Lormav 9 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Irsaqleqlav-anr Tserdov-euq

¹ Ngar, Kali-euq lafkhoer jaqmyawf maqmyawfni yawtsaq yawdawr ngaeq-eu ma. Ngaq-euq zaqsiq nuisiq, Yawshawr Saflar-euq lafkhoer, ngaq-euq garkawv sarkir kamqluf-eu mae.

² Ngar noeqshaq duidui-awr, aqmyanluf nuima ghawqshaq-aer ghaeluf mir-a.

³ Ngaq-euq aqyuif aqnyir pyeuf-awr, shiqshaq taf-eu ngaq-euq tsawrjeuq tsawrca-euq gharduq, ngar yaqkhaer yaq-eu gar daq-awr, Kali-anr yaghawq-ir-eu gar keuv lawnmr khawf, ngar daqmawf-eu nuima anr-eu ma.

⁴ Aqyawf maf-aq, Irsaqleqlav tsawrhaq mae. Miqyaer-euq zaq pyeuflar-awr, yawshaef khanqsaer hawr-eu dawqma sarjax za-euq uqtaf, zanrdawq bifnaeq-awr, uqduq tanq-eu zanr hawr-eu sarjax za-euq mae.

⁵ Aqpoeq deuq-aq, aqyawf maf-euq aqpoeq mae. Shiqshaq paw aerlef nar-aq, Kali khawf aqyawf maf-euq arjeuq arca mae. Aqyawf-aq, dawqtawv luf-euq khoertav uvlanr-awr, arsaq saq-eu maqbawni jaceuq-eu geux-eu Miqyaer mae. Aqmeq.

⁶ Heu-aq, Miqyaer-euq dawq yawqngaef pyeuf-ir-euq nga laer aer-eu maqngeur. Aqjeq mirnae aernar-aq, Irsaqleqlav-anr nae daefle-euq tsawrhaq dawqtawvluf aqdir Irsaqleqlav tsawrhaq pyeuf-eu maqngeur-a.

⁷ Aqbyaqhaq-euq aryoeq pyeuf-eu khawf, dawqtawvluf, aqyawf-euq zaq pyeuf-eu maqngeur-a. “Irtsav-euq aryoeq taef-aer nawq-euq zaq laer sawxnya-eu mae,” (Adb 21:12) laer aertaq-euq mae.

⁸ Heu-aq heulof-aer aermawf-eu mae. Shiqshaq-anr nae daefle-euq zaqdeuq-aq, Miqyaer-euq zaq pyeuf-eu maqngeur-a. Aerkhawf, sarjax aertaq-euq lof-aer daefle-euq tsawrhaq deuq taef-aer Aqbyaqhaq-euq aryoeq laer sawxnya-eu mae.

⁹ Aqjeq mirnae aernar-aq, sarjax heulof-aer aertaq-euq mae, “Heuyamq-anr ngar paroe ma. Khoerngae, Saqlar zaqyo tiq ghaq ciq taef-a.” (Adb 18:10,14)

¹⁰ Khoertaef-aer maqngeur-eu, Leqberkav khawf tsawrhaq tiq ghaq-euq baqda’nae zaq tsaevler-euq mae. Khoerghaq-aq, aqdui-euq aqda yawdzanr Irtsav mae.

¹¹ Zaqdzm khoer nyiq ghaq maq daefle-euq minav-aer, yawmuiq yawdoer khawf maqmr-euq siq khoer nae, Miqyaer tserdov-eu jeq zifni, aqyawfmaf mr-awr shar-eu gar haw-awr maqngeur-aer, kur-eu ghaq pyeuf-eu Miqyaer nae noeqtsaev taq-euq lof-aer tser-eu jeq pyeuf-eu mae.

¹² Miqyaer, Leqberkav-anr aernaeq-eu, “Aqkar aqyuif ghaq, aqnyir ghaq-euq kuirlaf zaqkhav yageuf taef-a.” (Adb 25:23)

¹³ Yaerbof-euq lafkhoer boftaq-euq lof-aer, “Ngar, Yaqkov-anr gaq-awr, Irsawr-anr byae-euq ma.” (Mlk 1:2-3)

¹⁴ Tox-aer mar-iq, aqdui aqjox-aer aer-eu paq nga? Miqyaer maqtsaq maqdawr-eu la laq? Maqngeur-a de-eq.

¹⁵ Aqjeq mirnae aernar-aq, Miqyaer, Morseq-anr heulof-aer aernaeq-euq mae, “Ngar ghawqshaq gaqmawf-eu ghaq-anr ghawqshaq gaqnaeq-awr, ngar ngaeqghaenaeq mawf-eu ghaq-anr ngaeqghaenaeq ma.” (Di 33:19)

¹⁶ Khoermirnae, khoer-aq, tsawrhaqzaq-euq nuikhanr-euq baqda’nae za-eu maqngeur-a. Tsawrhaqzaq laejae-awr mr-eu mirnae za-eu khawf maqngeur-a. Miqyaer ghawqshaq gaq-eu baqda’nae taef-aer za’nya-eu mae.

¹⁷ Aqjeq mirnae aernar-aq, Yaerbof-euq lafkhoer Paqlawr-euq garkawv heulof-aer aertaq-euq mae, “Ngar, ngaq-euq baoq nawq-euq mawrdo-euq lafkhoer nae bi mawrlar-awr, mirkhanq doeni ngaq-euq tsawrmyanr bi gaqbyan-ir-eu gharduq, ngar, nawq-anr bihuiq bi manrlar-euq ma.” (Di 9:16)

¹⁸ Khoermirnae, Miqyaer ghawqshaq gaqnaeq mawf-eu ghaq-anr ghawqshaq gaqnaeq-awr, nuima bi ghanrmawf-eu ghaq-anr nuima bighanr lar-eu mae.

Oeqlanq Hawr-eu Oeqlanq Taev-eu Ghaq

¹⁹ Nawmaf tiqghaqnav ngaq-anr heulof-aer narhaq mawf-eu paq, “Miqyaer aqjeq mirnae tsawrhaqzaq-anr yawlaeq pov-eu nga? Aqyawf-euq nuinoeq-anr aqsur ghaq lavtsoeq nya-eu la?”

²⁰ Tsawrhaqzaq-or! Miqyaer-anr dawqpov povler paq-aer nawr aqsur ghaq le? Bi taevtaq-euq jeq, taev-eu ghaq-anr heulof-aer aerlernya taef-a laq? “Nawr, ngaq-anr aqjeq mirnae heulof-aer taev naeqlaf-euq le?”

²¹ Oeqlanq taev-eu ghaq, mirtsaq shaqjaev tiq khor-anr nae tiq tsuv tsuv-awr, poeq-awr lawq-eu oeqlanq taevdov-awr, tiq tsuv partsuv-awr, teq-awr nyir-eu oeqlanq khawf, aqyawf taevmawf-eu lof-aer, aqyawf-euq navni jav-eu maqngeur-a laq?

²² Miqyaer, aqyawf nuima paer-eu jeq hawr-eu aqyawf-euq baoq bi mawrlar mawf-eu baqda’nae, nuima paer-eu gar yadaq-awr, lavcawv-eu gharduq laeqhmq taq-euq oeqlanq deuq-anr nuima ghawqmanrni taq-eu gar aqjeq aerkhar parza-eu.

²³ Khoeruqtaf, yawshaef khanqsaer bi za’ni yawbae ngae nae laeqhmq taq-euq, aqyawf ghawqshaq gaq-eu oeqlanq deuq-anr, aqyawf-euq yawshaef khanqsaer arnavni sanr-eu nga laer bi siqlar-eu gharduq mae.

²⁴ Oeqlanq khoer-aq, Miqyaer nae kur-euq aqduimaf ma. Yurdav tsawrhaq-euq lafkhoer taef-aer maqngeur-aer, aqcawq tsawrjeuq tsawrca-anr khawf kurdov naeqlaf-euq mae.

²⁵ Horseq sanqbof-euq lafkhoer Miqyaer aer-eu, “Ngar, ngaq-euq tsawrhaq maqngeur-eu deuq-anr, ngaq-euq tsawrhaq laer kur-awr, Ngaq nae maqgaq-euq tsawrhaq-anr, ngar gaq-eu ghaq laer kur ma.” (Hs 2:23)

²⁶ “ ‘Nawmaf-aq, ngaq-euq tsawrhaq maqngeur’ laer arhu ngaq nae aqyawf maf-anr aernaeq-euq jawrduq khoertsanr-anr, Aqyawf maf-aq, daefluf-eu Miqyaer-euq zaq mae laer aqkar jawrduq khoertsanr-euq lafkhoer, ngar, aqyawf maf-anr par aernaeq ma.” (Hs 1:10)

²⁷ Irsaqleqlav tsawrhaq-euq garkawv, Irsaqyar gur-awr heulof-aer aertaq-euq mae, “Irsaqleqlav tsawrhaq-aq, iqmalavshav-euq kharshuif lof-aer myaq-eu khawf, Kakhof-eu jeq za-awr dzerlar-eu tsawrhaq-aq uicuiv taef mae.

²⁸ Aqjeq mirnae aernar-aq, mirtsaq-euq khoertav aqyawf-euq gar ghawqmyanr maqmr-eu gharduq, Sanqpaq Miqyaer gar mrluiv-eu laer tsaq-awr dawr-eu lafkhoer, yawnymr lavnymr taef-a.” (Isy 10:22-23)

²⁹ Yawbae ngae nae, Irsaqyar nae aertaq-euq lof-aer, “ Guirmaf-euq Sanqpaq Miqyaer , aqdui-euq gharduq aryoeq maqbi ceuqyaf-euq lawnmr-aq, Aqdui khawf, Sordoq lof-aer ghae-awr, Gormorlav lof-aer dur-eu law taef-a.” (Isy 1:9)

Irsaqleqlav Tsawrhaq Maqjan-eu

³⁰ Tox-aer mar-iq, aqdui aqjox-aer aer-eu paq nga? Aqcawq tsawrjeuq tsawrca deuq-aq, tsaq-awr dawr-eu jeq-anr maq sharpov-euq khawf, tsaq-awr dawr-eu jeq-anr zataq-euq mae. Tsaq-awr dawr-eu jeq za-euq khoer-aq, jan-eu mirnae za-euq mae.

³¹ Aerkhawf, Irsaqleqlav tsawrhaq-aq, tsaq-awr dawr-eu jeq-euq zanrdawq-anr sharpov-euq khawf, tsaq-awr dawr-eu jeq-euq zanrdawq-anr maqza-aq.

³² Aqjeq mirnae maqza-euq la? Aqyawfmaf jan-eu jeq-anr maqghoe-aer, zanrdawq mrcaw-eu gar taef-aer ghoe-eu mirnae maqza nya-aq. Khoermirnae, aqyawfmaf sanqtif tif-eu khaqlo-anr sanqtif tif-euq mae.

³³ Yaerbof-euq lafkhoer boftaq-euq lof-aer, “Ngar, Ziroq gawqjawq-anr tsawrhaqzaq sanqtif bitif-eu khaqlo hawr-eu, Bi coqdzae-ir-eu khaqlo loma tiq siq baftaq-euq ma. Aqyawf-anr kharjan-eu tsawrhaq maqya shafdawr-ar.” (Isy 8:14; 28:16)