Maˬkuˆ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Siqyoeq Saeq-eu Garkawv

¹ Yeqsur, lan landzer jawr-awr tiq pov par maeqnaeq-euq mae. Khoerngae, tsawrhaq armaf mafma, baqmaf purjeq-aer Yeqsur jawr-eu gar uiqle-euq mirnae, aqyawf, lan-anr jav-eu lawq-euq lafkhoer nuir-ir ngae, tsawrhaq armaf mafma dawqtawvluf lan landzer jawr-awr hawluf-eu mae.

² Khoerngae, Yeqsur yawjeq majeq dawq-anr nae garkawv ghawqmya jeq aqyawf maf-anr maeqnaeq-euq mae. Aqyawf maeqluf tsovluf ngae, aqyawf maf-anr heulof-aer aernaeq-euq mae:

³ “Nawmaf narhaq sher-eq. Siqyoeq saeq-eu tiq ghaq siqyoeq saeq-ir-euq mae.

⁴ Aqyawf saeq ngae, siqyoeq tiqpavnav deuq-aq, garma-anr ga-ir-awr, mq-anr zaw-eu arjir oe-awr siqyoeq khoerdeuq-anr tovdzaq jir-euq mae.

⁵ Tiqpavnav deuq-aq, khaqlo myaq-eu mirtsaq-anr ga-ir-awr, mirtsaq maqtur-eu mirnae, arji yawkawr-aer jilar-euq mae.

⁶ Aerkhawf, nanrma dovlar-awr, arji khoer-anr uqtsar lawfzaw ngae, duqcir maq ka’naf nya-eu mirnae, nyoeq-ir kov-ir-euq mae.

⁷ Tiqpavnav deuq-aq, aqgan daefmyaq-eu tsanr-anr ga-ir-euq mae. Aqgan bawduv maerlar-awr, arji khoer-anr uvtaeq taq-euq mirnae, arsiq maq siqle nya-a.

⁸ Tiqpavnav deuq-aq, mirtsaq mirmuiq-anr ga-ir-awr, daeflar maerlar-awr, arsiq siqle-euq mae. Tiqpavnav deuq-aq 30 bymr, tiqpavnav deuq-aq 60 bymr, tiqpavnav deuq-aq 100 bymr laer siqle-euq mae.”

⁹ Khoerngae, Yeqsur aer-eu, “Naqbawr tsof-awr khar gaqnya-eu tsawrhaq narhaq-awq.”

Aqjeq Mirnae Yawjeq Majeq Dawq Zmq-eu

¹⁰ Tsawrhaq armaf mafma ghof-ir jir-awr, Yeqsur tiq ghaq taef-aer jawr ngae, aqyawf-euq maeqnan cantae-eu tsawrhaq hawr-eu ghaqkhaer 12 ghaq, Yeqsur-anr yawjeq majeq dawq-euq dawqtsuif narhaq-euq mae.

¹¹ Khoerngae, Yeqsur, aqyawf maf-anr heulof-aer aernaeq-euq mae, “Miqyaer uvlanr-eu garkawv zaftaq-euq jeq, nawmaf-anr taef-aer bi siqnya-eu ma. Aerkhawf, aqcawq-anr-aq, yawqjeq navluf yawjeq majeq dawq-anr nae taef-aer maeqnaeq ma:

¹² ‘Aqyawfmaf parya mawr-euq khawf, maq hawdov nya-aer, parya gaq-euq khawf, maq ghovshaw nya-a. Khoerlof-aer maqghae lawnmr-aq, aqyawfmaf, ngar jawr-eu gar ghoflar-awr, ngar, aqyawf maf-euq iqbax pyaeqnaeq ma.’ ” (Isy 6:9-10)

Siqyoeq Saeq-eu Garkawv-euq Dawqtsuif

¹³ Yeqsur, aqyawf maf-anr heulof-aer aernaeq-euq mae: “Nawmaf yawjeq majeq dawq heudawq-anr maq ghovshawnya nya lor? Tox-aer mar-iq, yawjeq majeq dawq nuideuq dawqtawv luf-anr aqjox-aer ghovshawnya nmr-mq?

¹⁴ Siqyoeq saeq-eu ghaq-aq, Yaerdawq saeq-eu mae.

¹⁵ Garma-anr ga-ir-euq siqyoeq khoerdeuq-aq, aqyawfmaf, Yaerdawq yagaq-euq naeq-aer, naef Saqdaq yawkawr-aer lar-awr, aqyawf maf-euq nuima-euq lafkhoer saeqanr taq-euq dawq-anr yurdzae-eu gar aer-eu mae.

¹⁶ Khaqlo myaq-eu tsanr-anr ga-ir-euq deuq-aq, aqyawfmaf, Yaerdawq yagaq-euq naeq-aer, yawkawr-aer laqkhaq caertavni hageuf-euq tsawrhaq-anr aer-eu mae.

¹⁷ Aerkhawf, aqyawf maf-euq lafkhoer duqcir maq ka’naf nya-euq mirnae, ghawqmyanrni maqgmq-a. Yaerdawq khoer-euq baqda’nae, shaq-awr zanq-eu jeq hawr-eu khaeq-awr khav-eu jeq keuvle ngae, aqyawfmaf tiqpov taef-aer coq-ir-eu mae.

¹⁸ Aqgan daefmyaq-eu tsanr-anr ga-ir-euq deuq-aq, aqyawfmaf, Yaerdawq yagaq-euq khawf,

¹⁹ mirtsaq-euq khoertav jawr ngae khanqlanr-eu jeq, pyurshuir myawqganq-euq jaqmyawf maershuir hawr-eu kharngeur-eu jeq-anr maerjuir juir-eu jeq nae, Yaerdawq khoer-anr uvtaeq taq-euq mirnae, arsiq maq siqle nya-eu gar aer-eu mae.

²⁰ Mirtsaq mirmuiq-anr ga-ir-euq deuq-aq, tsawrhaq tiq ghaq Yaerdawq yagaq-awr hageuf-euq mirnae, arsiq siqle-eu mae. Tiqpavnav deuq-aq 30 bymr, tiqpavnav deuq-aq 60 bymr, tiqpavnav deuq-aq 100 bymr laer siqle-eu mae.”

Tsirkhmq Dof-eu Garkawv

²¹ Yeqsur, aqyawf maf-anr heulof-aer par aernaeq-euq mae, “Tsawrhaq tiq ghaq tsirkhmq dof-awr, khavpuq nae moftsanq taef-a laq? Maqngeur nar-aq, jaciq-euq uqmov ciqtaq taef-a lor? Tsirkhmq dof-euq nar-aq, tsirkhmq ciqtaq duq-anr ciqtaq-eu maqngeur-a laq?

²² Aqjeq mirnae aernar-aq, kharzaf taq-euq yawqjeq navluf byacaevni ya dovlar-awr, aqcawq-anr maqbi siqni zaftaq-euq jeq khawf, aqcawq byacaevni siqnyalar taef-a.

²³ Naqbawr tsof-awr khar gaqnya-eu tsawrhaq narhaq-awq.”

²⁴ Khoernar-aq, Yeqsur, aqyawf maf-anr heulof-aer par aernaeq-euq mae, “Nawmaf nae kharya gaq-euq jeq-anr yanr-awq. Nawmaf, aqcawq-anr paeqnaeq savnaeq-euq lof-aer, aqcawq khawf, nawmaf-anr paeqkhof savkhof naeqlaf-eu uqtaf, nawmaf narhaq geuf-eu deuq-anr uqdzaeq biflanq naeqlaf taef-a.

²⁵ Aqjeq mirnae aernar-aq, jav-eu tsawrhaq-anr par biflanq naeq-awr, maqjav-eu tsawrhaq-anr-aq, aqyawf kharjav-eu jeq khawf, yurdovjir naeq taef-a.”

Siqyoeq Huiqlar-eu Garkawv Yawjeq Majeq Dawq

²⁶ Yeqsur heulof-aer khawf maeqnaeq-euq mae: “Miqyaer uvlanr-eu jeq heulof-aer dur-eu mae. Tsawrhaq tiq ghaq mirtsaq-anr siqyoeq saeq-euq mae.

²⁷ Cifle nar-aq yuf, byalar nar-aq tur laer jawrluf ngae, siqyoeq khoer arji jilar-awr, huiqlar luf-eu mae. Aerkhawf, aqjox-aer jilar-awr huiqlar luf-eu garkawv, khoerghaq maq siqnya-a.

²⁸ Mirtsaq nae arbawq bi maerlar-awr, caernmr bi nmrle-eu mae. Yawbae, caerji jilar-awr, ghovbymq ghovdov dovlar-awr nae, caersiq marlar-eu mae.

²⁹ Caer myanlar-awr yaeqder lar-euq mirnae, khoerghaq tiqpov taef-aer yaeqkhof yur-awr yaeq-eu mae.”

Ghawqpaf Arnuiv-euq Garkawv

³⁰ Yeqsur heulof-aer paraer-eu mae: “Aqdui, Miqyaer uvlanr-eu jeq aqjeq-anr ciqcaevhaw paq nga? Yawjeq majeq dawq aqgeu jeq nae maeqnaeq paq nga?

³¹ Miqyaer uvlanr-eu jeq-aq, ghawqpaf arnuiv-anr dur-eu mae. Arnuiv khoer mirtsaq-anr ka’anr ngae, mirtsaq-euq khoertav-euq siqyoeq dawqtawvluf navmaqtser nyirdzaeq-eu khawf,

³² arji jilar-awr huiqlar ngae, ka-euq sanqlanq dawqtawvluf navmaqtser huiq-eu mae. Uqpyaq deuq huiqlar ngae, mq-anr zaw-eu arjir deuq narshmr awnaq nya-eu mae.”

Yeqsur, Yawjeq Majeq Dawq Zmq-eu

³³ Yeqsur-aq, aqyawfmaf ngaeq-aer ghovshawnya lar-eu naeq-aer ngaeq-aer khoerlof-aer ghae-eu yawjeq majeq dawq ghawqmya’ni zmqzmq-aer, aqyawf maf-anr ja’maeq naeq-euq mae.

³⁴ Yawjeq majeq dawq-anr nae maqngeur nar-aq, Yeqsur, aqyawf maf-anr maq maeqnaeq-aq. Aerkhawf, aqyawf-euq zaqlanr deuq taef-aer jawr ngae, garkawv khoerdeuq dawqtawvluf, aqyawf maf-anr ja’maeq naeq-euq mae.

Jaqlaer Laerma-anr Bi Naqler-euq

³⁵ Khoerngae nan uqciftaw, Yeqsur, zaqlanr deuq-anr cawq-eu, “Aqduimaf khoerpaw baq-anr tsaev-ir kar-eur.”

³⁶ Aqyawfmaf, tsawrhaq armaf mafma-anr ghawq-awr, maq laeqhmqni Yeqsur-anr sheuq-awr nae lawq-anr dziq-awr dov-ir-euq mae. Lawq yawzaq nuideuq khawf, aqyawfmaf naeq-aer ir-euq mae.

³⁷ Khoerngae, jaqlaer laerma japyuqni bawlar-awr, irluv dzae duidui-eu mirnae, lawq-euq lafkhoer ircuf danqbyanlar luf-eu mae.

³⁸ Yeqsur-aq, lawq-euq dawqdanq paw, uqghmq ghmq-awr yufkhav luf-eu mae. Zaqlanr deuq, Yeqsur-anr lavnoeq-ir-awr aer-eu, “Saqlaq-or! Nga’maf shirbyov jir-eu keuvlar-euq khawf, nawr tiqpawf-iq khanq maqlanr nya lor?”

³⁹ Khoerngae, Yeqsur turlar-awr, jaqlaer-anr daeq-awr nae, lan-anr khawf aernaeq-eu, “Naq-awr, ciqcur savni jav-awq!” Khoerngae, jaqlaer naqler-awr, ciqcur savni pyeuf-ir-euq mae.

⁴⁰ Khoernar-aq, Yeqsur, aqyawf maf-anr aernaeq-eu, “Nawmaf aqjeq mirnae guv-eu le? Nawmaf aqjeq mirnae maqjan-eu nya?”

⁴¹ Aqyawfmaf guv duidui-eu lafkhoer, aqyawf maf-euq yawkaq aer-eu, “Jaqlaer hawr-eu lan khawf aqyawf-euq dawq narhaq paq-aer, tsawrhaq heughaq aqsur ghaq nga?”