Yaˬkoˆ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Maeqlar-euq Garkawv

¹ Ngaq-euq aqyuif aqnyir deuq-or! Ghawqmya ghaq-aer maeqnaeq tsovnaeq-eu tsawrhaq taqgeuf. Aqjeq mirnae aernar-aq, aqdui maeqnaeq tsovnaeq-eu deuq-aq, aqcawq navmaqtser yarkhaq dar-eu gar yadaq-eu mae laer nawmaf siqnya-eu mae.

² Aqdui yawqghaq navluf, ghawqmya jeq-anr sanqtif tifnya mir-a. Aerkhawf, dawq maq ngaeqbanq maq ngaeqlaeq-eu tsawrhaq-aq, byan-eu tsawrhaq pyeuf-awr, yawqha-euq mawrdo dawqtawv luf-anr ghaqler nya-eu maeqkawf dawvtaq-euq tsawrhaq mae.

³ Hawsher-eq, aqdui-euq dawq bighovni manq-euq khaqmae-anr manqkawf dawv nar-aq, manq khoermawr-anr aqdui khar gheupyawr mawf-eu paw gheupyawr nya-eu mae.

⁴ Lawq-anr par sharnoeq hawsher-eq. Lawq khoer huiq duidui-awr, jaqlaer arnavni baw-eu khawf, darlav lavzaq tiq hmq nae lawq tae-eu ghaq khar taeghae mawf-eu paw taeghae nya-eu mae.

⁵ Khoerlof-aer durni, maeqlar-aq, mawrdo-euq lafkhoer nae zawr nyir-eu arsaer pyeuf-eu khawf, zawr huiq-eu garkawv khanqsaer jaevnya-eu mae. Zawr nyir-eu miqdzaq nae sanqkhav khavma-anr puivdzae ghaenya-eu gar sharnoeq hawsher-eq.

⁶ Maeqlar-aq, miqdzaq lof-aer dur-awr, maqtsaq maqdawr-eu mirkhanq pyeuf-eu mae. Mawrdo dolan-aer lavjawf nya-awr, daefzir-anr taf-eu yawqjeq navluf-anr khawf shiqbuir lanma-euq miqdzaq keuqdof-awr, bi puivdzaqjir nya-eu mae.

⁷ Tsawrhaqzaq-aq, jeqzaq, arjir, joejoe-aer can-eu jeqzaq hawr-eu ircuf-euq lafkhoer jawr-eu jeqzaq yawqjeq navluf-anr lavyan nya-awr, lavyan taq-euq deuq khawf jawr-eu mae.

⁸ Aerkhawf, tsawrhaq tiqghaq-iq maeqlar-anr maq lavyan nya-a. Maeqlar-aq, lavsaef nya-eu dof khav-awr, tiqghaq-iq maq uvlanr nya-eu yawdoer jeq pyeuf-eu mae.

⁹ Aqdui-aq, maeqlar nae aqdui-euq Aqda pyeuf-eu Sanqpaq Miqyaer-anr jaceuq-awr, Miqyaer-euq shaevdzeuf-anr durni baetaq-euq tsawrhaq-anr khawf, maeqlar nae yaqkhaer yaq-eu mae.

¹⁰ Khaqmae tiq mae-anr nae jaceuq-eu dawqkawq hawr-eu yaqkhaer yaq-eu dawq dovle-eu mae. Ngaq-euq aqyuif aqnyir deuq-or! Khoer-aq, maqtsaq-a de-eq.

¹¹ Ircuf irbyoe tiq byoe-anr nae, ircuf yawkuir hawr-eu ircuf yawkhaq tiqkawv lof-aer dovlarnya mae lor?

¹² Ngaq-euq aqyuif aqnyir deuq-or! Siqguq arbawr-anr saqloq arsiq siqlenya mae laq? Aqgaf cirni-anr siqguq arsiq siqlenya mae lor? Khoerlof-aer durni, saqdeuf tav-eu ircuf irbyoe-anr nae khawf, ircuf yawkuir maq dovlar nya-a.

Mq-anr Nae Dovle-euq Zaqsiq Tsawrganr

¹³ Nawmaf-euq lafkhoer, tsawrganr anr-awr ghovshaw nya-eu tsawrhaq aqsur ghaq le? Tsawrhaq khoerghaq-aq, nuinanq nanqyu byan-eu zaqsiq tsawrganr anr-awr, yawmuiq jeq mrdov laf-eu gar bimawr-awq.

¹⁴ Nawmaf-euq nuima-euq lafkhoer, guvlar paq-aer ghae-eu myavnav nav-eu jeq hawr-eu yawqha-euq gharduq taef-aer sharnoeq-eu jeq anr nar-aq, zaqsiq tsawrganr anr ma laer khanqsaer jaev-awr, jaqmyawf myawf-eu lafkhoer, yawtsaq yawdawr jeq-anr taq lavtsoeq.

¹⁵ Khoerlof-aer ghae-eu zaqsiq tsawrganr-aq, mq-anr nae dovle-euq maqngeur-a. Mirtsaq-anr taf-eu, shiqshaq-anr taf-eu hawr-eu naef-anr taf-eu zaqsiq tsawrganr mae.

¹⁶ Myavnav nav-eu jeq hawr-eu yawqha-euq gharduq taef-aer sharnoeq-eu jeq aqgar jav nar-aq, suqsaq-eu jeq hawr-eu yawdoer kharngeur-eu jeq khoergar dovlar taef-a.

¹⁷ Aerkhawf, mq-anr nae dovle-euq zaqsiq tsawrganr yawbae jeq-aq, yawshawr mae. Khoeruqtaf, tsaqler dzoerler-eu jeq hawr-eu nuinanq nuiyu anr-awr, narhaqgeuf nya-eu jeq hawr-eu ghawqshaq gaq-eu nuima tiqbyanni anr-eu uqtaf, yawmuiq jeq mr-awr, myavpyawq huiqnyir maqtser-aer, yawmuiq janrgeuf-eu jeq maqanr-a.

¹⁸ Tsaqler dzoerlerni mr-eu tsawrhaq-aq, tsaqler dzoerler-eu siqyoeq saeq-awr, tsaq-awr dawr-eu jeq yayaeq-eu mae.