Maˬkuˆ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur, Kuirshir Lafshir-anr Bi Taqler-euq

¹ Khoernar-aq, heumyav nan byanlar ngae, Yeqsur, Gaqbeqneqoq-anr tiq pov par urler-euq mae. Aqyawf irkanr jawrluf-eu garkawv, aqcawq yagaq-euq mae.

² Tsawrhaq ghawqmya’ni uiqlar-euq mirnae, nymr-euq lafkhoer jawrbyan taq-euq uqtaf, nymr-euq larghov-euq lafnyir paw khawf jawrkhar maqza-a. Khoerngae, Yeqsur, aqyawf maf-anr dawqmaeq maeqnaeq luf-eu mae.

³ Khoerngae, tsawrhaq oeq ghaq kuirshir lafshir shir-eu tiq ghaq-anr baf-awr lar-euq mae.

⁴ Tsawrhaq jawrbyan taq-euq mirnae, Yeqsur jawr-eu gar maq bafurlef nya-aer, Yeqsur-euq uqduq-euq khoertav paw nymrmq lavpaef-euq mae. Aqyawfmaf, nymrmq lavpaef ghaq-euq nar-aq, kuirshir lafshir shir-eu khoerghaq-anr yufzar buibanq naeq-aer pyaeqka ghae-euq mae.

⁵ Yeqsur, aqyawfmaf jan-eu gar ya’mawr ngae, kuirshir lafshir shir-eu khoerghaq-anr aernaeq-eu, “Aqli-or! Nawq-euq iqbax pyaeqnaeq ghaq-euq ma.”

⁶ Khoerngae, zanr maeq-eu heumyav ghaq khoergar nuirluf-awr, aqyawf maf-euq nuima-euq lafkhoer sharnoeq-eu,

⁷ “Tsawrhaq heughaq aqjeq mirnae, yaeqbawq saerlu-aer teulof-aer aer-eu nga? Miqyaer tiq ghaq maqngeur nar-aq, iqbax-anr aqsur ghaq pyaeqnaeq nya-eu la?”

⁸ Aqyawf maf-euq nuima-euq lafkhoer khoerlof-aer sharnoeq luf-eu, Yeqsur-euq saflar-euq lafkhoer tiqpov taef-aer aqyawf maf-euq nuinoeq siqnya-eu mirnae, heulof-aer aernaeq-euq mae, “Aqjeq mirnae nawmaf-euq nuima-euq lafkhoer teulof-aer sharnoeq luf-eu le?

⁹ Kuirshir lafshir shir-eu ghaq-anr dawq aqgeu dawq aernaeq-eu awqdzaeq-eu la? ‘Nawq-euq iqbax pyaeqnaeq ghaq-euq ma’ laer aer-eu lor? Maqngeur nar-aq, ‘Tur-awr, nawq-euq yufzar baf-awr can’ghae-awq’ laer aer-eu laq?

¹⁰ Tsawrhaq-euq Zaqyo-aq, mirtsaq-euq khoertav iqbax pyaeqnya-eu aryaq jav-eu ngar-a laer nawmaf-anr bisiq-eu ma.” Khoerngae, Yeqsur, kuirshir lafshir shir-eu khoerghaq-anr aernaeq-eu,

¹¹ “Ngar, nawq-anr aernaeq nyar. Tur-awr, nawq-euq yufzar baf-awr nawq-euq irkanr ghof-ir-awq.”

¹² Khoerngae, tsawrhaq khoerghaq tsawqtur-awr, tiqpov taef-aer yufzar baf-awr, tsawrhaq khoerdeuq dawqtawv luf-euq maeqshi nae dov-ir-euq mae. Khoermirnae, tsawrhaq khoerdeuq dawqtawvluf zanq duidui ler-awr, Miqyaer-anr ciqhuiq ciqmanr-eu lafkhoer aer-eu, “Nga’maf heulof-aer ghae-eu jeq tiqjawr-iq maq mawrhaw-aq siq.”

Yeqsur, Leqbir-anr Kur-euq

¹³ Khoernar-aq, Yeqsur, lan landzer tiq pov parir-euq mae. Tsawrhaq armaf mafma dawqtawvluf, aqyawf jawr-eu gar uiqle ngae, aqyawf, aqyawf maf-anr maeqnaeq tsovnaeq-euq mae.

¹⁴ Yeqsur maeqhu paw par irghae ngae, Aqlaqpaer-euq zaqyo Leqbir, jeq taf-eu nymr-anr nuirluf-eu gar ya’mawr-awr aernaeq-eu, “Ngaq-euq maeqnan cantae lar-awq.” Khoerngae, Leqbir tsawqtur-awr, Yeqsur-euq maeqnan cantae ghae-euq mae.

¹⁵ Khoernar-aq, Yeqsur, Leqbir-euq nymr-anr hawqjawq jawqluf ngae, jeq taf-eu tsawrhaq hawr-eu iqbaxzaq ghawqmya’ni khawf, Yeqsur hawr-eu aqyawf-euq zaqlanr deuq naeq-aer jawqluf-eu mae. Aqjeq mirnae aernar-aq, khoerlof-aer ghae-eu tsawrhaq ghawqmya’ni Yeqsur-euq maeqnan cantae luf-eu mae.

¹⁶ Yeqsur, iqbaxzaq hawr-eu jeq taf-eu tsawrhaq naeq-aer jawq-awr hawq dzaqluf-eu gar, Paqliqsaer-euq armur-anr taf-eu zanr maeq-eu deuq ya’mawr ngae, Yeqsur-euq zaqlanr deuq-anr narhaq-eu, “Aqyawf, jeq taf-eu tsawrhaq hawr-eu iqbaxzaq naeq-aer hawq dzaqtaf-eu la lor?”

¹⁷ Yeqsur khoer-anr yagaq ngae, aqyawf maf-anr aernaeq-eu, “Jawrsar dov-eu tsawrhaq-aq, nargawr lavsav-eu tsawrhaq-anr maqmawf-ar. Nar-eu tsawrhaq deuq taef-aer mawf-eu mae. Ngar, tsaq-awr dawr-eu tsawrhaq-anr kur-eu laer oe-euq maqngeur. Iqbaxzaq deuq noeqpov noeqpar larni oe-euq ma.”

Dzardzaq Sheuq-eu Garkawv

¹⁸ Khoerngae, Yorhaq-euq zaqlanr deuq hawr-eu Paqliqsaer-euq zaqlanr deuq dzardzaq sheuqluf-eu mae. Aqyawfmaf, Yeqsur jawr-eu gar oe-awr narhaq-eu, “Yorhaq-euq zaqlanr hawr-eu Paqliqsaer-euq zaqlanr deuq dzardzaq sheuq-eu khawf, nawq-euq zaqlanr deuq aqjeq mirnae dzardzaq maqsheuq-eu la?”

¹⁹ Khoerngae, Yeqsur, aqyawf maf-anr heulof-aer aernaeq-euq mae: “Yoshuif ghaq, aqyawf-euq cawqdeuq naeq-aer jawrluf ngae, aqyawf-euq cawqdeuq-anr dzardzaq aqjox-aer bisheuq nmr-mq? Yoshuif ghaq, aqyawfmaf naeq-aer kharjawr-eu nmrkaq aqyawfmaf dzardzaq maqsheuq-ar.

²⁰ Aerkhawf, yoshuif, aqyawf-euq cawq-anr nae yaghawq-ir-eu arnan keuvle taef-a. Khoerngae, aqyawf-euq cawqdeuq dzardzaq yasheuq taef-a.

²¹ “Tsawrhaq tiqghaq-iq paerkhanq yawcaer-anr saqpar yawshuif nae paertsanr maqdof-ar. Dof nar-aq, doftaq-euq paertsanr yawshuif khoer, paerkhanq yawcaer khoerkanr-anr yawbae navmaqtser parbi pyaq-ir taef-a.

²² Khoerlof-aer durni, tiqghaq-iq shaqkhov irpuq yawoer-anr aqgaf dzaruir yawshuif maq shaevanr-ar. Shaevanr nar-aq, aqgaf dzaruir khoer shaqkhov irpuq-anr dzaqpaef-awr, aqgaf dzaruir yoerdov-awr, shaqkhov irpuq khawf cawv-ir taef-a. Aerkhawf, aqgaf dzaruir yawshuif-aq, shaqkhov irpuq yawshuif-anr yashaev anr-eu mae.”

Landaw Jawrnan-euq Yawsanr

²³ Khoernar-aq, heulof-aer pyeuflar-euq mae. Landaw jawrnan ngae nan, Yeqsur caeryar-anr irpavluf ngae, aqyawf-euq zaqlanr deuq caernmr tseuvtseuv-aer can-eu mae.

²⁴ Khoerngae, Paqliqsaer deuq, Yeqsur-anr narhaq-eu, “Hawsher-eq, aqyawfmaf landaw jawrnan ngae nan maq janrkhmq-eu jeq aqjeq ghae-eu janr-eu nga?”

²⁵ Khoerngae, Yeqsur, aqyawf maf-anr heulof-aer aerkhof naeq-euq mae: “Daqbir hawr-eu aqyawf naeq-aer jawr-eu deuq hawq maeflar-awr tiqjeq-iq dzaq-eu maqjav ngae, aqjox-aer janr-euq gar nawmaf maq guihaw-aq lor?

²⁶ Aqbyaqtaq, pirma yawhuiq ghaq geufluf ngae, aqyawf, Miqyaer-euq nymr-euq lafkhoer urler-awr, pirma deuq maqngeur nar-aq maq dzaqkhmq-eu lawrdzar kaqmur dzaq-awr, aqyawf naeq-aer jawr-eu deuq-anr khawf bifnaeq-euq garkawv maq guihaw-aq laq?”

²⁷ Yeqsur, aqyawf maf-anr heulof-aer par aernaeq-euq mae, “Tsawrhaq-aq, landaw jawrnan-euq gharduq baetaq-euq maqngeur-a. Landaw jawrnan-aq, tsawrhaq-euq gharduq baetaq-euq mae.

²⁸ Khoermirnae, Tsawrhaq-euq Zaqyo-aq, landaw jawrnan-euq Yawsanr khawf ngeur ma.”