghawqshar shaq-aer ya ghaesaef taef-a! Aqjeq mirnae aernar-aq, aqyawf maf-aq, Gaqirnav-euq garma-anr canluf-awr, Baqlamq nae pyurshuir-anr maerjuir juir-awr mrpoeq za’ni noeqtmq-awr mrbanq-euq garma-anr canluf-eu uqtaf, Korlav puiq-awr muir-euq lof-aer puiq-awr muir-eu mirnae yacawv-ir taef-a.

Yarkhaq Dar-eu Gar Yadaq-eu Deuq

¹² Tsawrhaq heudeuq-aq, nawmaf-euq gaq-eu yawbui-euq lafkhoer marbyawf pyeuf-awr, nawmaf naeq-aer yawbui buitaf ngae, guv-eu jeq maqanrni, yawqha-euq gharduq taef-aer laejae-eu mae. Aqyawf maf-aq, jaqlaer nae bi bawghae luf-eu, ircuf maqdanq-eu mqdmr lof-aer dur-awr, arsiq siqyamq-anr maq siqle-aer, duqcir-anr nae bi ghawrdzae-awr, nyiq pov shir-euq arsiq arbawr lof-aer khawf dur-eu mae.

¹³ Aqyawf maf-aq, iqmalavshav-euq lafkhoer irluv dzae duidui-awr, buirmeuf bi meuflar-eu lof-aer yawqha-euq shafdawr-eu jeq-anr bi dovlar-eu mae. Aqyawf maf-aq, yawqha-euq garma-anr maqcan-eu aqguir lof-aer dur-awr, aqyawf maf-euq gharduq, li-eu maqbawni zanr duidui-eu yawzanr laeqhmq taq-euq mae.

¹⁴ Aqdaq-anr nae guikalef ngae, shiftsuif tiqtsuif-anr jawr-eu Ernov khawf aqyawf maf-euq garkawv, Miqyaer gharduq heulof-aer ngaeqdan taq-euq mae, “Hawde-eq. Sanqpaq Miqyaer, aqyawf-euq tsawrshawr armyaer arjuirghaq sheuq-awr oe taef-a.

¹⁵ Aqyawf, tsawrhaq yawqghaq navluf-anr yarkhaq darle-eu mae. Aqyawf maf-euq ghanrcae, Miqyaer-anr yawzeu maqbaw-eu tsawrhaq deuq nae, Miqyaer-anr yawzeu maqbaw-eu lafkhoer, Miqyaer-anr yawzeu maqbaw-eu jeq mr-euq uqtaf, Miqyaer-anr yawzeu maqbaw-eu iqbaxzaq nae, Miqyaer-anr muir-eu lafkhoer, yaeqbawq-aer ngaeq-euq jeq-euq gharduq yarkhaq darle-eu mae.”

Tsawrdoer Dovlar-eu

¹⁶ Tsawrhaq heudeuq-aq, dawqghof dovcoer-awr, aqgeu jeq-anr khawf aerkhar za-eu uqtaf, yawqha kharnoeq kharlov-eu lof-aer daef-eu tsawrhaq mae. Aqyawfmaf dawqma ngaeq-awr jasae-eu lafkhoer khanqsaer jaev-awr, yawqha-anr muiqni aqcawq-anr jaceuq-eu tsawrhaq mae.

¹⁷ Aerkhawf, ngar zawr gaq-eu cawqdeuq-or! Nawmaf-aq, dzeurlaf ngae, aqdui-euq Sanqpaq Yeqsur Kali-euq ghaqkhaer deuq nae aertaq-euq dawq-anr taqngaer de-eq.

¹⁸ Aqyawfmaf, nawmaf-anr aernaeq-eu, “Arsaq saq-eu aryamq-euq lafkhoer, Miqyaer-anr yawzeu maqbaw-eu, yawqha-euq nuidur nuilov-anr dawqpaeq taq-awr daef-eu, aqjaf jaf-eu tsawrhaq dovlar taef-a.”

¹⁹ Tsawrhaq heudeuq-aq, armaf lavpav-eu jeq mr-awr, shiqshaq-anr dawqpaeq taq-eu uqtaf, muiq-eu Saflar maqjawr-eu tsawrhaq mae.

Miqyaer-euq Lafkhoer Jawrzif-awq

²⁰ Aerkhawf, ngar zawr gaq-eu cawqdeuq-or! Nawmaf, shawr duidui-eu jan-eu jeq-euq lafkhoer huiqlar manrlar-awr, Yawshawr Saflar-euq lafkhoer guiqlanq shar-awq.

²¹ Nawmaf, Miqyaer-euq gaq-eu jeq-euq lafkhoer jawr-awr, mqmaq maqbyav yarzir daef-eu jeq za’ni, aqdui-euq Sanqpaq Yeqsur Kali-euq ghawqshaq gaq-eu jeq-anr hawtsov taq-awr dawq-awq.

²² Jan-eu maq ziflar-euq tsawrhaq tiqpavnav deuq-anr ghawqshaq gaqnaeq-awq.

²³ Aerkhawf, nawmaf guv-eu nuima anr-eu lafkhoer tsawrhaq tiqpavnav deuq-anr bibuq-ir ni miqdzaq-euq lafkhoer nae gheudov naeq-awq. Shiqshaq baqda’nae maqshawrni bipyeuf-ir-euq maeqtsoeq-anr taef-aer khawf byae-awq.

Miqyaer-anr Jaceuq-eu

²⁴ Nawmaf sanqtif maqya tifni, Miqyaer, nawmaf-anr bosav nya-eu mae. Nawmaf iqbax taqkhar maqza-eu tsawrhaq lof-aer laqkhaq caertavni, Aqyawf-euq yawshaef khanqsaer byan-eu maeqshi yajawrni, Aqyawf sheuqkeuv naeqlaf luf-ur.

²⁵ Yawshaef khanqsaer hawr-eu huiq duidui-eu khanqsaer, Uvlanr-eu baoq hawr-eu aryaq, Nymq-mr nae mqmaq maqbyav yarzir, Aqdui-euq Kakhof-eu ghaq pyeuf-eu, Aqyawf tiq ghaq taef-aer tsawrganr byan-eu Miqyaer-euq pyeuf luf-ur. Aqmeq.