Panmaeq 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Saqdir Kalizaq Armur

¹ “Saqdir Kalizaq armur-euq mqtav ghaqkhaer-anr heulof-aer bofnaeq-awq: ‘Miqyaer-euq Saflar shif lar hawr-eu aqguir shif siq anrluf-eu ghaq heulof-aer aer-eu mae: “Ngar, nawq nae mr-euq jeq-anr siqnya ma. Aqcawq, nawr daefluf mae laer aer-eu khawf, nawr-aq yawshir mae.

² Nawr yawbeur beur-aer jawr-awq. Shirtaw taeqni pyeuf-ir taq-euq dzerlar-euq deuq-anr ghaq bifnaeq-awq. Aqjeq mirnae aernar-aq, ngaq-euq Miqyaer-euq maeqshi, nawq nae mrtaq-euq tiqpawf-iq maqbyan nga laer ngaq-anr mawrlar-eu mae.

³ Khoermirnae, nawr aqjox-aer hageuf-awr, aqjox-aer yagaq-euq deuq-anr taqngaer de-eq. Khoerdeuq-anr narhaq geuf-awr, noeqpov noeqpar-awq. Nawr yawbeur beur-aer maqjawr ngae, smrkhoeq lof-aer ngar oe ma. Nawr jawr-eu gar, ngar aqgeu ngae yamq-anr oekeuv-eu laer nawr maqya siq-ar.

⁴ Aerkhawf, Saqdir-euq lafkhoer, yawqha-euq maeqtsoeq maq lavjawfni daef-euq tsawrhaq tiqpavnav deuq jawr-a siq. Aqyawfmaf geux-eu mirnae, maeqtsoeq yawpyur dm-awr, ngaq naeq-aer tiqkawv lof-aer yacan taef-a.

⁵ Ghaqler-eu tsawrhaq-aq, maeqtsoeq yawpyur yadm taef-a. Ngar, aqyawf-euq tsawrmyanr, Daef-eu jeq bif-eu sanqbof-anr nae maq sivbyovni, ngaqDa hawr-eu aqyawf-euq mqtav ghaqkhaer deuq-euq maeqshi, aqyawf-euq tsawrmyanr aerdov ma.

⁶ “Naqbawr tsof-awr gaqnya-eu tsawrhaq deuq, muiq-eu Saflar nae Kalizaq armur-anr aernaeq-euq dawqdeuq-anr yawmuiq-aer narhaq-awq.” ’

Pirlaqdeqpir Kalizaq Armur

⁷ “Pirlaqdeqpir Kalizaq armur-euq mqtav ghaqkhaer-anr heulof-aer bofnaeq-awq: ‘Larghov pantaq-euq gar tiqghaq-iq maq piqtaeq nya-aer, piqtaeq taq-euq gar tiqghaq-iq maq pannya-eu, “Daqbir-euq mawqtawfdur tuvtaeq taq-euq dawrcoeni ghae-eu yawshawr ghaq heulof-aer aer-eu mae.”

⁸ “Ngar, nawq nae mr-euq jeq-anr siqnya ma. Hawsher-eq. Ngar, tsawrhaq tiqghaq-iq maq piqtaeq nya-eu larghov tiqghov, nawq-euq maeqshi pantaq-euq ma. Nawr ghaq uicuiv taef-aer anr-eu khawf, ngaq-euq dawq-anr narhaq geuf-awr ngaq-euq tsawrmyanr-anr maq byaerdzae-aq.

⁹ Aqdir Yurdav tsawrhaq maqngeur-eu gar, Yurdav tsawrhaq ma laer jaqmyawf myawf-eu, naef Saqdaq-euq zanrdawq khawqnymr-anr gawf-eu deuq, nawq-euq aqkuir-euq dawqpae lar-awr awbyavni ngar janr ma. Khoerngae, ngar, nawq-anr gaq-eu ngar-a laer aqyawfmaf yasiq taef-a.

¹⁰ Nawr, ngaq-euq dawq narhaq geuf-awr daqcoer orcoer-eu mirnae, mirtsaq-euq khoertav kharjawr-eu tsawrhaqzaq-anr tsermr-eu shaq-awr zanq-eu jeq keuvle ngae, ngar, nawq-anr bibuq-ir ma.

¹¹ Hawde-eq. Ngar yawkawr-aer oe ma! Nawq-euq shuir uqkhov-anr aqcawq nae maqbi lugeufni, nawr kharjav-eu jeq-anr zifdanni nyaeftaeq taq-awq.

¹² Ngar, ghaqler-eu tsawrhaq-anr ngaq-euq Miqyaer-euq uqduq tanqnymr nymrma-euq khawrzeur bigeuf-awr, aqyawf-anr aqmyanluf khoergar bijawr ma. Ngaq-euq Miqyaer-euq tsawrmyanr, hawr-eu ngaq-euq Miqyaer jawr-eu mq-anr nae oeka-euq Yeqlursaqlaeq yawshuif pyeuf-eu, ngaq-euq Miqyaer-euq meuq-euq tsawrmyanr hawr-eu ngaq-euq tsawrmyanr yawshuif, ngar, aqyawf-euq khoertav bofdavnaeq ma.

¹³ “Naqbawr tsof-awr gaqnya-eu tsawrhaq deuq, muiq-eu Saflar nae Kalizaq armur-anr aernaeq-euq dawqdeuq-anr yawmuiq-aer narhaq-awq.” ’

Lawqdiqciv Kalizaq Armur

¹⁴ “Lawqdiqciv Kalizaq armur-euq mqtav ghaqkhaer-anr heulof-aer bofnaeq-awq: ‘Sarjax zif-awr yawtsaq yawdawr-euq lafkhoer sarkir kamq-eu ghaq, Miqyaer nae khar baetaq-euq khoertav uqdzan ghaq pyeuf-awr, Aqmeq laer kur-eu ghaq heulof-aer aer-eu mae:

¹⁵ “Ngar, nawq nae mr-euq jeq-anr siqnya ma. Nawr-aq, yawtsaef khawf maqngeur-aer, yawlanr khawf maqngeur nga. Yawtsaef nar-aq yawtsaef, yawlanr nar-aq yawlanr laer duq-eu gar ngar geufmawf mir-a.

¹⁶ Aerkhawf, nawr-aq, yawtsaef khawf maqngeur, yawlanr khawf maqngeur-aer lmrboqni taef-aer ghae-eu mirnae, ngaq-euq khaqmae-anr nae nawq-anr maevdzae ma.

¹⁷ Nawr aer-eu, ‘Ngar-aq, smrmuiq smrbaw ma. Pyurshuir myawqganq javganq-awr, tiqjeq-iq maqnym.’ Aerkhawf, nawr-aq, shaqdui zanq duidui-awr ghawqshaq gaqlar paq-aer ghae-eu, irshaq irkov pyeuf-awr, myavbaef baef-eu uqtaf, nermyawvni ghae-eu gar nawr maq siqnya-a.

¹⁸ Ngar, nawq-anr maeqbawq bifnaeq nyar. Nawr smrmuiq muiqlarni, ngar jawr-eu gar miqdzaq nae kharshawr taq-euq shuir zeurlar-awq. Nawr nermyawvni shafdawrlar paq-aer jawr-eu gar aqcawq maqya hawmawrni, maeqtsoeq yawpyur zeurdm lar-awq. Khoeruqtaf, nawq-euq myavnuiv mawrnya larni, myavnuiv-anr laef-eu javghaq zeurlar-awq.

¹⁹ Ngar gaq-eu tsawrhaq yawqghaq navluf-anr, ngar maeqpar dzawpar naeq-eu ma. Khoermirnae, nawr nuima keuv-awr noeqpov noeqpar mr-awq.

²⁰ Narhaq sher-eq, ngar larghov-anr yawf-awr khovluf ma. Aqsur ghaq maqkaq, ngaq-euq tersar gaq-awr, larghov pannaeqlaf nar-aq, ngar, aqyawf jawr-eu gar urler-awr, ngar, aqyawf naeq-aer dzaqtaf dawrtaf ma. Aqyawf khawf ngaq naeq-aer dzaqtaf dawrtaf taef-a.

²¹ Ngar ghaqler-euq mirnae, ngaqDa-euq nuirmanq-anr ngaqDa naeq-aer tiqkawv lof-aer nuirluf-eu lof-aer, ngar khawf ghaqler-eu tsawrhaq-anr ngaq naeq-aer ngaq-euq nuirmanq-anr binuir ma.

²² “Naqbawr tsof-awr gaqnya-eu tsawrhaq deuq, muiq-eu Saflar nae Kalizaq armur-anr aernaeq-euq dawqdeuq-anr yawmuiq-aer narhaq-awq.” ’ ”